പശ്ചിമേഷ്യയില്‍ മിസൈലുകള്‍ വീണ്ടും തീ തുപ്പുമ്പോള്‍ ഭീതിയുടെ നിഴലില്‍ മലയാളി സമൂഹം
Saturday, November 17, 2012 8:41 AM IST
ടെല്‍അവീവ്: തലയ്ക്കു മുകളിലൂടെ തീതുപ്പി പായുന്ന മിസൈലുകള്‍... നടുക്കം പകര്‍ന്നു മുഴങ്ങുന്ന സൈറനുകള്‍.. ഇരമ്പിനീങ്ങുന്ന സൈനിക വാഹനങ്ങള്‍... ഇസ്രയേലും പലസ്തീനും തമ്മിലുള്ള സംഘര്‍ഷം വീണ്ടും ശക്തമാകുമ്പോള്‍ പേടിച്ചരണ്ടു കഴിയുകയാണ് ഇസ്രയേലിലെ മലയാളികള്‍. നൂറുകണക്കിനു മലയാളികളാണ് ഇസ്രയേലില്‍ ഇപ്പോള്‍ ജോലി ചെയ്യുന്നത്. കൂടുതലും നഴ്സിംഗ് ജോലിക്കായി എത്തിയിരിക്കുന്ന സ്ത്രീകള്‍.

ആകാശത്തുകൂടി കുതിച്ചുപായുന്ന മിസൈലുകള്‍ കണ്ടു നടുങ്ങിവിറയ്ക്കുമ്പോള്‍ ശരിക്ക് ഉറങ്ങാന്‍കൂടി കഴിയുന്നില്ലെന്നു പിറവം സ്വദേശിനിയായ ഷൈനി സാബു 'ദീപിക'യോടു പറഞ്ഞു. എവിടെയും യുദ്ധത്തിന്റെ പ്രതീതിയായതോടെ കടുത്ത ആശങ്കയിലാണ് മലയാളിസമൂഹം. കോട്ടയം കല്ലറ സ്വദേശിനി മിനിമോള്‍, തൊടുപുഴ സ്വദേശിനി ലിജി ജയിംസ്, കൊല്ലം സ്വദേശി സുനില്‍, കോട്ടയം സ്വദേശിനി ജോമോള്‍, വയനാട് സ്വദേശി ജോണി എന്നിവരെല്ലാം ദീപികയുമായി ആശങ്കകള്‍ പങ്കുവച്ചു. കെയര്‍ ഗിവര്‍ വീസയില്‍ നഴ്സിംഗ് ജോലിക്ക് എത്തിയവരാണ് ഇവരില്‍ ഏറെയും. ഏറെക്കാലമായി ശാന്തമായിരുന്ന പിശ്ചിമേഷ്യയില്‍ വീണ്ടും യുദ്ധകാഹളം മുഴങ്ങിയതോടെ ഇവരുടെ ജീവിതം അശാന്തിയിലേക്കു വഴുതിയിരിക്കുകയാണ്. കേരളത്തിന്റെ എല്ലാ ഭാഗത്തുനിന്നുള്ളവരും ഇസ്രായേലില്‍ ജോലി ചെയ്യുന്നുണ്ട്.

ഗാസയില്‍നിന്നു മിസൈലുകള്‍ കുതിച്ചുയരുമ്പോള്‍ത്തന്നെ അപായ സൈറന്‍ മുഴങ്ങും. അതു കേള്‍ക്കുമ്പോള്‍ ശരീരമാകെ ഒരു വിറയല്‍ പടര്‍ന്നു കയറുന്നതായി തോന്നുമെന്ന് മലയാളികള്‍ പറയുന്നു. യുദ്ധം പരിചിതമായ ജനതയാണ് ഇസ്രയേലില്‍ ഉള്ളതെന്നതിനാല്‍ യുദ്ധസാഹചര്യങ്ങളെ നേരിടാനുള്ള എല്ലാ സംവിധാനം അവിടെയുണ്ട്. മിക്ക വീടുകളിലും സ്ഥാപനങ്ങളിലും മിസൈല്‍ ആക്രമണം പോലുള്ളവയില്‍നിന്നു രക്ഷപ്പെടാനുള്ള ഭൂഗര്‍ഭ അറകളും സുരക്ഷിതസ്ഥാനങ്ങളുമുണ്ട്. അപായസൈറന്‍ മുഴങ്ങുമ്പോള്‍ തന്നെ ഇസ്രേലികള്‍ ഈ അറകളിലേക്കും സുരക്ഷിതസ്ഥാനങ്ങളിലേക്കും മാറും. എന്നാല്‍, നഴ്സിംഗ് ജോലികളിലും മറ്റും ഏര്‍പ്പെട്ടിരിക്കുന്നവര്‍ക്കു പലപ്പോഴും ഇതിനുള്ള സാഹചര്യം ലഭിക്കുന്നില്ലെന്നു മലയാളികള്‍ പറയുന്നു. കെയര്‍ ഗീവര്‍ വീസയില്‍ ഇസ്രയേലില്‍ എത്തുന്നവരിലേറെപ്പേര്‍ക്കും വീടുകളിലാണു നഴ്സിംഗ് ജോലികളുള്ളത്. ഇങ്ങനെ ജോലി ചെയ്യുന്നവരാണ് ഏറെ ആശങ്കയിലായിരിക്കുന്നത്. ഗാസയോടു ചേര്‍ന്നു കിടക്കുന്ന മേഖലയിലുള്ളവരാണ് ഏറെ ഭീതിയിലായിരിക്കുന്നത്. ഗാസയില്‍നിന്ന് 40 കിലോമീറ്റര്‍ മാത്രം അകലെയുള്ള ബീര്‍ഷേവയിലെ മലയാളികളാണു ദീപികയുമായി ടെലിഫോണില്‍ ആശങ്കകള്‍ പങ്കുവച്ചത്.

പലസ്തീനിലെ ഗാസയില്‍നിന്നു ഹമാസിന്റെ മിസൈലുകള്‍ പറന്നുയരുമ്പോള്‍ തന്നെ ഇസ്രയേലിന്റെ പ്രതിരോധ സംവിധാനം അതു തിരിച്ചറിയുകയും മിസൈലിനെ ആകാശത്തുവച്ചു തന്നെ തകര്‍ത്തു കളയുകയുമാണു ചെയ്യുന്നത്. എങ്കിലും തുടരെ മിസൈലുകള്‍ വരുമ്പോള്‍ ഇതു നൂറുശതമാനവും ഫലപ്രദമാകുമെന്നു കരുതാനാവില്ലത്രേ. കഴിഞ്ഞ ദിവസം ഒരു മലയാളി നഴ്സ് ജോലി ചെയ്തിരുന്ന വീടിന്റെ വളപ്പിലേക്കു മിസൈല്‍ വന്നു പതിച്ചു. വീട്ടുവളപ്പില്‍ പാര്‍ക്കു ചെയ്തിരുന്ന കാര്‍ ഈ ആക്രമണത്തില്‍ തകര്‍ന്നു തരിപ്പണമായി. ഇതോടെയാണു മലയാളികള്‍ കൂടുതല്‍ ആശങ്കയിലായത്. സ്ഥാപനങ്ങളും കടകളും മിക്കതും അടഞ്ഞുകിടക്കുകയാണ്.

പോരാട്ടം രൂക്ഷമായാല്‍ നാട്ടിലേക്കു മടങ്ങേണ്ടി വരുമെന്നാണ് ഇവരുടെ ആശങ്ക. എന്നാല്‍, ഇസ്രയേലിലെ വീസാ നിയമപ്രകാരം ഇങ്ങനെ അവധിയെടുത്തു പോന്നാല്‍ പിന്നീടു തിരികെ വന്നു ജോലിയില്‍ കയറാന്‍ കഴിയുമെന്ന് ഉറപ്പില്ലെന്നും ഇവര്‍ പറയുന്നു. പലരും ലക്ഷങ്ങള്‍ മുടക്കിയാണു ജോലിക്കെത്തിയിരിക്കുന്നത്. അതിനാല്‍ തന്നെ എന്തു ചെയ്യണമെന്നറിയാത്ത അവസ്ഥയിലാണു പലരും. സംഘര്‍ഷത്തിന്റെ വിവരങ്ങള്‍ പുറത്തുവന്നതോടെ നാട്ടിലെ ബന്ധുക്കളില്‍ പലരും ഇവരുമായി ബന്ധപ്പെടുന്നുണ്ട്.