മികച്ച ചിത്രം മൂൺലൈറ്റ്, ലാ ലാ ലാൻഡിന് ആറ് അവാർഡ് : Deepika.com International News |

Click here for detailed news of all items

മികച്ച ചിത്രം മൂൺലൈറ്റ്, ലാ ലാ ലാൻഡിന് ആറ് അവാർഡ്

Monday, February 27, 2017 1:57 PM IST

ലോസ് ആഞ്ചലസ്: മികച്ച ചിത്രത്തിനുള്ള ഓസ്കർ പുരസ്കാരം ബാരി ജെൻകിൻസ് സംവിധാനം ചെയ്ത മൂൺലൈറ്റിനു ലഭിച്ചു. ലാ ലാ ലാൻഡാണു മികച്ച ചിത്രമെന്ന് അവതാരകർ ആദ്യം പ്രഖ്യാപിച്ചത് ഞായറാഴ്ച ലോസ് ആഞ്ചലസിൽ നടന്ന 89-ാമത് ഓസ്കർ പുരസ്കാരദാനച്ചടങ്ങിനെ ആശയക്കുഴപ്പത്തിലാഴ്ത്തി.

ലാ ലാ ലാൻഡിന്‍റെ നിർമാതാക്കൾ അവാർഡ് സ്വീകരിക്കാൻ വേദിയിൽ എത്തുകയും പ്രസംഗം ആരംഭിക്കുകയും ചെയ്ത ശേഷമാണ് തെറ്റു പറ്റിയ കാര്യം മനസിലാക്കുന്നത്. ലാലാ ലാൻഡിന്‍റെ നിർമാതാക്കളിലൊരാളായ ജോർഡാൻ ഹോറോവിറ്റ്സ് മൂൺലൈറ്റ് ടീമിനെ വേദിയിലേക്കു ക്ഷണിക്കുകയും മൂൺലൈറ്റിനാണ് അവാർഡെന്നു പറയുകയും ചെയ്തു.

പ്രഖ്യാപനം മൂൺലൈറ്റ് സംവിധായകൻ ജെൻകിൻസിനെ ഞെട്ടിച്ചു. ആശയക്കുഴപ്പമുണ്ടായത് നിർഭാഗ്യകരമാണെന്നും അവാർഡ് കിട്ടിയതിൽ സന്തോഷമുണ്ടെന്നും ജെൻകിൻസ് പറഞ്ഞു. ഫ്ളോറിഡയിൽ വളരുന്ന സ്വവർഗാനുരാഗിയായ കറുത്തവർഗക്കാരന്‍റെ കഥ പറ‍യുന്ന മൂൺലൈറ്റ്, ഇൻ മൂൺലൈറ്റ് ബ്ലാക് ബോയ്സ് ലുക് ബ്ലൂ എന്ന നാടകത്തിന്‍റ ചലച്ചിത്രാവിഷ്കാരമാണ് .

അവലംബിത തിരക്കഥ, മികച്ച സഹനടൻ എന്നിവയുൾപ്പെടെ മൂന്നിനങ്ങളിൽ മൂൺലൈറ്റ് അവാർഡ് നേടി. ഈ ചിത്രത്തിൽ അഭിനയിച്ച മെഹർഷല അലിയാണ് മികച്ച സഹനടൻ. മികച്ച സഹനടി വയോല ഡേവീസ്(ചിത്രം-ഫെൻസസ്).

മികച്ച ചിത്രത്തിനുള്ള പുരസ്കാരംനഷ്ടമായെങ്കിലും ഛാ യാഗ്രഹണം, ഗാനം, പ്രൊഡക്ഷൻ ഡിസൈൻ തുടങ്ങിയവ ഉൾപ്പെടെ ആറ് അവാർഡുകൾ നേടി ലാ ലാ ലാൻഡ് മുൻനിരയിലെത്തി. ഇതിൽ അഭിനയിച്ച എമ്മാ സ്റ്റോണാണു മികച്ച നടി. ലാലാ ലാൻഡ് സംവിധായകൻ ഡാമിയൻ ചസലെ(32)മികച്ച സംവിധാനത്തിനുള്ള പുരസ്കാരം നേടി. മികച്ച നടനുള്ള പുരസ്കാരം മാഞ്ചസ്റ്റർ ബൈ ദ സീയിലെ അഭിനേതാവ് കേയ്സി അഫ്ളെക്കിനാണ്. എഡിറ്റിംഗ്, സൗണ്ട് മിക്സിംഗ് വിഭാഗങ്ങളിൽ മെൽ ഗിബ്സന്‍റെ ഹാക്സോ ബ്രിഡ്ജ് പുരസ്കാരങ്ങൾ നേടി.

ഡോക്യുമെന്‍ററി വിഭാഗത്തിൽ വൈറ്റ്ഹെൽമറ്റ്സ് അവാർഡ് നേടി. സിറിയയിലെ വിമതനിയന്ത്രിത മേഖലകളിൽ രക്ഷാപ്രവർത്തനം നടത്തുന്ന ഗ്രൂപ്പാണ് വൈറ്റ്ഹെൽമറ്റ്സ്.
ഓസ്കർ പ്രഖ്യാപനച്ചടങ്ങിൽ അവതാരകനായ ജിമ്മി കിമ്മൽ പ്രസിഡന്‍റ് ട്രംപിനെതിരേ പരിഹാസമുതിർത്തു.

അബദ്ധം പറ്റിയതിനു മാപ്പു പറഞ്ഞു

ലോസ് ആഞ്ചലസ്: ഓസ്കർ പുരസ്കാര പ്രഖ്യാപനച്ചടങ്ങിലുണ്ടായ ആശയക്കുഴപ്പത്തിന് ഓസ്കർ നോമിനേഷനുകളും വോട്ടും ടാബുലേറ്റ് ചെയ്യുന്ന അക്കൗണ്ടിംഗ് സ്ഥാപനം പ്രൈസ്‌വാട്ടർ കൂപ്പേഴ്സ് മാപ്പു പറഞ്ഞു. അവതാരകരായ വാറൻ ബെറ്റിയോ ഫെയ് ഡൺവേയെ കുറ്റക്കാരല്ലെന്നും അവാർഡ് ജേതാക്കളുടെ പേരുകൾ എഴുതിയ കവറുകൾ മാറിപ്പോയതാണ് പ്രശ്നമുണ്ടാക്കിയതെന്നും സ്ഥാപനം പുറത്തിറക്കിയ പ്രസ്താവനയിൽ പറഞ്ഞു. തെറ്റു മനസിലായ ഉടൻ തിരുത്തി.

ടിവി പ്രേക്ഷകരോടും സംഘാടകരോടും ലാ ലാ ലാൻഡ്, മൂൺലൈറ്റ് ചിത്രങ്ങളുടെ പ്രവർത്തകരോടും മാപ്പു ചോദിക്കുന്നു. സംഭവത്തെക്കുറിച്ച് അന്വേഷണം നടത്തും. അവാർഡ് ജേതാക്കളും എബിസി ചാനലും അക്കാദമിയും അവതാരകനായ ജിമ്മി കിമ്മലും പ്രശ്നം കൈകാര്യം ചെയ്തരീതിയിൽ അഭിമാനമുണ്ടെന്നും പ്രസ്താവനയിൽ ചൂണ്ടിക്കാട്ടി.

വീണ്ടും അബദ്ധം!

ലോസ് ആഞ്ചലസ്: മികച്ച ചിത്രം സംബന്ധിച്ച പ്രഖ്യാപനത്തിലുണ്ടായ ആശയക്കുഴപ്പത്തിനു പിന്നാലെ ഓസ്കർ പുരസ്കാരദാനച്ചടങ്ങിൽ വീണ്ടും അബദ്ധം. ചലച്ചിത്ര ലോകത്തു കഴിഞ്ഞവർഷം മൺമറഞ്ഞ പ്രതിഭകളെ അനുസ്മരിക്കുന്ന ചടങ്ങിലാണ് പിഴവു പറ്റിയത്.

കോസ്റ്റ്യൂം ഡിസൈനിംഗിന് നാലു തവണ ഓസ്കർ നോമിനേഷൻ കിട്ടിയ അന്തരിച്ച ജാനറ്റ് പാറ്റേഴ്സനെ ആദരിക്കുന്ന ചടങ്ങിനായി സംപ്രേഷണം ചെയ്ത പരിപാടിയിൽ പാറ്റേഴ്സന്‍റെ പേരിന്‍റെ കീഴെ പ്രസിദ്ധപ്പെടുത്തിയത് ഇപ്പോഴും ജീവിച്ചിരിക്കുന്ന അവരുടെ സുഹൃത്ത് ജാൻ ചാപ്മാന്‍റെ ഫോട്ടോയായിരുന്നു. താൻ ഇപ്പോഴും ജീവനോടെയുണ്ടെന്ന് ഓസ്ട്രേലിയക്കാരിയായ ചാപ്മാൻ പ്രതികരിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.