സാക്ഷരതാ പ്രവര്‍ത്തനം താഴേത്തട്ടില്‍ നിന്നാരംഭിക്കണം: പി.കെ. ജയലക്ഷ്മി
Monday, November 19, 2012 3:07 AM IST
കല്പറ്റ: പട്ടികവര്‍ഗ വിഭാഗക്കാര്‍ ധാരാളമുള്ള ജില്ലയിലെ സാക്ഷരതാ നിലവാരം സംസ്ഥാന ശരാശരിയേക്കാള്‍ കുറവാണ്. അതിനാല്‍ ഏറ്റവും താഴേ ത്തട്ടില്‍ നിന്നാരംഭിച്ച് നാലാംതരവും ഏഴാംതരവും പത്താംതരവും പിന്നിട്ട് മികച്ച അറിവിന്റെ ഉടമകളായി എല്ലാവരും മാറുന്നവിധത്തില്‍ സാക്ഷരതാ പ്രവര്‍ത്തനം മാറണമെന്ന് മന്ത്രി പി.കെ. ജയലക്ഷ്മി പറഞ്ഞു. സാക്ഷരതാമിഷന്റെ ജില്ലയിലെ പത്താംതരം തുല്യതാ കോഴ്സിന്റെ ഏഴാം ബാച്ച് പഠന പരിപാടിയുടെ ഔപചാരിക ഉദ്ഘാടനം കല്പറ്റ മുന്‍സിപ്പല്‍ ടൌണ്‍ഹാളില്‍ നിര്‍വഹിച്ച് പ്രസംഗിക്കുകയായിരുന്നു മന്ത്രി.

1,817 പേരാണ് ഇത്തവണ പത്താംതരം തുല്യതാ പഠനത്തിന് ജില്ലയില്‍ രജിസ്റര്‍ ചെയ്തത്. രണ്ടാം ശനിയാഴ്ചയിലും ഞായറാഴ്ചകളിലുമായാണ് ക്ളാസ് നടക്കുക. പത്താംതരം തുല്യതാ കോഴ്സ് കഴിഞ്ഞ് പരീക്ഷ വിജയിക്കുന്നവര്‍ക്ക് സാധാരണ രീതിയില്‍ പത്താംക്ളാസ് കഴിയുന്നതിന്റെ പ്രയോജനം തന്നെയുണ്ടാകും. 22 വയസിന് താഴെ പ്രായമുള്ളവരാണെങ്കില്‍ സ്കൂളുകളില്‍ പ്ളസ്ടുവിന് ചേര്‍ന്ന് പഠനം തുടരാം. പ്രായം കൂടുതലുള്ളവര്‍ക്ക് ഓപ്പണ്‍സ്കൂള്‍ വിദ്യാഭ്യാസം സാധ്യമാണ്.

നാലാംതരം, ഏഴാംതരം തുല്യതാ ബാച്ചുകളുടെ ഉദ്ഘാടനം കല്പറ്റ ബ്ളോക്ക് പഞ്ചായത്ത് പ്രസിഡന്റ് സലീംമേമന നിര്‍വഹിച്ചു. കല്പറ്റ മുന്‍സിപ്പല്‍ ചെയര്‍മാന്‍ എ.പി. ഹമീദ് അധ്യക്ഷത വഹിച്ചു. സാക്ഷരതാ പ്രവര്‍ത്തനത്തില്‍ മികച്ച പ്രവര്‍ത്തനം കാഴ്ചവച്ചവരെ മന്ത്രി ആദരിച്ചു. സംസ്ഥാന സാക്ഷരതാ മിഷന്‍ എക്സിക്യുട്ടീവ് കമ്മിറ്റി അംഗം കെ.എം. റഷീദ്, വാര്‍ഡ് കൌണ്‍സിലര്‍ എം.കെ.ശിവര്‍, ചന്ദ്രന്‍ കെനാത്തി തുടങ്ങിയവര്‍ പ്രസംഗിച്ചു.