രണ്ടു കന്യാസ്ത്രീകളെ കൊല്ലപ്പെട്ട നിലയിൽ കണ്ടെത്തി
Friday, August 26, 2016 2:15 AM IST
ജാക്സൺ: അമേരിക്കയിൽ രണ്ടു കന്യാസ്ത്രീകളെ കൊല്ലപ്പെട്ട നിലയിൽ കണ്ടെത്തി. സി. പോൾ മെർലി, സി. മാർഗരറ്റ് ഹെൾഡ് എന്നിവരെയാണ് മരിച്ച നിലയിൽ കണ്ടെത്തിയത്. ഇരുവരും 30 വർഷമായി മിസിസിപ്പിയിൽ നഴ്സുമാരായി ജോലി ചെയ്യുകയാണ്. ഇരുവരും വ്യാഴാഴ്ച പതിവു സമയത്ത് ജോലിക്ക് വരാതിരുന്നതിനെത്തുടർന്ന് അധികൃതർ പോലീസിൽ വിവരമറിയിക്കുകയായിരുന്നു. പോലീസാണ് വീട്ടിൽ മൃതദേഹങ്ങൾ കണ്ടെത്തിയത്. മോഷണ ശ്രമത്തിനിടെയാണ് ഇരുവരും കൊല്ലപ്പെട്ടതെന്നാണ് പോലീസ് പറയുന്നത്. വെടിയേറ്റല്ല ഇരുവരും മരിച്ചതെന്ന് പറഞ്ഞ പോലീസ് മരണ കാരണം പുറത്തുവിട്ടിട്ടില്ല.

കന്യസ്ത്രീമാർ ഉപയോഗിച്ചിരുന്ന കാർ വീട്ടിൽ നിന്ന് കാണാതായിരുന്നു. പിന്നീട് ഇത് സംഭവസ്‌ഥലത്തു നിന്നു ഒരു മൈൽ അകലെ ഉപേക്ഷിച്ച നിലയിൽ കണ്ടെത്തി. മിസിസിപ്പിയിലെ പാവപ്പെട്ടവർക്കായി സഭ നടത്തുന്ന ക്ലിനിക്കിലായിരുന്നു ഇരുവരും ജോലി ചെയ്തിരുന്നത്. സി. പോൾ സിസ്റ്റേഴ്സ് ഓഫ് ചാരിറ്റി ഓഫ് നസ്രത് സഭാംഗവും സി. മാർഗരറ്റ് സ്കൂൾ ഓഫ് സിസ്റ്റേഴ്സ് ഓഫ് സെന്റ് ഫ്രാൻസിസ് സഭാംഗവുമാണ്. സംഭവത്തെക്കുറിച്ച് അന്വേഷണം നടക്കുന്നതായി പോലീസ് പറഞ്ഞു.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.