യൂറോപ്പ ലീഗ് ഫുട്ബോൾ : അത്‌ലറ്റിക്കോ, ആഴ്സണൽ, എസി മിലാൻ പ്രീക്വാർട്ടറിൽ : Deepika.com Sports News |

Click here for detailed news of all items

യൂറോപ്പ ലീഗ് ഫുട്ബോൾ : അത്‌ലറ്റിക്കോ, ആഴ്സണൽ, എസി മിലാൻ പ്രീക്വാർട്ടറിൽ

Saturday, February 24, 2018 12:54 AM IST

ലണ്ടൻ/മാഡ്രിഡ്: സ്പാനിഷ് ക്ലബ് അത്‌ലറ്റിക്കോ മാഡ്രിഡ്, ഇംഗ്ലണ്ടിൽനിന്നുള്ള ആഴ്സണൽ, ഇറ്റാലിയൻ സംഘം എസി മിലാൻ തുടങ്ങിയ ടീമുകൾ യൂറോപ്പ ലീഗ് ഫുട്ബോൾ പ്രീക്വാർട്ടറിൽ പ്രവേശിച്ചു. രണ്ടാംപാദ മത്സരത്തിൽ സ്വന്തം തട്ടകത്തിൽവച്ച് 2-1നു പരാജയപ്പെട്ടെങ്കിലും ആദ്യ പാദത്തിലെ ജയത്തിന്‍റെ ബലത്തിലാണ് ആഴ്സണൽ പ്രീക്വാർട്ടർ കണ്ടത്.

സ്വീഡിഷ് ക്ലബ് ഓസ്റ്റർസണ്ട്സിനോടാണ് രണ്ടാം പാദ മത്സരത്തിൽ ആഴ്സണൽ പരാജയപ്പെട്ടത്. സ്വീഡനിൽവച്ച് നടന്ന ആദ്യ പാദത്തിൽ ഗണ്ണേഴ്സ് 3-0നു വിജയിച്ചിരുന്നു. ഇരു പാദങ്ങളിലുമായി 4-2ന്‍റെ മുൻതൂക്കത്തോടെ ആഴ്സണൽ പ്രീക്വാർട്ടറിലേക്ക് മുന്നേറുകയും ചെയ്തു. ഓസ്റ്റർസണ്ട്സിനായി ഹൊസൻ ആയിഷ് (22 മിനിറ്റ്), കെൻ സെമ (23 മിനിറ്റ്) എന്നിവരാണ് ഗോൾ നേടിയത്. 47-ാം മിനിറ്റിൽ സീഡ് കൊലാസിനാകിലൂടെ ആഴ്സണൽ ഒരു ഗോൾ മടക്കി.

കെവിൻ ഗെമീറോ ഏഴാം മിനിറ്റിൽ നേടിയ ഗോളിൽ രണ്ടാം പാദത്തിൽ അത്‌ലറ്റിക്കോ മാഡ്രിഡ് 1-0ന് ഡെന്മാർക്കിൽനിന്നുള്ള എഫ്സി കോപ്പൻഹെഗനെ പരാജയപ്പെടുത്തി. ഇതോടെ ഇരു പാദങ്ങളിലുമായി 5-1ന്‍റെ ജയത്തോടെ സ്പാനിഷ് ക്ലബ് പ്രീക്വാർട്ടറിൽ കടന്നു.

രണ്ടാം പാദത്തിൽ ബൾഗേറിയൻ ക്ലബ് ലുഡൊഗോറെറ്റ്സിനെതിരേ 1-0നു ജയിച്ചാണ് എസി മിലാൻ പ്രീക്വാർട്ടറിൽ കടന്നത്. ആദ്യ പാദത്തിൽ 3-0ന് ഇറ്റാലിയൻ സംഘം ജയിച്ചിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.