ഗാസയില്‍ ഇസ്രയേല്‍ ആക്രമണത്തില്‍ റഷ്യന്‍ ടിവി ഓഫീസ് തകര്‍ന്നു
Sunday, November 18, 2012 9:31 PM IST
മോസ്കോ: ഗാസാ മുനമ്പില്‍ ഇസ്രയേല്‍ വ്യോമസേന നടത്തിയ ആക്രമണത്തില്‍ റഷ്യന്‍ ടെലിവിഷന്‍ ചാനല്‍ ഓഫീസ് തകര്‍ന്നു. റഷ്യ ടുഡേ ടിവി ചാനലിന്റെ ഓഫീസ് കെട്ടിടമാണ് ബോംബാക്രമണത്തില്‍ തകര്‍ന്നത്. സംഭവത്തില്‍ ആളപായമുള്ളതായി റിപ്പോര്‍ട്ടില്ല. വ്യോമാക്രമണത്തിനു ഒരു മണിക്കൂര്‍ മുമ്പ് തന്നെ ചാനല്‍ കെട്ടിടത്തില്‍ നിന്നു ജീവനക്കാരെ പലസ്തീന്‍ അധികൃതര്‍ ഒഴിപ്പിച്ചിരുന്നു.

പലസ്തീനിയന്‍ വാര്‍ത്താ ഏജന്‍സികളും ബ്രിട്ടന്‍, ഇറ്റലി, ജര്‍മന്‍, കുവൈറ്റ് തുടങ്ങിയ രാജ്യങ്ങളുടെ ടെലിവിഷന്‍ ചാനലുകളും പ്രവര്‍ത്തിക്കുന്ന മേഖലയിലാണ് ആക്രമണം നടന്നത്. ഞായറാഴ്ച രാവിലെ ഗാസാസിറ്റിയിലെ റിമാലിനു സമീപം ഇസ്രയേല്‍ നടത്തിയ ഷെല്ലാക്രമണത്തില്‍ ആറു പലസ്തീന്‍ മാധ്യമപ്രവര്‍ത്തകര്‍ക്കു പരിക്കേറ്റിരുന്നു. ഇതിനിടെ കനത്ത ആക്രമണം നടക്കുന്ന ഗാസാ മുനമ്പിലെ ജനങ്ങള്‍ക്ക് സഹായം എത്തിക്കുന്നതിനു പലസ്തീന്‍ സന്നദ്ധ പ്രവര്‍ത്തകര്‍ക്ക് സമയം അനുവദിക്കുമെന്ന് ഇസ്രയേല്‍ അറിയിച്ചു.