ഫ്രഞ്ച് പ്രസിഡന്‍റ് തെരഞ്ഞെടുപ്പ്; മുൻ ധനമന്ത്രി മാക്രോൺ മുന്നോട്ട് : Deepika.com International News |

Click here for detailed news of all items

ഫ്രഞ്ച് പ്രസിഡന്‍റ് തെരഞ്ഞെടുപ്പ്; മുൻ ധനമന്ത്രി മാക്രോൺ മുന്നോട്ട്

Friday, March 17, 2017 12:12 PM IST

പാരീസ്: ഫ്രഞ്ച് പ്രസിഡന്‍റ് തെരഞ്ഞെടുപ്പിൽ തീവ്ര ദേശീയവാദി മരീൻ ല പെനിന്‍റെ ലീഡ് കുറഞ്ഞു. ലെ മോന്ദ് പത്രം പ്രസിദ്ധീകരിച്ച ഇപ്സോസ് അഭിപ്രായ സർവേയിലെ വിവരമാണിത്. ല പെൻ 27 ശതമാനം പിന്തുണ നേടിയപ്പോൾ മുൻ ധനമന്ത്രിയായ എമ്മാനുവൽ മാക്രോൺ 26 ശതമാനം പേരുടെ പിന്തുണ നേടി.

അടുത്തമാസം 23-നാണു ഫ്രഞ്ച് പ്രസിഡന്‍റ് തെരഞ്ഞെടുപ്പിന്‍റെ ഒന്നാം റൗണ്ട് നടക്കുക. ഒന്നാം റൗണ്ടിൽ മുന്നിലെത്തുന്ന രണ്ടുപേർ മേയ് ഏഴിനു രണ്ടാം റൗണ്ടിൽ മത്സരിക്കും. ലെ മോന്ദ് സർവേ പ്രകാരം രണ്ടാം റൗണ്ടിൽ മാക്രോൺ 61 ശതമാനം വോട്ടോടെ വിജയിക്കും. മരീൻ ല പൻ രണ്ടാം റൗണ്ടിൽ 39 ശതമാനമേ നേടൂ. മധ്യവർത്തി സ്ഥാനാർഥിയാണു 39 വയസുള്ള മാക്രോൺ.

മുൻ യാഥാസ്ഥിതിക പ്രധാനമന്ത്രി ഫ്രാൻസ്വാ ഫിയോണിന് ആദ്യ റൗണ്ടിൽ 17.5 ശതമാനം വോട്ടേ സർവേപ്രകാരം ലഭിക്കൂ. ഫ്രഞ്ച് ധനമന്ത്രാലയത്തിൽ ഓഫീസറായിരുന്ന മാക്രോൺ പിന്നീടു റോത് സ് ചൈൽഡ് ബാങ്കിൽ നിക്ഷേപ ബാങ്കറായിരുന്നു. 2006 മുതൽ 09 വരെ സോഷ്യലിസ്റ്റ് പാർട്ടിക്കാരനായിരുന്നു. പിന്നീടു പാർട്ടിവിട്ടു. സോഷ്യലിസ്റ്റ് പ്രസിഡന്‍റ് ഒളാന്ദിന്‍റെ സ്റ്റാഫിലുണ്ടായിരുന്നു. പിന്നീട് മാനുവൽ വാൾസിന്‍റെ കാബിനറ്റിൽ ധനമന്ത്രിയായിരുന്നു.മന്ത്രിസ്ഥാനം രാജിവച്ച് എൻ മാർഷേ എന്ന രാഷ്‌ട്രീയ പ്രസ്ഥാനം രൂപവത്കരിച്ച് അതിന്‍റെ ബാനറിലാണ് മാക്രോൺ മത്സരിക്കുന്നത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.