മൂന്നാം ടെസ്റില്‍ ഓസീസ് പിടിമുറുക്കി
സിഡ്നി: വോണ്‍- മുരളീധരന്‍ ട്രോഫിക്കുവേണ്ടിയുള്ള ടെസ്റ്റ് പരമ്പരയിലെ മൂന്നാമത്തെയും അവസാനത്തെയുമായ മത്സരത്തില്‍ ശ്രീലങ്കയ്ക്കെതിരേ ഓസീസി പിടിമുറുക്കി. ആദ്യ രണ്ടു ടെസ്റും ജയിച്ച ഓസ്ട്രേലിയ മൂന്നാം ടെസ്റ്റും സ്വന്തമാക്കാനൊരുങ്ങുകയാണ്. ശ്രീലങ്ക ഒന്നാം ഇന്നിംഗ്സ് 294, രണ്ടാം ഇന്നിംഗ്സ് ഏഴിന് 225. ഓസ്ട്രേലിയ ഒന്നാം ഇന്നിംഗ്സ് ഒന്‍പതിനു 432ന് ഡിക്ളയേര്‍ഡ്.

രണ്ടാം ഇന്നിംഗ്സില്‍ ശ്രീലങ്ക ഏഴു വിക്കറ്റ് നഷ്ടത്തില്‍ 225 റണ്‍സ് എന്ന നിലയിലാണ്. ലങ്കയ്ക്കു മൂന്നു വിക്കറ്റ് കൈയിലിരിക്കേ 87 റണ്‍സിന്റെ ലീഡാണുള്ളത്. ദിനേഷ് ചാന്ദിമലും (22), രങ്കണ ഹെറാത്തു (7)മാണ് ക്രീസില്‍.

രണ്ടാം ദിവസത്തെ സ്കോറായ 342ല്‍ തുടങ്ങിയ ഓസീസ് മൂന്നാം ദിവസം ഒന്‍പതു വിക്കറ്റ് നഷ്ടത്തില്‍ 432 റണ്‍സ് എന്നനിലയില്‍ ഒന്നാം ഇന്നിംഗ്സ് ഡിക്ളയര്‍ ചെയ്തു. ഇതോടെ 138 റണ്‍സിന്റെ ഓവറോള്‍ ലീഡ് സ്വന്തമാക്കി. വിക്കറ്റ് കീപ്പര്‍ ബാറ്റ്സ്മാന്‍ മാത്യു വേഡ് (102) പുറത്താകാതെ നേടിയ ടെസ്റ് സെഞ്ചുറിയായിരുന്നു മൂന്നാം ദിവസത്തെ പ്രത്യേകത. സ്വന്തം സ്കോര്‍ 97ല്‍ നില്‍ക്കേ ലക്മലിന്റെ പന്ത് ഫോറിലേക്കു പായിച്ചാണ് കന്നി ശതകം തികച്ചത്. വാലറ്റക്കാരെ കൂട്ടുപിടിച്ചുള്ള വേഡിന്റെ പോരാട്ടത്തിലൂടെയാണ് ഓസ്ട്രേലിയയക്കു ലീഡു നേടാനായത്. 158 പന്തുകള്‍ നേരിട്ട 102 റണ്‍സ് നേടിയ വിക്കറ്റ് കീപ്പര്‍ ഒന്‍പതു ഫോറുകളും പായിച്ചു.


വേഡും പീറ്റര്‍ സിഡിലുമായുള്ള ഏഴാം വിക്കറ്റ് കൂട്ടുകെട്ടില്‍ 77 റണ്‍സാണ് പിറന്നത്. സിഡില്‍ (38) പുറത്താകുമ്പോള്‍ ഓസീസ് സ്കോര്‍ 384ല്‍ എത്തിയിരുന്നു.

രണ്ടാം ഇന്നിംഗ്സിനിറങ്ങിയ ശ്രീലങ്കയുടെ തുടക്കം തകര്‍ച്ചയോടെയായിരുന്നു. സ്കോര്‍ബോര്‍ഡില്‍ 24 ആയപ്പോള്‍ ദില്‍ഷനെ ലങ്കയ്ക്കു നഷ്ടമായി. പിന്നീട് രണ്ടാം വിക്കറ്റില്‍ ്നായകനെന്ന നിലയില്‍ അവസാന ടെസ്റ് കളിക്കുന്ന ജയവര്‍ധനയും ഓപ്പണര്‍ ദിമുത് കരുണരത്നയും ചേര്‍ന്ന് 108 റണ്‍സ് നേടി ലങ്കയെ മുന്നോട്ട് നയിച്ചു. ലങ്കന്‍ സ്കോര്‍ 132ലെത്തിയപ്പോള്‍ കരുണരത്നയെ (85) നഷ്ടമായി. പിന്നീട് സാവധാനം ബാറ്റ് വീശിയ ലങ്കയ്ക്കു 178ല്‍ വച്ചു നായകനെയും (60) നഷ്ടമായി.