കാര്‍ഗില്‍: മുഷാറഫ് ഒരു രാത്രി അനധികൃതമായി ഇന്ത്യയില്‍ താമസിച്ചു
ഇസ്ലാമാബാദ്: കാര്‍ഗില്‍ യുദ്ധം ആരംഭിക്കുന്നതിന് ആഴ്ചകള്‍ക്കു മുമ്പ് അന്നു പാക് സൈനിക മേധാവിയായിരുന്ന മുഷാറഫ് നിയന്ത്രണരേഖ ലംഘിച്ച് ഇന്ത്യന്‍ അതിര്‍ത്തിയില്‍ കടന്നെന്നും ഒരു രാത്രി ഇന്ത്യയില്‍ ആരുമറിയാതെ താമസിച്ചെന്നും റിപ്പോര്‍ട്ട്. മുഷാറഫിന്റെ കാലത്ത് സൈന്യത്തില്‍ മാധ്യമവിഭാഗത്തില്‍ മുതിര്‍ന്ന ഓഫീസറായിരുന്ന റിട്ടയേര്‍ഡ് കേണല്‍ അഷ്ഫാക് ഹുസൈനാണ് ടിവി പരിപാടിയി ല്‍ ഇക്കാര്യം പറഞ്ഞത്.

1999 മാര്‍ച്ച് 28നാണ് മുഷാറഫിന്റെ ഹെലികോപ്ടര്‍ നിയന്ത്രണരേഖ മുറിച്ചുകടന്നത്. നിയന്ത്രണരേഖയില്‍നിന്നു 11 കിലോമീറ്റര്‍ അകലെ ഇന്ത്യന്‍ പ്രദേശമായ സിക്രിയ മുസ്താഖര്‍ എന്ന സ്ഥലത്ത് ഒരു രാത്രി തങ്ങിയ ശേഷം പിറ്റേന്നാണു മുഷാറഫ് പാക്കിസ്ഥാനിലേക്കു മടങ്ങിയത്. കേണല്‍ അംജദ് ഷബീറിന്റെ നേതൃത്വത്തിലുള്ള പാക് സൈന്യം ആ സമയത്ത് പ്രസ്തുത മേഖലയിലുണ്ടായിരുന്നു.

2008ല്‍ കാര്‍ഗിലിനെക്കുറിച്ചു പ്രസിദ്ധപ്പെടുത്തിയ പുസ്തകത്തിലും ഹുസൈന്‍ ഇക്കാര്യം സൂചിപ്പിച്ചിരുന്നു. കാര്‍ഗില്‍ ആക്രമണം മുഷാറഫിന്റെ നേതൃത്വത്തില്‍ നാലു ജനറല്‍മാര്‍ അതീവ രഹസ്യമായി ആസൂത്രണം ചെയ്തു നടപ്പാക്കിയതാണെന്ന് നേരത്തേ റിട്ടയേര്‍ഡ് ലഫ്റ്റനന്റ് ജനറല്‍ ഷഹീദ് അസീസ് വെളിപ്പെടുത്തിയിരുന്നു.


ഇതേക്കുറിച്ചള്ള ചാനല്‍ പ്രതികരണത്തിലാണ് ഹുസൈന്‍ കൂടുതല്‍ വിവരങ്ങളുമായി രംഗത്തെത്തിയത്.കാര്‍ഗില്‍യുദ്ധം വിജയമായിരുന്നുവെന്ന മുഷാറഫിന്റെ അവകാശവാദത്തെ ഹുസൈന്‍ പുച്ഛിച്ചു തള്ളി. ആയിരത്തോളം പാക് സൈനികര്‍ക്കു ജീവഹാനി നേരിട്ടിട്ടുണ്െടന്നാണ് അനുമാനം. ശരിയായ വിവരം അന്വേഷണം നടത്തിയാലേ പുറത്തുവരുകയുള്ളൂ. കാര്‍ഗില്‍ സംബന്ധിച്ച അന്വേഷണത്തില്‍നിന്നു രക്ഷപ്പെടാനാണു പ്രധാനമന്ത്രി നവാസ് ഷെരീഫിനെ അട്ടിമറിച്ച് മുഷാറഫ് അധികാരം പിടിച്ചതെന്നാണു താന്‍ കരുതുന്നതെന്നു ഹുസൈന്‍ പറഞ്ഞു.