മഞ്ഞുമല ഇടിഞ്ഞ് ഇറ്റലിയിൽ ഹോട്ടൽ തകർന്നു, 30 മരണം : Deepika.com International News |

റോം: മധ്യഇറ്റലിയിൽ ബുധനാഴ്ച മഞ്ഞുമല ഇടിഞ്ഞു ഹോട്ടൽ തകർന്നു കുറഞ്ഞത് 30 പേർ കൊല്ലപ്പെട്ടു. അബ്രുസോ മേഖലയിലെ ഗാൻ സാസോ താഴ്‌വരയിലെ മൂന്നുനക്ഷത്ര ടൂറിസ്റ്റ് ഹോട്ടൽ റിഗോപിയാനോയാണ് മഞ്ഞിനടിയിലായത്.

മഞ്ഞുമല വീണ ആഘാതത്തിൽ ഹോട്ടൽ മന്ദിരം പത്തുമീറ്റർ തെന്നിമാറി. ബുധനാഴ്ച ഈ മേഖലയിൽ നാലു ഭൂചലനങ്ങളുണ്ടായി. ഇതെത്തുടർന്നാണ് ദുരന്തമുണ്ടായത്. ഹോട്ടലിനു മുകളിൽ ആറടി ഉയരത്തിൽ മഞ്ഞുണ്ട്. ബുധനാഴ്ച രാത്രി അപകടമുണ്ടായെങ്കിലും ഇന്നലെ രാവിലെ മാത്രമേ രക്ഷാപ്രവർത്തനം ആരംഭിക്കാനായുള്ളു.

സ്കീയിംഗ് ഉപകരണങ്ങൾ ഉപയോഗിച്ച് മഞ്ഞിലൂടെ ആറു കിലോമീറ്റർ സഞ്ചരിച്ചാണു രക്ഷാപ്രവർത്തകർ ഹോട്ടൽ നിന്ന സ്ഥലത്തെത്തിയത്. പ്രത്യേക ഹെലികോപ്റ്ററിൽ മൗണ്ടൻ പോലീസും എത്തി.

അപകടസമയത്ത് സ്റ്റാഫും 30 അതിഥികളുമാണു ഹോട്ടലിലുണ്ടായിരുന്നത്. ഹോട്ടലിലുണ്ടായിരുന്നവർ നേരത്തെ സഹായം അഭ്യർഥിച്ച് ടെക്സ്റ്റ് മെസേജുകൾ അയച്ചിരുന്നു.
ഹോട്ടലിൽ ഉണ്ടായിരുന്നവരിൽ ഭൂരിഭാഗവും മരിച്ചെന്നാണു കരുതുന്നതെന്ന് രക്ഷാപ്രവർത്തനത്തിനു നേതൃത്വം നൽകുന്ന അന്‍റോണിയോ ക്രോചെറ്റാ പറഞ്ഞു,രണ്ടുപേരെ ജീവനോടെ കണ്ടെത്തിയെന്ന് പെസ്കാര പ്രവിശ്യാ അധിപൻ അന്‍റോണിയോ ഡി മാർകോ പറഞ്ഞു.