പെയ്സ് - സ്റെഫാനക് ഫൈനലില്‍
Saturday, March 31, 2012 8:29 PM IST
മിയാമി: ഇന്ത്യയുടെ ലിയാന്‍ഡര്‍ പെയ്സ് - ചെക്റിപ്പബ്ളിക്കിന്റെ റാഡെക് സ്റെഫാനക് സഖ്യം മിയാമി മാസ്റേഴ്സ് പുരുഷ വിഭാഗം ഡബിള്‍സ് ഫൈനലില്‍ പ്രവേശിച്ചു. എന്നാല്‍, മിയാമിയില്‍ ഒരു ഇന്ത്യന്‍ ഫൈനല്‍ എന്ന സ്വപ്നം പൂവണിഞ്ഞില്ല. ഇന്ത്യയുടെ മഹേഷ് ഭൂപതി - രോഹന്‍ ബൊപ്പണ്ണ സഖ്യം സെമിയില്‍ പരാജയപ്പെട്ടു പുറത്തായതോടെയാണിത്. ലോക ഒന്നാം നമ്പര്‍ കൂട്ടുകെട്ടായ അമേരിക്കയുടെ ബോബ് ബ്രയാന്‍ മൈക്ക് ബ്രയാന്‍ സഹോദരങ്ങളെ കീഴടക്കിയാണ് ഏഴാം സീഡുകാരായ പെയ്സ് - സ്റെഫാനക് ഫൈനലില്‍ പ്രവേശിച്ചത്. സ്കോര്‍: 6-4, 6-4. അതേസമയം, ഇന്ത്യന്‍ എക്സ്പ്രസുകളായ ഭൂപതി - ബൊപ്പണ്ണ സഖ്യം രണ്ടാം സീഡുകാരായ ബെലാറസിന്റെ മാക്സ് മിര്‍ണയി- കാനഡയുടെ ഡാനിയേല്‍ നെസ്റര്‍ കൂട്ടുകെട്ടിനോട് 6-2, 6-4 നു സെമിയില്‍ പരാജയപ്പെട്ടു പുറത്തായി.


ഈ വര്‍ഷമാദ്യം ഓസ്ട്രേലിയന്‍ ഓപ്പണില്‍ പെയ്സ് - സ്റെഫാനക് സഖ്യം ബ്രയാന്‍ സഹോദരങ്ങളെ കീഴടക്കി കിരീടം നേടിയിരുന്നു. അന്ന് രണ്ടു സെറ്റും ടൈബ്രേക്കറിലൂടെയാണ് ഇന്തോ-ചെക് കൂട്ടുകെട്ട് സ്വന്തമാക്കിയത്. ഒരു മണിക്കൂര്‍ 11 മിനിറ്റ് നീണ്ട മത്സരത്തിനൊടുവില്‍ പെയ്സ് സഖ്യം ഫൈനലിലേക്കു മാര്‍ച്ച് ചെയ്തു. ചാമ്പ്യന്‍ഷിപ്പില്‍ ഇതുവരെ ഒരു സെറ്റുപോലും നഷ്ടപ്പെടുത്താതെയാണ് ഇന്തോ-ചെക് കൂട്ടുകെട്ട് ഫൈനലിനു യോഗ്യത നേടിയത്. അതേസമയം, രണ്ടാം സീഡായ മിര്‍ണയി-നെസ്റര്‍ സഖ്യത്തോടു പൊരുതാന്‍പോലും നില്‍ക്കാതെയാണ് ഭൂപതിയും ബൊപ്പണ്ണയും കീഴടങ്ങിയത്. ഒരു മണിക്കൂര്‍പോലും മത്സരം നീണ്ടില്ല.