റോക് ആൻഡ് റോൾ ഇതിഹാസം ചക് ബെറി അന്തരിച്ചു : Deepika.com International News |

Click here for detailed news of all items

റോക് ആൻഡ് റോൾ ഇതിഹാസം ചക് ബെറി അന്തരിച്ചു

Sunday, March 19, 2017 11:10 AM IST

വാഷിംഗ്ടൺ ഡിസി: പോപ് സംഗീത വിഭാഗത്തിലെ റോക്ക് ആന്‍ഡ് റോളിന്‍റെ ഉപജ്ഞാതാക്കളില്‍ ഒരാളായ ചക് ബെറി (90) അന്തരിച്ചു. അമേരിക്കന്‍ ഗിറ്റാറിസ്റ്റും ഗായകനും ഗാന രചയിതാവുമായ ചാള്‍സ് എഡ്വേര്‍ഡ് ആന്‍ഡേര്‍സണ്‍ എന്ന ചക് ബെറിയെ റോക്ക് ആന്‍ഡ് റോള്‍ ഇതിഹാസം എന്നാണ് സംഗീത ലോകം വാഴ്ത്തുന്നത്. മിസൂറിയിലെ സെന്‍റ് ലൂയിസിലെ സ്വവസതിയിൽ ശനിയാഴ്ചയായിരുന്നു ബെറിയുടെ അന്ത്യം. അടിയന്തര വൈദ്യസഹായം ആവശ്യമാണെന്ന ഫോൺ സന്ദേശത്തെത്തുടർന്ന് ബെറിയുടെ വീട്ടിലെത്തിയ മെഡിക്കൽ ടീമിന് അദ്ദേഹത്തിന്‍റെ ജീവന്‍ രക്ഷിക്കാനായില്ല. ഉച്ചകഴിഞ്ഞ് 1.25ന് അദ്ദേഹം മരിച്ച വിവരം പോലീസാണു പുറത്തുവിട്ടത്.
റോക്ക് ആന്‍ഡ് റോള്‍ ഹാള്‍ ഓഫ് ഫെയിമില്‍ ചേര്‍ക്കപ്പെടുന്ന ആദ്യ സംഗീതജ്ഞരില്‍ ഒരാളാണ് ബെറി.
പോപ്പുലര്‍ മ്യൂസിക്കിന്‍റെ മറ്റൊരു വിഭാഗമായ റോക്ക് ആന്‍ഡ് റോള്‍ ഉടലെടുത്തത് കണ്‍ട്രി മ്യൂസിക്, ബ്ലൂസ്, ഗോസ്പല്‍ മ്യൂസിക് എന്നിവയില്‍നിന്നായിരുന്നു. 1950 കളിലാണ് ഇതിനു റോക്ക് ആന്‍ഡ് റോള്‍ എന്ന പേര് ലഭിച്ചത്.
റോള്‍ ഓവര്‍ ബിഥോവന്‍, മെബെലിന്‍, യു നെവര്‍ കാന്‍ ടെല്‍, സ്വീറ്റ് ലിറ്റില്‍ സിക്സ്റ്റീന്‍, ജോണി ബി ഗുഡ് തുടങ്ങിയ ആല്‍ബങ്ങളിലൂടെ ബെറി സംഗീത ആരാധകരുടെ ഹൃദയം കീഴടക്കി. എക്കാലത്തെയും മികച്ച ഏഴാമത്തെ ഗാനമായി ജോണി ബി ഗുഡ് റോളിംഗ് സ്റ്റോണ്‍ മാസിക 2010ല്‍ തെരഞ്ഞെടുത്തിരുന്നു. 1959ല്‍ സദാചാരവിരുദ്ധ ചെയ്തിയുടെ പേരിലും 1970 ല്‍ നികുതി വെട്ടിച്ചതിനും ജയില്‍ ശിക്ഷ അനുഭവിച്ചിട്ടുണ്ട്.
1984 ല്‍ സമഗ്രസംഭാവനയ്ക്ക് ഗ്രാമി അവാര്‍ഡ് ലഭിച്ചു. സംഗീതത്തിലേക്ക് തിരിയുന്നതിനു മുമ്പ് ആശാരി, ഫ്രീലാന്‍സ് ഫോട്ടോഗ്രാഫര്‍, ബാര്‍ബര്‍ തുടങ്ങിയ ജോലികള്‍ ചെയ്തിട്ടുണ്ട്. മധ്യവര്‍ഗ ആഫ്രോ-അമേരിക്കന്‍ കുടുംബത്തില്‍ ജനിച്ച ബെറി ഇരുപത്തഞ്ചാം വയസിലാണ് സംഗീതലോകത്തെത്തുന്നത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.