ഹാദിയ കേസിൽ എൻഐഎ അന്വേഷണം ആവശ്യമില്ലെന്ന് സംസ്ഥാന സർക്കാർ
Saturday, October 7, 2017 9:35 AM IST
ന്യൂഡൽഹി: മതംമാറി വിവാഹിതയായ ഹാദിയ (അഖില) കേസിൽ എൻഐഎ അന്വേഷണം നടത്തേണ്ട ആവശ്യമില്ലെന്ന് സംസ്ഥാന സർക്കാർ സുപ്രീംകോടതിയിൽ സത്യവാങ്മൂലം നൽകി. എൻഐഎ അന്വേഷിക്കേണ്ട കുറ്റങ്ങളൊന്നും സംഭവത്തിൽ കണ്ടെത്തിയിട്ടില്ല. കേസിൽ ക്രൈംബ്രാഞ്ച് വസ്തുനിഷ്ഠമായ അന്വേഷണം നടത്തിയിരുന്നുവെന്നും എൻഐഎ അന്വേഷണം ആവശ്യമായിരുന്നുവെങ്കിൽ കോടതിയെ അറിയിക്കുമായിരുന്നുവെന്നും സർക്കാർ സത്യവാങ്മൂലത്തിൽ വ്യക്തമാക്കിയിട്ടുണ്ട്.

കേസ് തിങ്കളാഴ്ച വീണ്ടും പരിഗണിക്കാനിരിക്കേയാണ് സർക്കാർ നിലപാട് സുപ്രീംകോടതിയെ അറിയിച്ചത്. കേസുമായി ബന്ധപ്പെട്ട് മതംമാറ്റം, വിവാഹം, ഷെഫിൻ ജെഹാനുമായി ബന്ധപ്പെട്ട വിവരങ്ങൾ എല്ലാം ക്രൈംബ്രാഞ്ച് അന്വേഷിച്ചിരുന്നു. എന്നാൽ തീവ്രവാദ സ്വഭാവമുള്ള ഒന്നും കണ്ടെത്തിയില്ലെന്നും സർക്കാർ വ്യക്തമാക്കുന്നു.

ലൗ ജിഹാദ് പോലെ തീവ്രവാദ സ്വഭാവമുള്ള കാര്യങ്ങൾ കേസിന് പിന്നിലുണ്ടോ എന്ന് അന്വേഷിക്കണമെന്ന് ഹാദിയയുടെ (അഖില) പിതാവ് അശോകൻ കോടതിയിൽ ആവശ്യപ്പെട്ടിരുന്നു. എൻഐഎ അന്വേഷണം വേണമെന്ന നിലപാടാണ് കേന്ദ്രസർക്കാരും സ്വീകരിച്ചത്. ആദ്യ ഘട്ടത്തിൽ സംസ്ഥാന സർക്കാർ ഈ തീരുമാനത്തെ എതിർത്തിരുന്നില്ല. കേസ് വീണ്ടും കോടതിയുടെ പരിഗണനയ്ക്ക് വന്നപ്പോഴാണ് സംസ്ഥാന സർക്കാർ എൻഐഎ അന്വേഷണം ആവശ്യമില്ലെന്ന നിലപാട് സ്വീകരിച്ചത്. സർക്കാർ സത്യവാങ്മൂലം കേസിൽ ഇനി നിർണായകമാകാനും സാധ്യതയുണ്ട്.
RELATED NEWS
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.