2020 ഒളിമ്പിക്സ് യോഗ്യത: 11,000 കോടി രൂപയുടെ സ്പോണ്‍സര്‍ഷിപ്പ് കരാര്‍
ബര്‍ലിന്‍: 2020 ലെ ഒളിമ്പിക്സ് തുര്‍ക്കിയിലെ ഇസ്റാംബൂള്‍ നഗരത്തിനു ലഭിക്കുന്നതിനായി ഏഴുകമ്പനികള്‍ മുന്നോട്ടുവച്ചത് 11,000 കോടി രൂപയുടെ സ്പോണ്‍സര്‍ഷിപ്പ് കരാര്‍. ടര്‍ക്കിഷ് എയര്‍ലൈന്‍സ്, കോക് ഹോള്‍ഡിംഗ്സ്, മൊബൈല്‍ ഫോണ്‍ കമ്പനി ടര്‍ക്ക്സെല്‍, ഉല്‍കര്‍, ഡോഗസ് ഗ്രൂപ്പ്, ഡിജിടര്‍ക്ക്, സാബന്‍ചി ഹോള്‍ഡിംഗ് തുടങ്ങിയ കമ്പനികളാണു സ്പോണ്‍സര്‍ഷിപ്പ് വാഗ്ദാനം ചെയ്തത്.

തുര്‍ക്കിയുടെ ചരിത്രത്തില്‍ ആദ്യമായാണ് ഒരു കായികമാമാങ്കത്തിനായി ഇത്രയും വലിയ സ്വകാര്യനിക്ഷേപം ലഭിക്കുന്നത്. ഇസ്റാംബൂളിനെക്കൂടാതെ മാഡ്രിഡ്, ടോക്കിയോ എന്നീ നഗരങ്ങളാണു രംഗത്തുള്ളത്.


കഴിഞ്ഞ അഞ്ചുവര്‍ഷമായി സാമ്പത്തിക രംഗത്ത് തുര്‍ക്കി കൈവരിച്ച നേട്ടങ്ങള്‍ ഇസ്റാംബൂളിന് അനുകൂല ഘടകമായേക്കും. ജപ്പാനും സ്പെയിനും സാമ്പത്തികമാന്ദ്യത്തില്‍പ്പെട്ട് ഉഴലുകയാണ്. ്കഴിഞ്ഞവര്‍ഷം തുര്‍ക്കി സമ്പദ്വ്യവസ്ഥ മൂന്നുശതമാനം വളര്‍ച്ച നേടിയതായി ധനകാര്യമന്ത്രി മെഹ്മത് സിംസെക് പറഞ്ഞു. അടുത്തസാമ്പത്തികവര്‍ഷം നാലുശതമാനമായിരിക്കുമെന്നാണു ലോകബാങ്ക് പ്രവചനം. ഇത് അഞ്ചാംതവണയാണു ഒളിമ്പിക്സിന് ആതിഥേയത്വം നേടാന്‍ തുര്‍ക്കി ശ്രമം നടത്തുന്നത്.