റയലിന്റെ അഞ്ചടിയില്‍ വലന്‍സിയ വീണു
വലന്‍സിയ: ബാഴ്സലോണയുടെ അപ്രതീക്ഷിത തോല്‍വിയില്‍നിന്നും ആവേശമുള്‍ക്കൊണ്ട് ഹൊസെ മൌറിഞ്ഞോയുടെ കുട്ടികള്‍ അറിഞ്ഞുകളിച്ചപ്പോള്‍ വലന്‍സിയയുടെ വലയില്‍ റയല്‍ മാഡ്രിഡിന്റെ ഗോള്‍ മഴ. അലറിവിളിക്കുന്ന സ്വന്തം ആരാധകര്‍ക്കു മുന്നില്‍ എതിരില്ലാത്ത അഞ്ചുഗോളിന്റെ ദയനീയതോല്‍വിയാണ് വലന്‍സിയ നേരിട്ടത്. ഈ ജയത്തോടെ മൂന്നാംസ്ഥാനത്തുള്ള റയല്‍ ഒന്നാമതുള്ള ബാഴ്സലോണയുമായുള്ള പോയിന്റ് വ്യത്യാസം പതിനഞ്ചാക്കി കുറച്ചു. സൂപ്പര്‍താരം ക്രിസ്റ്യാനോ റൊണാള്‍ഡോയും ഏയ്ഞ്ചല്‍ ഡി മാരിയയും നേടിയ ഇരട്ടഗോളുകള്‍ക്കൊപ്പം ഗൊണ്‍സാലോ ഹിഗ്വിന്‍ നേടിയ ഗോളുമാണ് മാഡ്രിഡിനു വിലപ്പെട്ട മൂന്നൂപോയിന്റ് നേടിക്കൊടുത്തത്. ആദ്യപകുതിയിലാണ് ഗോളുകള്‍ മുഴുവന്‍ പിറന്നത്.

സ്വന്തം കാണികള്‍ക്കു മുന്നില്‍ നിറഞ്ഞ ആവേശത്തോടെയാണ് വലന്‍സിയ കളിക്കാനിറങ്ങിയത്. ആദ്യമിനിറ്റുകളില്‍ അവര്‍ സന്ദര്‍ശകരുടെ ഗോള്‍മുഖത്ത് ആക്രമണം നടത്തുകയും ചെയ്തു. ആദ്യമിനിറ്റുകളില്‍ കാര്യമായ ആവേശം കാണിക്കാതിരുന്ന റൊണാള്‍ഡോയും സംഘവും പിന്നീട് ഇരച്ചുകയറുന്നതാണു കണ്ടത്. ഒമ്പതാംമിനിറ്റില്‍ ഗോണ്‍സാലോ ഹിഗ്വിനിലൂടെ ദി വൈറ്റ്സിന്റെ ആരാധകര്‍ കാത്തിരുന്ന നിമിഷം വന്നെത്തി. മാഡ്രിഡ് ബോക്സില്‍ വെച്ച് പന്ത് പിടിച്ചെടുത്ത മെസ്യൂട്ട് ഓസില്‍ പകുതിയില്‍ നിന്നും നല്കിയ പന്തുമായി കുതിച്ച എയ്ഞ്ചല്‍ ഡി മാരിയയ്ക്കു മറിച്ചു നല്കി.

വലന്‍സിയ ബോക്സില്‍ നിന്നും മാരിയയുടെ ക്രോസ് ഡിയേഗോ അല്‍വസിനെ കബളിപ്പിച്ച് പോസ്റ്റിലേക്ക് കോരിയിടേണ്ട കാര്യമേ ഹ്വിഗിനുണ്ടായിരുന്നുള്ളു. ആദ്യഗോള്‍ വീണതോടെ ഉണര്‍ന്നുകളിച്ച ആതിഥേയര്‍ക്ക് തുറന്ന അവസരങ്ങള്‍ മുതലാക്കാന്‍ മാത്രം സാധിച്ചില്ല. ഏതുനിമിഷവും ഗോള്‍ വീണേക്കാമെന്ന അവസ്ഥയില്‍ 34-ാം മിനിറ്റില്‍ രണ്ടാമത്തെ ഗോളും വീണു. ആദ്യ ഗോളിന് വഴിമരുന്നിട്ട ഡി മാരിയ രണ്ടാംഗോള്‍ സ്വന്തം അക്കൌണ്ടിലാക്കി.


റൊണാള്‍ഡോയുടെ മനോഹരമായ ക്രോസ് ഗോളിലേക്കു തിരിച്ചുവിടേണ്ടതുമാത്രമേ ഈ അര്‍ജന്റൈന്‍ താരത്തിനുണ്ടായിരുന്നുള്ളൂ. റയലിന്റെ മൂന്നാംഗോളിന് രണ്ടുമിനിറ്റിന്റെ ഇടവേളമാത്രം. മിഡ്ഫീല്‍ഡര്‍ സമി ഖെദീരയുടെ പാസില്‍ നിന്നായിരുന്നു റൊണാള്‍ഡോയുടെ ഗോള്‍. ആദ്യപകുതി അവസാനിക്കുന്നതിനു മുമ്പുള്ള നാലുമിനിറ്റിനുള്ളില്‍ രണ്ട് തവണ കൂടി വലന്‍സിയ ഗോള്‍കീപ്പര്‍ ഡീഗോ ആല്‍വെസിന് കീഴടങ്ങേണ്ടി വന്നു. 41-ാംമിനിറ്റില്‍ ഡി മരിയ-ഓസില്‍-റൊണാള്‍ഡോ കൂട്ടായ്മയില്‍ റയലിന്റെ നാലാംഗോളും പോര്‍ച്ചുഗല്‍ താരത്തിന്റെ രണ്ടാംഗോളും പിറന്നു. ആദ്യപകുതിയുടെ അവസാനമിനിറ്റില്‍ ഡി മാരിയ റയലിന്റെ പട്ടിക പൂര്‍ത്തിയാക്കി. സ്വന്തം തട്ടകത്തില്‍ കനത്ത തോല്‍വി ഏറ്റുവാങ്ങേണ്ടി വന്നതോടെ അവര്‍ക്കു 30 പോയിന്റോടെ ഏഴാംസ്ഥാനത്തേക്ക് ഇറങ്ങേണ്ടി വന്നു. മറ്റൊരു മത്സരത്തില്‍ ലാലിഗയില്‍ രണ്ടാമതുള്ള അത്ലറ്റികോ മാഡ്രിഡ് എതിരില്ലാത്ത രണ്ടു ഗോളുകള്‍ക്ക് ലാവന്റയെ പരാജയപ്പെടുത്തി. അഡ്രിയാനും (32) കോക്കേയുമാണ് ഗോളുകള്‍ നേടിയത്. ഈ ജയത്തോടെ ഒന്നാമതുള്ള ബാഴ്സയുമായുള്ള പോയിന്റ് വ്യത്യാസം ഒമ്പതായി ചുരുക്കാനും അവര്‍ക്കായി.