ഇറാന്റെ ആണവ പദ്ധതി: തുടര്‍ ചര്‍ച്ചയ്ക്കു തീരുമാനം
അസ്താന: വിവാദ ആണവ പദ്ധതി സംബന്ധിച്ച് ഇറാനും ലോകശക്തികളും തമ്മില്‍ നടത്തുന്ന ചര്‍ച്ചയില്‍ പുരോഗതി. മാര്‍ച്ച്, ഏപ്രില്‍ മാസങ്ങളില്‍ തുടര്‍ ചര്‍ച്ച നടത്താനുള്ള തീരുമാനത്തിനു പുറമേ, ലോകശക്തികളുടെ സമീപനം യഥാര്‍ഥ്യത്തിലൂന്നിയതായിരുന്നുവെന്ന അപൂര്‍വ പ്രശംസയും ഇറാന്റെ ഭാഗത്തുനിന്നുണ്ടായി.

കസാക്കിസ്ഥാനിലെ അല്‍മാട്ടിയില്‍ അവസാനിച്ച ദ്വിദിന ചര്‍ച്ചയില്‍ സുപ്രധാന തീരുമാനങ്ങളൊന്നും ഉണ്ടായില്ല. എന്നിരുന്നാലും ചര്‍ച്ച തുടരാനുള്ള തീരുമാനം പ്രശ്ന പരിഹാരത്തിനുള്ള സാധ്യതകള്‍ ഏറെ വര്‍ധിപ്പിക്കുന്നു.

ഇറാനുമായി യുഎന്‍ രക്ഷാസമിതിയിലെ അഞ്ചംഗങ്ങളും ജര്‍മനിയുമാണ് ചര്‍ച്ചകള്‍ നടത്തുന്നത്.
മാര്‍ച്ച് 17, 18 തീയതികളില്‍ തുര്‍ക്കി തലസ്ഥാനമായ ഈസ്റാംമ്പൂളിലും ഏപ്രില്‍ 5,6 തീയതികളില്‍ കസക്കിസ്ഥാനിലെ അല്‍മാട്ടിയിലുമാണ് തുടര്‍ ചര്‍ച്ച നിശ്ചയിച്ചിരിക്കുന്നത്.

ഇറാന്‍ യുറേനിയം സമ്പുഷ്ടീകരണം അവസാനിപ്പിക്കുയാണെങ്കില്‍ എണ്ണയിതര അല്ലെങ്കില്‍ സാമ്പത്തിക മേഖലകളില്‍ ഏര്‍പ്പെടുത്തിയിരിക്കുന്ന ഉപരോധങ്ങളില്‍ ഇളവു വരുത്താമെന്ന് ലോകശക്തികള്‍ വാഗ്ദാനംവച്ചു. ഇറാനുവേണ്ടി ചര്‍ച്ചയ്ക്കു നേതൃത്വം നല്കിയ സയിദ് ജലീലി വാഗ്ദാനം വളരെ അനുഭാവപൂര്‍വം പരിഗണിച്ചതായി യുഎസ് വൃത്തങ്ങള്‍ അറിയിച്ചു.


ലോകശക്തികളുടെ ഭാഗത്തുനിന്നുണ്ടായ സമീപനം കൂടുതല്‍ യാഥാര്‍ഥ്യത്തിലൂന്നിയതും സൃഷ്ടിപരവുമായിരുന്നുവെന്ന് ചര്‍ച്ചയ്ക്കുശേഷം മാധ്യമപ്രവര്‍ത്തകരോട് ജലീലി പറഞ്ഞു. അതേസമയം, ലക്ഷ്യത്തിലേക്ക് ഇനിയും ഏറെ ദൂരമുണ്െടന്ന മുന്നറിയിപ്പും അദ്ദേഹം നല്കി. ലോകശക്തികള്‍ക്കുവേണ്ടി യൂറോപ്യന്‍ യൂണിയന്‍ വിദേശ നയ മേധാവി കാതറിന്‍ ആഷ്റ്റണ്‍ ആണു ചര്‍ച്ചയ്ക്കു നേതൃത്വം നല്കിയത്.

ഇറാന്റെ ആണവ പദ്ധതി അണുബോംബ് നിര്‍മാണത്തിനാണെന്നു ലോകശക്തികള്‍ ആരോപിക്കുന്നു. എന്നാല്‍ സമാധാന ആവശ്യത്തിലൂന്നിയുള്ള പദ്ധതിയാണു തങ്ങളുടേതെന്ന് ഇറാന്‍ അവകാശപ്പെടുന്നു.