പഞ്ചാബ്- സര്‍വീസസ് സെമി
എസ്.ആര്‍. സുധീര്‍കുമാര്‍

കൊല്ലം: സന്തോഷ് ട്രോഫി രണ്ടാം സെമിയില്‍ പഞ്ചാബ് സര്‍വീസസിനെ നേരിടും. കൊല്ലത്ത് നടന്ന അവസാന ക്വാര്‍ട്ടര്‍ ലീഗ് മത്സരത്തില്‍ കര്‍ണാടകയെ മറുപടിയില്ലാത്ത രണ്ടു ഗോളുകള്‍ക്ക് പരാജയപ്പെടുത്തി പഞ്ചാബ് സെമിഫൈനലില്‍ പ്രവേശിച്ചു. കൊച്ചിയില്‍ നടന്ന മത്സരത്തില്‍ സര്‍വീസസ് ഒഡീഷയെ പരാജയപ്പെടുത്തി. ക്വാര്‍ട്ടറിലെ എല്ലാ മത്സരങ്ങളിലും ജയിച്ച പഞ്ചാബിന് ഒമ്പത് പോയിന്റുകള്‍ ലഭിച്ചു. മത്സരത്തിലുടനീളം വ്യക്തമായ ആധിപത്യം പുലര്‍ത്തിയാണ് പഞ്ചാബ് സെമിയിലെത്തിയത്.

11-ാം നമ്പര്‍ താരം പ്രേംകുമാറിന്റെ ഇരട്ട ഗോളാണ് (11,15) പഞ്ചാബിന് അനായാസ വിജയം സമ്മാനിച്ചത്. 11-ാം മിനിറ്റില്‍ മധ്യഭാഗത്തുനിന്ന് പ്രേംകുമാര്‍ തൊടുത്തുവിട്ട അളന്നുകുറിച്ച ഷോട്ട് ഗോളിയെ അമ്പരിപ്പിച്ച് ലാന്‍ഡ് ചെയ്തത് ഗോള്‍വലയില്‍.

15-ാം മിനിറ്റിലേതും ആദ്യഗോളിന്റെ തനിയാവര്‍ത്തനമായിരുന്നു. മധ്യനിരയില്‍ നിന്ന് തരന്‍ജിത്ത് സിംഗ് നല്‍കിയ മനോഹരമായ പാസ് നീളന്‍ അടിയിലൂടെ പ്രേംകുമാര്‍ വലചലിപ്പിച്ചു.കര്‍ണാടകയുടെ മുന്നേറ്റ നിരയിലെ എസ്.രാജേഷിനെയും വി.സ്റീഫനെയും നോട്ടപ്പുള്ളികളാക്കിയാണ് പഞ്ചാബ് കളിക്കാര്‍ പ്രതിരോധമൊരുക്കിയത്. പഞ്ചാബുകാരുടെ ഈ തന്ത്രത്തില്‍ കര്‍ണാടകയുടെ മുന്നേറ്റങ്ങളെല്ലം ലക്ഷ്യം കാണാതെ പോകുകയായിരുന്നു.


രണ്ടാംപകുതിയിലും കളിയില്‍ സമ്പൂര്‍ണ ആധിപത്യം പഞ്ചാബിനായിരുന്നു. അവസാന പത്ത് മിനിട്ടുകളില്‍ കര്‍ണാടക ഒറ്റപ്പെട്ട നല്ല നീക്കങ്ങള്‍ നടത്തിയെങ്കിലും അവയെല്ലാം നിഷ്ഫലമാകുകയായിരുന്നു. പഞ്ചാബിന്റെ പ്രേംകുമാറാണ് ഈ കളിയിലെ കേമനായി തെരഞ്ഞെടുക്കപ്പെട്ടത്.

ആദ്യത്തെ ആവേശകരമായ മത്സരത്തില്‍ മണിപ്പൂരിനെ രണ്ടിനെതിരേ നാല് ഗോളുകള്‍ക്ക് പശ്ചിമ ബംഗാള്‍ കീഴ്പ്പെടുത്തി. പുറത്തായ ടീമുകള്‍ തമ്മില്‍ നടന്ന ഈ മത്സരത്തില്‍ ആദ്യപകുതിയില്‍ മറുപടിയില്ലാത്ത രണ്ട് ഗോളുകള്‍ക്ക് പശ്ചിമബംഗാള്‍ മുന്നിലായിരുന്നു. ആദ്യപകുതിയുടെ നാലാം മിനിറ്റിലാണ് ബംഗാള്‍ ആദ്യഗോള്‍ സ്കോര്‍ ചെയ്തത്. ബാപി സാഹ നല്‍കിയ മനോഹരമായ പാസ് ജഗന്നാഥ് സാന നേരേ ഗോള്‍പോസ്റിലേക്ക് പായിച്ചു. ഗോള്‍കീപ്പര്‍ തടഞ്ഞ പന്ത് തിരികെ വന്നത് സാനതന്നെ കൃത്യമായ അടിയിലൂടെ ഗോളാക്കി മാറ്റുകയായിരുന്നു.