ശക്തമായ സൈബര്‍ സുരക്ഷാ നിയമം ഉടന്‍: മന്ത്രി സിബല്‍
ന്യൂഡല്‍ഹി: സൈബര്‍ കുറ്റകൃത്യങ്ങളും തട്ടിപ്പും തടയാന്‍ ലക്ഷ്യമിട്ട് ശക്തമായ സൈബര്‍ സുരക്ഷാ നിയമം ഉടന്‍ ആവിഷ്കരിക്കുമെന്നു വാര്‍ത്താവിനിമയ, വിവരസാങ്കേതിക മന്ത്രി കപില്‍ സിബല്‍ അറിയിച്ചു.

സൈബര്‍ കുറ്റങ്ങള്‍ വ്യാപകമായിക്കൊണ്ടിരിക്കുന്ന പശ്ചാത്തലത്തില്‍ അതിനെ നേരിടാന്‍ കര്‍ശന നടപടികള്‍ ആവശ്യമാണെന്നു മന്ത്രി ലോക്സഭയില്‍ അറിയിച്ചു. സര്‍ക്കാര്‍ ആവിഷ്കരിക്കുന്ന പുതിയ മാധ്യമം ഒരു ചെറുത്തുനില്പിനുള്ള മാര്‍ഗമാണെന്നു അദ്ദേഹം പറഞ്ഞു. ലോകത്തിന്റെ വിവിധ ഭാഗങ്ങളിലുള്ള കംപ്യൂട്ടര്‍ ഹാക്കര്‍മാരുടെ ഏതു രീതിയിലുള്ള ചലനവും നമ്മുടെ ഇലക്ട്രോണിക്സ് വിഭാഗം എമര്‍ജന്‍സി വിദഗ്ധര്‍ നിരീക്ഷിക്കുന്നുണ്ട്.


വന്‍ വ്യാജ വാഗ്ദാനങ്ങള്‍ നല്‍കി ഏതെങ്കിലും വ്യക്തിയുടെ മൊബൈല്‍ഫോണിലേക്കു വിളിയോ ഇമെയില്‍ സന്ദേശമോ കിട്ടിയാല്‍ അക്കാര്യം മന്ത്രാലയത്തിന്റെ ശ്രദ്ധയില്‍പ്പെടുത്തിയാല്‍ നടപടി സ്വീകരിക്കും.

മിക്ക ഇന്റര്‍നെറ്റ് സേവനദാതാക്കളും ഇന്ത്യക്കു വെളിയിലായതിനാല്‍ അവരുമായി കരാറുകള്‍ ഉണ്ടാക്കുക എന്നതു പ്രയാസകരമാണ്. സൈബര്‍ തട്ടിപ്പിനെതിരെ പൊതുജനങ്ങള്‍ക്കിടയില്‍ കൂടുതല്‍ പ്രചാരണം നടത്താന്‍ സര്‍ക്കാര്‍ ശ്രമം നടത്തണമെന്ന കോണ്‍ഗ്രസ് അംഗം ജയ്പ്രകാശ് അഗര്‍വാളിന്റെ ആവശ്യം മന്ത്രി അംഗീകരിച്ചു.