ഗാസയില്‍ വ്യോമാക്രമണം തുടരുന്നു; മരണം 48 ആയി
Sunday, November 18, 2012 8:20 AM IST
ഗാസ: പശ്ചിമേഷ്യയെ വീണ്ടും യുദ്ധഭീതിയിലാക്കി കഴിഞ്ഞ നാലു ദിവസമായി തുടരുന്ന ഇസ്രയേല്‍ - പലസ്തീന്‍ പോരാട്ടം രൂക്ഷമായി. ഗാസാസിറ്റിയിലെ മാധ്യമ സെന്ററിനു സമീപം ഇസ്രയേല്‍ നടത്തിയ വ്യോമാക്രമണത്തില്‍ ആറു പലസ്തീന്‍ മാധ്യമപ്രവര്‍ത്തകര്‍ക്കു ഗുരുതരമായി പരിക്കേറ്റു. വടക്കന്‍ ഗാസാ മുനമ്പില്‍ ഇസ്രയേല്‍ നടത്തിയ ബോംബാക്രമണത്തില്‍ ഏഴു പലസ്തീന്‍കാര്‍ കൂടി കൊല്ലപ്പെട്ടതായി റിപ്പോര്‍ട്ടുണ്ട്. ഇതോടെ കഴിഞ്ഞ നാലു ദിവസമായി തുടരുന്ന സംഘര്‍ഷത്തില്‍ മരണം 48 ആയി. ഇതില്‍ പിഞ്ചുകുട്ടികളും സ്ത്രീകളും ഉള്‍പ്പെടും.

ഇസ്രയേല്‍ വ്യോമാക്രമണം ശക്തമാക്കിയതിനോടൊപ്പം കടലില്‍ നിന്നും ഗാസയിലേയ്ക്കു മിസൈല്‍ ആക്രമണം ആരംഭിച്ചു. ഹമാസിന്റെ ഗാസയിലെ നൂറുകണക്കിനു താവളങ്ങളില്‍ ഇടവിടാതെ ആക്രമണം തുടരുമെന്ന് ഇസ്രയേല്‍ വ്യക്തമാക്കി കഴിഞ്ഞു. ഇതിനിടെ ഹമാസിനൊപ്പം മറ്റൊരു തീവ്രവാദ സംഘടന കൂടി ഗാസയില്‍ നിന്നു ഇസ്രയേല്‍ ലക്ഷ്യമാക്കി ആക്രമണം തുടങ്ങിയിട്ടുണ്ട്. അനുനയശ്രമങ്ങള്‍ പാളുകയും ഹമാസ് തീവ്രവാദികള്‍ റോക്കറ്റാക്രമണം തുടരുകയും ചെയ്തതോടെ ഗാസ മുനമ്പില്‍ ഇസ്രയേല്‍ ആക്രമണം ശക്തമാക്കിയിരിക്കുകയാണ്. ഗാസ പിടിച്ചെടുക്കാനുള്ള തന്ത്രങ്ങള്‍ക്കാണ് ഇസ്രേലി സൈന്യം രൂപം നല്കിയിട്ടുള്ളതെന്ന് റിപ്പോര്‍ട്ടുണ്ട്. കരയുദ്ധത്തിനു തയാറെടുത്തു ഗാസ അതിര്‍ത്തിയിലേക്കു വന്‍തോതിലാണ് ഇസ്രയേല്‍ പടയൊരുക്കം നടത്തിയിട്ടുള്ളത്. ഇതിനായി 75,000 റിസര്‍വ് ഭടന്മാരെയാണു ഗാസ അതിര്‍ത്തിയില്‍ സജ്ജമാക്കി നിര്‍ത്തിയിരിക്കുന്നത്. സംഘര്‍ഷം മൂര്‍ച്ഛിച്ച സാഹചര്യത്തില്‍ അറബ് നേതാക്കള്‍ ഗാസയില്‍ അടിയന്തര സന്ദര്‍ശനം നടത്തുമെന്ന് അറിയിച്ചു.

ഗാസയില്‍ ഭരണം നടത്തുന്ന ഹമാസിന്റെ ആസ്ഥാനത്തിനുനേര്‍ക്കും ഇന്നലെ വ്യോമാക്രമണമുണ്ടായി. പ്രധാനമന്ത്രി ഇസ്മയില്‍ ഹനിയയുടെ ഓഫീസും നഗരത്തിലെ വൈദ്യുതവിതരണശൃംഖലയും വ്യോമാക്രമണത്തില്‍ തകര്‍ത്തു. പ്രധാനമന്ത്രിയുടെ ഓഫീസ് മന്ദിരത്തിനുനേര്‍ക്ക് അഞ്ചു മിസൈലുകളാണു പതിച്ചത്. കെട്ടിടം പൂര്‍ണമായി തകര്‍ന്നു. ഇതോടെ നഗരജീവിതം ദുഃസഹമായിരിക്കുകയാണ്. ഇസ്രയേലിന്റെ വാണിജ്യനഗരമായ ടെല്‍ അവീവില്‍ ഹമാസ് ഇന്നലെയും നിരവധി തവണ റോക്കറ്റാക്രമണം നടത്തി. ഗാസ നഗരത്തില്‍ ഇന്നലെയും നിരവധി സ്ഫോടനങ്ങളുണ്ടായി. ലോകത്തില്‍ ഏറ്റവും കൂടുതല്‍ ജനങ്ങള്‍ തിങ്ങിപ്പാര്‍ക്കുന്ന സ്ഥലമെന്നറിയപ്പെടുന്ന ഗാസ നഗരത്തിനു തെക്കുള്ള ജബാലിയ അഭയാര്‍ഥിക്യാമ്പിലും ആക്രമണമുണ്ടായി. ആക്രമണത്തില്‍ കുട്ടികളുള്‍പ്പെടെ 30 പേര്‍ക്കു ഗുരുതരമായി പരിക്കേറ്റു. ജബാലിയയില്‍ ഹമാസിന്റെ പ്രമുഖ നേതാവിന്റെ വീടിനുനേര്‍ക്കു വ്യോമാക്രമണമുണ്ടായി.