ഭീകരർക്കെതിരേ പാക്കിസ്ഥാൻ നടപടി എടുക്കണം: ടില്ലേർസൺ : Deepika.com International News |

Click here for detailed news of all items

ഭീകരർക്കെതിരേ പാക്കിസ്ഥാൻ നടപടി എടുക്കണം: ടില്ലേർസൺ

Monday, October 23, 2017 12:02 PM IST

ബാഗ്രാം എയർബേസ്: പാക്കിസ്ഥാനിൽ സുരക്ഷിത താവളം കണ്ടെത്തിയിട്ടുള്ള ഭീകരർക്ക് എതിരേ ശക്തമായ നടപടി വേണമെന്നു യുഎസ് സ്റ്റേറ്റ് സെക്രട്ടറി റെക്സ് ടില്ലേർസൺ പാക് സർക്കാരിനോട് ആവശ്യപ്പെട്ടു. അഫ്ഗാനിസ്ഥാനിൽ മിന്നൽ സന്ദർശനത്തിനെത്തിയ ടില്ലേർസൺ യുഎസ് സൈനികതാവളമായ ബാഗ്രാം എയർബേസിൽ പ്രസിഡന്‍റ് അഷ്റഫ് ഗനി, അഫ്ഗാൻ ചീഫ് എക്സിക്യൂട്ടീവ് അബ്ദുള്ള അബ്ദുള്ള തുടങ്ങിയവരുമായി ചർച്ചയ്ക്കുശേഷം റിപ്പോർട്ടർമാരോടു സംസാരിക്കുകയായിരുന്നു.

താലിബാനിലെ മിതവാദി വിഭാഗത്തിന് അഫ്ഗാൻ സർക്കാരിൽ പങ്കാളിത്തം നൽകുന്നതിനെക്കുറിച്ച് ആലോചിക്കാവുന്നതാണെന്നും അദ്ദേഹം പറഞ്ഞു. എന്നാൽ, അവർ അക്രമം ഉപേക്ഷിക്കുകയും രാജ്യത്തിന്‍റെ സ്ഥിരതയ്ക്കുവേണ്ടി പ്രവർത്തിക്കാമെന്ന് ഉറപ്പു തരികയും വേണം. സൈനികവിജയം നേടാമെന്നു താലിബാൻ കരുതരുതെന്നും ടില്ലേർസൺ പറഞ്ഞു.

സ്റ്റേറ്റ് സെക്രട്ടറി എന്ന നിലയിൽ ടില്ലേർസന്‍റെ ആദ്യ അഫ്ഗാൻ സന്ദർശനമാണിത്. ഏതാനും ആഴ്ച മുന്പ് പ്രതിരോധ സെക്രട്ടറി ജിം മാറ്റിസും കാബൂളിൽ മുന്നറിയിപ്പില്ലാതെ സന്ദർശനം നടത്തിയിരുന്നു. മാറ്റിസിന്‍റെ വിമാനത്തെ ലക്ഷ്യമിട്ട് താലിബാൻ റോക്കറ്റ് ആക്രമണം നടത്തുകയുണ്ടായി. ടില്ലേർസൺ എത്തുന്നതിനു മുന്പായി ഭീകർ കാബൂളിൽ റോക്കറ്റ് ആക്രമണം നടത്തി.

ആർക്കും അപായമില്ലെന്നാണു റിപ്പോർട്ട്. അഫ്ഗാൻ സന്ദർശനത്തിനു ശേഷം ടില്ലേർസൺ ഇന്നു പാക്കിസ്ഥാനിലേക്കു പോകും. ഭീകരരെ നേരിടുന്നതിനു കർക്കശ നടപടി വേണമെന്നും അമേരിക്കയുമായുള്ള ബന്ധം മെച്ചപ്പെടുത്താൻ ഇതാവശ്യമാണെന്നും പാക് ഭരണാധികാരികളെ അദ്ദേഹം ബോധ്യപ്പെടുത്തും. ഇന്ത്യയിലും ടില്ലേർസൺ സന്ദർശനം നടത്തുന്നുണ്ട്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.