Sports News
മീറ്റിലെ താരത്തിനു നാനോ കാര്‍!
Friday, February 1, 2013 11:02 PM IST
ഇറ്റാവ: സൈക്കിളിനു പിന്നാലെ നാനോ കാര്‍ പ്രഖ്യാപനവും. 58-ാം ദേശീയ സ്കൂള്‍ മീറ്റിലെ മികച്ച താരത്തിന് ഉത്തര്‍പ്രദേശ് സര്‍ക്കാരിന്റെ ബമ്പര്‍ സമ്മാനമാണ് നാനോ കാര്‍. നാനോ കാറിന്റെ ഏറ്റവും പുതിയമോഡല്‍ ആണ് മികച്ച കായികതാരത്തിനു സമ്മാനിക്കുകയെന്ന് സര്‍ക്കാര്‍ വൃത്തങ്ങള്‍ അറിയിച്ചു. കഴിഞ്ഞ ദിവസം മീറ്റില്‍ പങ്കെടുക്കുന്ന 2300 വിദ്യാര്‍ഥികള്‍ക്കും സൈക്കിള്‍ നല്കുമെന്ന് സര്‍ക്കാര്‍ അറിയിച്ചിരുന്നു. എല്ലാ വിദ്യാര്‍ഥികള്‍ക്കും അവരവരുടെ സ്കൂളുകളില്‍ സൈക്കിള്‍ എത്തിച്ചു നല്കാനാണ് യു.പി സര്‍ക്കാരിന്റെ നീക്കം. ഇതിനായി ഓരോ കായികതാരങ്ങളുടേയും സ്കൂള്‍ മേല്‍വിലാസം സംഘാടകസമിതി ടീം മാനേജര്‍മാരില്‍ നിന്ന് ഇന്നലെ ശേഖരിച്ചു.

മികച്ച കായികതാരത്തിനായി നല്കുന്ന നാനോ കാര്‍ കേരള താരത്തിനു ലഭിക്കുമോ എന്നു ക്യാമ്പ് അംഗങ്ങള്‍ കാത്തിരിക്കുന്നു. സീനിയര്‍ പെണ്‍കുട്ടികളുടെ 1500,3000 മീറ്ററുകളില്‍ റിക്കാര്‍ഡോടെയും 5000 മീറ്ററില്‍ സ്വര്‍ണവും ഉള്‍പ്പെടെ മൂന്നു സ്വര്‍ണം സ്വന്തമാക്കിയ പാലക്കാട് മുണ്ടൂര്‍ സ്കൂളിലെ പി.യു. ചിത്രയും മികച്ച കായികതാരത്തിന്റെ പട്ടികയിലുണ്ട്.


സീനിയര്‍ പെണ്‍കുട്ടികളില്‍ നിന്ന് ഒഡീഷയുടെ ദ്യുതി ഛന്ദ്, ജൂണിയര്‍ പെണ്‍കുട്ടികളില്‍ മഹാരാഷ്ട്രയുടെ അഞ്ജന ടാംകെ എന്നിവരും മികച്ച താരത്തിന്റെ പട്ടികയില്‍ ഉള്‍പ്പെടുന്നവരാണ്. കേരളത്തില്‍ നിന്ന് മികച്ച താരത്തിന്റെ പട്ടികയിലേക്ക് ആണ്‍കുട്ടികളില്‍ ആരും പരിഗണിക്കപ്പെടാന്‍ സാധ്യത ഇല്ല.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.

Copyright @ 2022 , Rashtra Deepika Ltd.