ബ്രിട്ടീഷ് പാർലമെന്‍റ് ആക്രമണം: ഐഎസ് ഉത്തരവാദിത്വമേറ്റു : Deepika.com International News |

Click here for detailed news of all items

ബ്രിട്ടീഷ് പാർലമെന്‍റ് ആക്രമണം: ഐഎസ് ഉത്തരവാദിത്വമേറ്റു

Thursday, March 23, 2017 11:48 AM IST

ലണ്ടൻ: ബ്രിട്ടീഷ് പാർലമെന്‍റ് മന്ദിരത്തിനു മുന്നിൽ ബുധനാഴ്ച നടന്ന ഭീകരാക്രമണത്തിന്‍റെ ഉത്തരവാദിത്വം ഇസ്‌ലാമിക് സ്റ്റേറ്റ് (ഐഎസ്)ഏറ്റെടുത്തു. അക്രമി ബ്രിട്ടനിലെ കെന്‍റ് സ്വദേശി ഖാലിദ് മുഹമ്മദാണ് (52) എന്ന് പോലീസ് വ്യക്തമാക്കി. ഇയാൾ ഇന്‍റലിജൻസ് ഏജൻസിയുടെ നോട്ടപ്പുള്ളിയായിരുന്നുവെന്ന് പ്രധാനമന്ത്രി തെരേസാ മേ പാർലമെന്‍റിൽ പറഞ്ഞു.

ഇന്നലെ ഒരു മിനിറ്റ് മൗനാചരണത്തോടെയാണ് പാർലമെന്‍റ് സമ്മേളനം പുനരാരംഭിച്ചത്. ഭീകരാക്രമണവുമായി ബന്ധപ്പെട്ട് ലണ്ടനിലും ബിർമിംഗാമിലും തെരച്ചിൽ നടത്തി എട്ടുപേരെ കസ്റ്റഡിയിലെടുത്തിട്ടുണ്ടെന്നു പ്രധാനമന്ത്രി വ്യക്തമാക്കി. നാം ഭയപ്പെടില്ല. ഭീകരപ്രവർത്തനത്തിലൂടെ ജനാധിപത്യത്തെ നിശബ്ദമാക്കാൻ ശ്രമം നടന്നു. എന്നാൽ, ഇന്നു നാം വീണ്ടും പാർലമെന്‍റിൽ സമ്മേളിച്ചിരിക്കുകയാണ്- മേ പറഞ്ഞു.

ഭീകരാക്രമണത്തിൽ അഞ്ചുപേർ മരിച്ചെന്നു നേരത്തെ പറഞ്ഞ പോലീസ്, അക്രമിയുൾപ്പെടെ നാലുപേരാണു കൊല്ലപ്പെട്ടതെന്നുപിന്നീട് തിരുത്തി.ബ്രിട്ടൻ, ഫ്രാൻസ്, ചൈന, ദക്ഷിണകൊറിയ, റുമേനിയ തുടങ്ങി 11 രാജ്യങ്ങളിൽനിന്നുള്ള 40 പേർക്കു പരിക്കേറ്റു. ആശുപത്രിയിലുള്ള 29 പേരിൽ ഏഴു പേരുടെ നില ഗുരുതരമാണ്.

പാർലമെന്‍റ് മന്ദിരത്തിനു മുന്നിൽ കാവൽനിന്ന 48കാരനായപോലീസ് ഓഫീസർ കെയ്ത്ത് പാമർ, മക്കളെ കൂട്ടിക്കൊണ്ടുവരാൻ പോയ 43കാരിയായഅയിഷ ഫ്രേഡ് എന്ന അധ്യാപിക, അമേരിക്കൻ ടൂറിസ്റ്റ് കുർട് കൊഹ്റാൻ എന്നിവരാണ് ആക്രമണത്തിൽ കൊല്ലപ്പെട്ടത്. അക്രമിയെ പോലീസ് വെടിവച്ചുകൊന്നു. വെസ്റ്റ്മിൻസ്റ്റർ പാലത്തിലുണ്ടായിരുന്ന നിരവധി പേരെ ഇടിച്ചുവീഴ്ത്തി കാറോടിച്ചുവന്ന അക്രമി പിന്നീട് കത്തിയുമായി പുറത്തിറങ്ങി പലരെയും കുത്തി.

പാർലമെന്‍റ് മന്ദിരത്തിനു മുന്നിലെത്തി പോലീസ് ഓഫീസർ പാമറെ ‌കുത്തിവീഴ്ത്തിയ അക്രമിയെ പോലീസ് വെടിവച്ചുകൊല്ലുകയായിരുന്നു. പരിക്കേറ്റ ഫ്രഞ്ചുകാരെ ഫ്രഞ്ച് വിദേശമന്ത്രി ഷാൻ മാർക് അയ്റാൾട്ട് സന്ദർശിച്ചു. ബ്രിട്ടീഷ് പാർലമെന്‍റിൽ തെരേസാ മേയുടെ പ്രസംഗം കേൾക്കാനും അയ്റാൾട്ട് എത്തിയിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.