അതു മെയ്യപ്പന്‍ തന്നെ
അതു മെയ്യപ്പന്‍ തന്നെ
Saturday, October 25, 2014 10:43 PM IST
മുംബൈ: ഐപിഎല്‍ ഒത്തുകളിയില്‍ ചെന്നൈ സൂപ്പര്‍ കിംഗ്സ് ഉടമ ഗുരനാഥ് മെയ്യപ്പന്റെ പങ്കു വ്യക്തമാക്കുന്ന കൂടുതല്‍ തെളിവുകള്‍ പുറത്ത്. ഒത്തുകളിയുമായി ബന്ധപ്പെട്ടു മുംബൈ പോലീസ് ഹാജരാക്കിയ ഫോണ്‍ സംഭാഷണമടങ്ങിയ ടേപ്പിലെ ശബ്ദം മെയ്യപ്പന്റേതു തന്നെയാണെന്നു പരിശോധനയില്‍ തെളിഞ്ഞു. ടേപ്പു പരിശോധിച്ച മുംബൈയിലെ സെന്‍ട്രല്‍ ഫോറന്‍സിക് സയന്‍സ് ലബോറട്ടറിയാണ് ശബ്ദം ഗുരുനാഥ് മെയ്യപ്പന്റേതാണെന്ന് സ്ഥിരീകരിച്ചത്. ഐസിസി മുന്‍ ചെയര്‍മാന്‍ എന്‍. ശ്രീനിവാസന്റെ മരുമകനാണ് മെയ്യപ്പന്‍. ഒത്തുകളിക്ക് അറസ്റിലായ ചലച്ചിത്ര താരം വിന്ദു ധാരാസിംഗും മെയ്യപ്പനും സംസാരിച്ച ടേപ്പാണ് പരിശോധിച്ചത്. പരിശോധനാ റിപ്പോര്‍ട്ട് കേസ് അന്വേഷിക്കുന്ന മുദ്ഗല്‍ കമ്മിറ്റിക്ക് നല്‍കും. 30ന് മുദ്ഗല്‍ കമ്മിറ്റി അന്വേഷണ റിപ്പോര്‍ട്ട് സുപ്രീം കോടതിയില്‍ സമര്‍പ്പിക്കും.


മുംബൈ പോലീസ് കോടതിയില്‍ കുറ്റപത്രത്തോടൊപ്പം സമര്‍പ്പിച്ച ടേപ്പ് കൃത്രിമമാണെന്നായിരുന്നു മെയ്യപ്പന്റെയും വിന്ദുവിന്റെയും വാദം. ഇതേത്തുടര്‍ന്നാണ് ടേപ്പ് സെന്‍ട്രല്‍ ഫോറന്‍സിക് സയന്‍സ് ലബോറട്ടറിയില്‍ പരിശോധിക്കാന്‍ കോടതി ആവശ്യപ്പെട്ടത്. ചെന്നൈ സൂപ്പര്‍ കിംഗ്സിന്റെ സഹ ഉടമകൂടിയായ മെയപ്പന്‍ ടീം വിവരങ്ങള്‍ വാതുവയ്പുകര്‍ക്കു നല്‍കിയെന്നാണ് ആരോപണം.

മെയ്യപ്പനു പുറമേ വാതുവയ്പു കേസില്‍ അറസ്റിലായ മുഴുവന്‍ പേരുടെയും ശബ്ദസാമ്പിളുകള്‍ അവരുടേത് തന്നെയെന്ന് തെളിഞ്ഞതായും റിപ്പോര്‍ട്ടുണ്ട്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.