ഇന്ത്യ അഞ്ചാമത്
നിംസ്(ഫ്രാന്‍സ്): ലോക വനിതാ സ്ക്വാഷ്് ചാമ്പ്യന്‍ ഷിപ്പില്‍ ഇന്ത്യന്‍ ടീമിന് അഞ്ചാം സ്ഥാനം. ഫ്രാന്‍സിലെ നിംസിലായിരുന്നു മത്സരം. മൂന്നു മത്സരങ്ങളില്‍ അയര്‍ലന്‍ഡിനെ 2-1 എന്ന സ്കോറിനു പരാജയപ്പെടുത്തിയാണ് ഇന്ത്യന്‍ ടീം അഞ്ചാം സ്ഥാനം നേടിയത്. ഇന്ത്യയുടെ ജോഷ്ന ചിന്നപ്പ അയര്‍ലന്‍ഡിന്റെ ഐസ്്ലിംഗ് ബ്ളേക്കിനെ പരാജയപ്പെടുത്തിയതോടെയാണ് ഇന്ത്യ അഞ്ചാം സ്ഥാനമുറപ്പിച്ചത്. സ്കോര്‍ 10-12, 11-8, 11-7, 11-9. നേരത്തേ ഇന്ത്യയുടെ അനഘ അലങ്കമണിയും വിജയം നേടിയിരുന്നു. ലോറാ മെലോട്ടിനെയാണ് അലങ്കമണി പരാജയപ്പെടുത്തിയത്. സ്കോര്‍: 11-8, 11- 7, 11-8. എന്നാല്‍, ഒന്നാം നമ്പര്‍ താരം മലയാളിയായ ദീപിക പള്ളിക്കല്‍ അയര്‍ലന്‍ഡിന്റെ മഡലിന്‍ പെറിയോട്് 7-11, 5-11, 13- 15 എന്ന സ്കോറിന് പരാജയപ്പെട്ടു. ലോകചാമ്പ്യന്‍ഷിപ്പുകളുടെ ചരിത്രത്തിലെ ഏറ്റവും മികച്ച നേട്ടമാണ് ഇന്ത്യ നേടിയത്. ഇന്ത്യയിലെ സ്ക്വാഷിന്റെ വളര്‍ച്ചയ്ക്ക് ഈ നേട്ടം മുതല്‍ക്കൂട്ടാകുമെന്ന് പരിശീലകന്‍ സൈറസ് പോഞ്ച പറഞ്ഞു.


ക്വാര്‍ട്ടറില്‍ ഈജിപ്തിനോടു പരാജയപ്പെട്ടതാണ് ഇന്ത്യക്കു തിരിച്ചടിയായത്. ലോക റാങ്കിംഗില്‍ ഒന്നാം സ്ഥാനത്തുള്ള ഇംഗ്ളണ്ടിനെ പരാജയപ്പെടുത്തിയ രണ്ടാം സീഡ് ഈജിപ്തിനാണു കിരീടം. മൂന്നാം സ്ഥാനം ഓസ്ട്രേലിയയെ പരാജയപ്പെടുത്തി മലേഷ്യ സ്വന്തമാക്കി.