ഈജിപ്തിൽ ഭീകരാക്രമണം; 10 പോലീസുകാർ കൊല്ലപ്പെട്ടു
Tuesday, January 10, 2017 12:51 AM IST
കയ്റോ: വടക്കൻസീനായിയിലെ എൽ ആരിഷ് പട്ടണത്തിൽ ഐഎസ് ബന്ധമുള്ള ഭീകരർ നടത്തിയ ട്രക്ക് ബോംബ് സ്ഫോടനത്തിൽ കുറഞ്ഞത് പത്തു പോലീസുകാർ കൊല്ലപ്പെടുകയും 22 പേർക്കു പരിക്കേൽക്കുകയും ചെയ്തു. ചപ്പുചവറുകൾ കൊണ്ടുപോകുന്ന ട്രക്കാണ് സ്ഫോടനത്തിന് ഉപയോഗിച്ചത്.

എൽ ആരിഷ് മുനിസിപ്പാലിറ്റിയിൽനിന്നു മോഷ്‌ടിച്ച ട്രക്കിൽ സ്ഫോടകവസ്തുക്കൾ നിറച്ചശേഷം ഈജിപ്ഷ്യൻ ചെക്കുപോസ്റ്റിലെത്തിച്ചു സ്ഫോടനം നടത്തുകയായിരുന്നു. ഏതാനും സിവിലിയന്മാരും സ്ഫോടനത്തിൽ കൊല്ലപ്പെട്ടതായി സ്‌ഥിരീകരിക്കാത്ത റിപ്പോർട്ടുണ്ട്.

ഐഎസുമായി ബന്ധമുള്ള അൻസാർ ബെയ്ത് എൽ മാക്ദസ് എന്ന സംഘടനയിലെ അംഗങ്ങളാണ് ആക്രമണം നടത്തിയത്. ട്രക്ക് സ്ഫോടനത്തിനുശേഷം അക്രമികൾ ചെക്കുപോസ്റ്റിനെ ലക്ഷ്യമിട്ട് വെടിവയ്പു നടത്തുകയും ചെയ്തു.


പ്രസിഡന്റ് മുബാറക്കിനെ പുറത്താക്കിയ 2011ലെ വിപ്ളവത്തിനുശേഷം ഈജിപ്തിലെ വടക്കൻ സീനായ് മേഖലയിൽ നിരവധി ഭീകരാക്രമണങ്ങൾ അരങ്ങേറി. 2013ൽ ഇസ്ലാമിസ്റ്റ് നേതാവ് മുഹമ്മദ് മുർസിയെ പ്രസിഡന്റ് പദത്തിൽനിന്നു പുറത്താക്കിയതിനെത്തുടർന്ന് ആക്രമണങ്ങൾ വർധിച്ചു. പോലീസിനെയും സൈനികരെയുമാണ് ഭീകരർ പ്രധാനമായും ലക്ഷ്യമിടുന്നത്. ഭീകരാക്രമണങ്ങളിൽ നിരവധി സുരക്ഷാ ഉദ്യോഗസ്‌ഥർ കൊല്ല പ്പെട്ടിട്ടുണ്ട്.