മുര്‍സിക്കു മുന്നില്‍ പ്രശ്നങ്ങളുടെ കൂമ്പാരം
കയ്റോ:മുസ്ലിം ബ്രദര്‍ഹുഡിനു ഭൂരിപക്ഷമുള്ള ഭരണഘടനാ അസംബ്ളി പാസാക്കിയ കരടു ഭരണഘടനയ്ക്ക് ഈജിപ്ഷ്യന്‍ വോട്ടര്‍മാര്‍ അംഗീകാരം നല്കിയെങ്കിലും മുഹമ്മദ് മുര്‍സിയെ കാത്തിരിക്കുന്നത് പ്രശ്നങ്ങളുടെ കൂമ്പാരം. രാജ്യത്തിന്റെ സമ്പദ്വ്യവസ്ഥ അനുദിനം മോശമായിക്കൊണ്ടിരിക്കെ, പരിഹാരനടപടികള്‍ക്ക് പ്രസിഡന്റിന് ഏറെ ശ്രദ്ധനല്‍കേണ്ടിവരും. സമ്പദ്വ്യവസ്ഥ മെച്ചപ്പെടുത്തുന്നതിന് നികുതിവര്‍ധനയും ചെലവുചുരുക്കലും അനിവാര്യമാണെന്നിരിക്കെ പ്രതിപക്ഷകക്ഷികള്‍ ഇതിനോടു പ്രതികരിക്കുന്ന രീതിയും നിര്‍ണായകം.

പുതിയ കരടുഭരണഘടനയ്ക്ക് അംഗീകാരം നേടിയെടുത്തത്തില്‍ വ്യാപക ക്രമക്കേടുകളുണ്െടന്ന് അവര്‍ ആരോപിച്ച സാഹചര്യത്തില്‍ പ്രത്യേകിച്ചും.

ശനിയാഴ്ച നടന്ന രണ്ടാംഘട്ട ഹിതപരിശോധനയില്‍ പങ്കെടുത്ത 64% പേര്‍ ഭരണഘടനയ്ക്ക് അനുകൂലമായി വോട്ടു ചെയ്തെന്നാണ് മുസ്ലിം ബ്രദര്‍ഹുഡ് നേതാക്കള്‍ പറയുന്നത്. ലിബറല്‍ നിലപാടുള്ളവരും ക്രൈസ്തവ സമൂഹവും ഭരണഘടനയില്‍ ആശങ്കപ്പെടുന്നുണ്െടന്ന് പ്രതിപക്ഷവും പറയുന്നു. എന്തായാലും ഭരണഘടനാ രൂപീകരണവേളയില്‍ പ്രകടമായ അഭിപ്രായവ്യത്യാസം വളരാനുള്ള സാഹചര്യമാണ് ഇപ്പോള്‍ രാജ്യത്ത് നിലനില്‍ക്കുന്നത്. പ്രത്യേകിച്ചും സാമ്പത്തികസ്ഥിതി മോശമാകുന്ന സാഹചര്യത്തില്‍.


പ്രതിപക്ഷത്തിന്റെകൂടി പിന്തുണയില്ലെങ്കില്‍ രാജ്യത്ത് പരിഷ്കാരങ്ങള്‍ കൊണ്ടുവരിക മുഹമ്മദ് മുര്‍സിക്ക് ദുഷ്കരമായിരിക്കും. പരിഷ്കാരങ്ങള്‍ നടപ്പാക്കിയാല്‍ മാത്ര മേ അന്താരാഷ്ട്രനാണയനിധി വാഗ്ദാനം ചെയ്തിരിക്കുന്ന 480 കോടി യുഎസ് ഡോളര്‍ ലഭ്യമാകൂ എന്നത് മറ്റൊരു യാഥാര്‍ഥ്യം.

ഏതായാലും കരടുഭരണഘടനയ്ക്ക് അംഗീകാരം ലഭിക്കുന്നതോടെ ഈജിപ്തിലെ രാഷ്ട്രീയ പ്രശ്നങ്ങളെല്ലാം തീരുമെന്ന ബ്രദര്‍ഹുഡിന്റെ പ്രതീക്ഷ തല്‍ക്കാലം ഫലവത്താകുന്ന ലക്ഷണമില്ല. പ്രസിഡന്റ് മുര്‍സിയും ബ്രദര്‍ഹുഡും സലാഫികളും ഉള്‍പ്പെടുന്ന ഗ്രൂപ്പ് ഒരു വശത്തും മതേതര ലിബറല്‍ പാര്‍ട്ടിക്കാരും മിതവാദികളായ മുസ്ലിംകളും ക്രൈസ്തവരും ഉള്‍പ്പെടുന്ന ഗ്രൂപ്പ് മറുവശത്തും നിലയുറപ്പിച്ചിരിക്കുകയാണ്.