ഏകാന്തതയില്‍ പ്രാര്‍ഥനാജീവിതം നയിക്കാനാഗ്രഹം: മാര്‍പാപ്പ
വത്തിക്കാന്‍സിറ്റി: സ്ഥാനമൊഴിഞ്ഞശേഷം ഏകാന്തതയില്‍ പ്രാര്‍ഥനാജീവിതം നയിക്കാനാണ് ഇഷ്ടപ്പെടുന്നതെന്ന് ബനഡിക്ട് പതിനാറാമന്‍ മാര്‍പാപ്പ വ്യക്തമാക്കി.

റോമിലെ മെത്രാന്‍കൂടിയായ മാര്‍പാപ്പ റോം രൂപതയിലെ വൈദികരുടെ യോഗത്തിലാണ് ഇക്കാര്യം പറഞ്ഞത്. ലോകത്തില്‍നിന്നു മറഞ്ഞിരുന്നു പ്രാര്‍ഥനയില്‍ മുഴുകിയാലും നിങ്ങളുടെയെല്ലാം തൊട്ടടുത്ത് താനുണ്ടായിരിക്കുമെന്ന് അദ്ദേഹം ഉറപ്പു നല്കി.

രണ്ടാം വത്തിക്കാന്‍ കൌണ്‍സിലിന്റെ ചൈതന്യം ഉള്‍ക്കൊണ്ട് യഥാര്‍ത്ഥ സഭാ നവീകരണത്തിനായി പ്രവര്‍ത്തിക്കാന്‍ മാര്‍പാപ്പ ആഹ്വാനം ചെയ്തു. രണ്ടാം വത്തിക്കാന്‍ കൌണ്‍സിലില്‍ പങ്കെടുത്ത കാലത്തെ അനുഭവങ്ങള്‍ അദ്ദേഹം അനുസ്മരിച്ചു.

എണ്‍പത്തഞ്ചുകാരനായ ബനഡിക്ട് പതിനാറാമന്‍ 28നാണ് സ്ഥാനമൊഴിയുന്നത്. പ്രായാധിക്യം മൂലമുള്ള ആരോഗ്യപ്രശ്നം ചൂണ്ടിക്കാട്ടി തിങ്കളാഴ്ച സ്ഥാനത്യാഗം പ്രഖ്യാപിക്കുകയായിരുന്നു.

28നുശേഷം മാര്‍പാപ്പയുടെ വേനല്‍ക്കാല വസതിയായ കാസില്‍ ഗണ്േടാള്‍ഫോയില്‍ ഏതാനും നാള്‍ ചെലവഴിക്കുന്ന അദ്ദേഹം പിന്നീട് വത്തിക്കാനിലെ ഒരു മുന്‍ ആശ്രമ മന്ദിരത്തിലേക്കു താമസം മാറ്റും.

തുടര്‍ന്നുള്ള ജീവിതം പൂര്‍ണമായും ലോകത്തിന്റെ കണ്ണില്‍നിന്നു മറഞ്ഞിരിക്കാനാണ് അദ്ദേഹത്തിന്റെ പദ്ധതിയെന്ന് റിപ്പോര്‍ട്ട് ചെയ്യപ്പെടുന്നു. പുതിയ മാര്‍പാപ്പയെ ഈസ്ററിനുമുമ്പ് തെരഞ്ഞെടുത്തേക്കും.


ബനഡിക്ട് പതിനാറാമന്‍ മാര്‍പാപ്പ സ്ഥാനമൊഴിഞ്ഞാലുടന്‍ അദ്ദേഹത്തിന്റെ അധികാര ചിഹ്നങ്ങളായ മോതിരവും മുദ്രയും നശിപ്പിച്ചുകളയും. സാധാരണ മാര്‍പാപ്പമാര്‍ കാലംചെയ്യുമ്പോള്‍ അനുവര്‍ത്തിക്കാറുള്ളതാണ് ഈ ചടങ്ങ്.

ഇതേസമയം കഴിഞ്ഞ മാര്‍ച്ചില്‍ മെക്സിക്കോയിലേക്കും ക്യൂബയിലേക്കും നടത്തിയ പര്യടനത്തെത്തുടര്‍ന്നാണ് സ്ഥാനമൊഴിയുന്നതിനെക്കുറിച്ച് മാര്‍പാപ്പ ഗൌരവപൂര്‍വം ആലോചിച്ചു തുടങ്ങിയതെന്ന് വത്തിക്കാനിലെ ഉപദേഷ്ടാവായ ഗ്രെഗ് ബക്ക് പറഞ്ഞു.

മെക്സിക്കോയില്‍ ചെലവഴിച്ച ഒരു രാത്രി അദ്ദേഹത്തിന്റെ തലയ്ക്കു ചെറിയ പരിക്കേറ്റതായി ഇറ്റാലിയന്‍ പത്രമായ ലാ സ്റാമ്പാ റിപ്പോര്‍ട്ടു ചെയ്തു. ലൈറ്റിന്റെ സ്വിച്ച് തേടി മുറിയില്‍ നടന്നപ്പോഴാണ് ഇതു സംഭവിച്ചത്.

നിസാര പരിക്കേ പറ്റിയുള്ളുവെങ്കിലും ആരോഗ്യപ്രശ്നങ്ങളെക്കുറിച്ച് ചിന്തിക്കാന്‍ ഇത് അദ്ദേഹത്തെ പ്രേരിപ്പിച്ചിരിക്കാമെന്ന് മെക്സിക്കന്‍ പര്യടനത്തില്‍ മാര്‍പാപ്പയുടെ സംഘത്തിലുണ്ടായിരുന്ന ഒരു വൈദികനെ ഉദ്ധരിച്ച് പത്രം റിപ്പോര്‍ട്ടു ചെയ്തു.

ദീര്‍ഘയാത്രകള്‍ ഒഴിവാക്കണമെന്നു തന്റെ സഹോദരനോട് ഡോക്ടര്‍മാര്‍ നിര്‍ദേശിച്ചിരുന്നുവെന്ന് ബനഡിക്ട് പതിനാറാമന്റെ സഹോദരനായ മോണ്‍. ജോര്‍ജ് റാറ്റ്സിംഗറും ഈയിടെ പറയുകയുണ്ടായി.