കൊച്ചി രാജ്യാന്തര സൌഹൃദം: പലസ്തീനെത്തുന്നത് ഫുള്‍ബെഞ്ചുമായി
എം.ജി ലിജോ

കൊച്ചി: പലസ്തീനെ ചുളുവില്‍ അങ്ങ് തോല്പിച്ച് ഫിഫ റാങ്കിംഗില്‍ സ്ഥാനം മെച്ചപ്പെടുത്താമെന്ന ആഗ്രഹത്തിലാണ് ഇന്ത്യന്‍ ടീം. എന്നാല്‍, കൊച്ചിയില്‍ രാജ്യാന്തര സൌഹൃദമത്സരത്തിന് പാലസ്തീനെത്തുന്നത് തങ്ങളുടെ മികച്ച നിരയുമായിട്ടാണ്. യുദ്ധം തകര്‍ത്ത നാട്ടുകാരെ ഗോള്‍മഴയില്‍ മുക്കി വിജയത്തേരിലേറണമെങ്കില്‍ വിം കോവര്‍മാന്‍സിന്റെ കുട്ടികള്‍ നന്നായി വിയര്‍ക്കണമെന്നു പശ്ചിമേഷ്യന്‍ ടീമിന്റെ സമീപകാല പ്രകടനങ്ങള്‍ ചൂണ്ടിക്കാട്ടുന്നു. നിലവില്‍ ഫിഫ റാങ്കിംഗില്‍ 152ാമതാണ് പലസ്തീന്‍.

ആഫ്രിക്കന്‍ ലീഗുകളിലും യൂറോപ്പിലെ രണ്ടാംനിര ക്ളബുകളിലും പ്രതിഭ തെളിയിച്ച താരങ്ങളടങ്ങിയ ഒന്നാംനിര ടീമായാണ് അവര്‍ ഇന്ത്യയുമായി കൊമ്പുകോര്‍ക്കാനെത്തുന്നത്. കഴിഞ്ഞ ഡിസംബറില്‍ പശ്ചിമേഷ്യന്‍ ഫുട്ബോള്‍ ചാമ്പ്യന്‍ഷിപ്പില്‍ ഒമാനെതിരായ കളിച്ച ടീമിലെ മിക്കവരും കൊച്ചിയിലെത്തുന്നുണ്ട്. അവസാനം കളിച്ച അഞ്ചില്‍ മൂന്നു കളികളിലും തോല്‍വിയായിരുന്നു ഫലമെങ്കിലും റാങ്കിംഗില്‍ തങ്ങളെക്കാള്‍ മുന്നിലുള്ളവരുമായിട്ടായിരുന്നു അവരുടെ പോരാട്ടങ്ങളെല്ലാം എന്നതു ശ്രദ്ധിക്കേണ്ടതാണ്.

ആക്രമണത്തിലൂന്നിയതാണ് പലസ്തീനിയന്‍ രീതി. ദുര്‍ബലമായ പ്രതിരോധനിരയെ സംരക്ഷിക്കുന്നതിന്റെ ഭാഗംകൂടിയാണീ തന്ത്രം.4-2-3-1 ശൈലിയില്‍ കളിക്കുന്ന അവരുടെ ശക്തിയത്രയും എണ്ണയിട്ട യന്ത്രം പോലെ പ്രവര്‍ത്തിക്കുന്ന മധ്യനിരയാണ്. 40ലേറെ മത്സരങ്ങളുടെ അനുഭവസമ്പത്തുള്ള ഖാദിര്‍ യൂസഫ് നയിക്കുന്ന മധ്യനിരയില്‍ യുവതാരങ്ങളായ അബ്ദെല്‍ഹമീദ് അബുഹബീബും അബു ജാസറുമാകും ശ്രദ്ധകേന്ദ്രങ്ങളാകുക. 13 മത്സരങ്ങളില്‍ നിന്നും രണ്ട് ഗോളുകള്‍ നേടിയിട്ടുള്ള ഇരുപത്തിമൂന്നുകാരന്‍ അബ്ദെല്‍ഹമീദ് അബുഹബീബാകും ഇന്ത്യക്കു ഭീഷണി സൃഷ്ടിക്കാന്‍ സാധ്യതയേറെയുള്ളയാള്‍.

ഇവര്‍ക്കൊപ്പം രാജ്യത്തോടുള്ള സ്നേഹംകൊണ്ട് മാത്രം പലസ്തീന്റെ ഇളംപച്ച കുപ്പായമണിയുന്ന ഇമദ് സത്താറയെന്ന 28കാരനാണ് ഗോളടിക്കാരിലെ പ്രധാനി. സ്വീഡനില്‍ ജനിച്ചു വളര്‍ന്ന് അവിടത്തെ ലീഗില്‍ കളിക്കുന്ന സത്താറ പലസ്തീനുവേണ്ടി രാജ്യാന്തര മത്സരങ്ങളില്‍ മാത്രമാണ് ജേഴ്സിയണിയുന്നത്്. എട്ടുതവണ പലസ്തീന്‍ ജേഴ്സിയണിഞ്ഞിട്ടുള്ള സത്താറ 2004ല്‍ അരങ്ങേറ്റത്തില്‍ തന്നെ ഇറാക്കിനെതിരെ ഗോള്‍ നേടിയിരുന്നു. അറ്റാക്കിംഗ് മിഡ്ഫീല്‍ഡറുടെ റോളാണ് ടീമില്‍ സത്താറെയ്ക്കു നിര്‍വഹിക്കാനുള്ളത്. സത്താറയ്ക്ക് അതിവേഗം പന്തു കൈമാറുന്നതില്‍ ടീം വിജയിച്ചാല്‍ ഇന്ത്യന്‍ ഗോളി സുബ്രതോപാലിന് ഗോള്‍വലയ്ക്കു മുന്നില്‍ കാര്യമായി പണിയെടുക്കേണ്ടി വരും. പരിചയസമ്പത്തില്‍ പിന്നിലാണെങ്കില്‍ പാലസ്തീന്‍ ജേഴ്സിയില്‍ ടീം പുറത്തെടുക്കുന്ന ടീം സ്പിരിറ്റാണ് മറ്റുള്ളവരില്‍ നിന്നും ഇളംപച്ച ജേഴ്സിക്കാരെ വ്യത്യസ്തരാക്കുന്നത്.


എന്നാല്‍, രണ്ടടി മുന്നില്‍ നില്‍ക്കുന്ന മുന്നേറ്റനിരയ്ക്കൊത്ത പ്രകടനം നടത്താന്‍ താരതമ്യേന ദുര്‍ബലമായ പ്രതിരോധക്കാര്‍ക്ക് കഴിയുന്നില്ല. ഇത് അവരുടെ സമീപകാല മത്സരഫലത്തെ നിര്‍ണായകമായി ബാധിക്കുന്നുണ്ട്. പല മത്സരങ്ങളിലും ആദ്യം എതിര്‍വല കുലുക്കിയശേഷം പ്രതിരോധത്തിലെ പിഴവുകള്‍ മൂലം തോല്‍വിയേറ്റു വാങ്ങാനായിരുന്നു അവരുടെ വിധി. മത്സരപരിചയം കുറഞ്ഞ വെസ്റ് ബാങ്ക് ലീഗില്‍ കളിക്കുന്ന യുവനിരതന്നെയാണ് ഇന്ത്യക്കെതിരെയും പ്രതിരോധം തീര്‍ക്കുക.

എന്തുതന്നെയായാലും വെടിയുണ്ടകള്‍ക്കു മുന്നില്‍ കാല്പന്തുകളിയുടെ ആരവങ്ങള്‍ നിലയ്ക്കാത്ത പലസ്തീന്‍ കൊച്ചിയുടെ ഹൃദയം കവരുമെന്ന കാര്യത്തില്‍ സംശയമില്ല. ഇരുടീമുകളും ഫെബ്രുവരി മൂന്നിന് വൈകുന്നേരം കൊച്ചിയിലെത്തും. അന്ന് ഹോട്ടലില്‍ വിശ്രമിക്കുന്ന ടീമുകള്‍ പിറ്റേദിവസം രാവിലെയും വൈകുന്നേരവും പരിശീലനത്തിനിറങ്ങും. ആറിന് വൈകുന്നേരം 6.30നാണ് ഇന്ത്യ- പലസ്തീന്‍ മത്സരം. 2004 മേയ് 31നായിരുന്നു കൊച്ചി അവസാനമായി രാജ്യാന്തര ഫുട്ബോള്‍ മത്സരത്തിനു വേദിയായത്.