ശബരിമലയിലെ സ്ത്രീ പ്രവേശനം സർക്കാർ ഉറപ്പാക്കണമെന്ന് പി.കെ. ശ്രീമതി
Friday, August 26, 2016 4:29 PM IST
തിരുവനന്തപുരം: ശബരിമലയിൽ പോകാൻ താത്പര്യമുളള സ്ത്രീകളുടെ പ്രവേശനം സംസ്‌ഥാന സർക്കാർ ഉറപ്പാക്കണമെന്ന് പി.കെ. ശ്രീമതി എംപി. പ്രായഭേദമെന്യേ വിശ്വാസികളും അവിശ്വാസികളുമായ സ്ത്രീകൾക്കു ശബരിമലയിൽ പ്രവേശനം ഉറപ്പാക്കേണ്ടതു ജനാധിപത്യ സർക്കാരിന്റെ ഉത്തരവാദിത്വമാണെന്നും അവർ അഭിപ്രായപ്പെട്ടു. തിരുവനന്തപുരം വിമൻസ് കോളജിൽ വനിതാസാഹിതി സംസ്‌ഥാന കമ്മിറ്റിയും മാതൃകം ജില്ലാ കമ്മിറ്റിയും സംയുക്‌തമായി സംഘടിപ്പിച്ച സംവാദം ഉദ്ഘാടനം ചെയ്യുകയായിരുന്നു എംപി.

മഹാരാഷ്ട്രയിലെ ഹാജി അലി ദർഗയിൽ സ്ത്രീപ്രവേശനം അനുവദിച്ച മുംബൈ ഹൈക്കോടതി വിധി സ്ത്രീകളുടെ അവകാശങ്ങൾക്കു വേണ്ടി പോരാടുന്നവർക്കുള്ള ഊർജമാണ്. ആരാധനാലയങ്ങളിലെ സ്ത്രീപ്രവേശനം കേവലം വിശ്വാസികളും അവിശ്വാസികളും തമ്മിലുള്ള തർക്കമല്ല. ഇന്ത്യൻ ഭരണഘടന ഉറപ്പുനൽകുന്ന അവകാശങ്ങൾ സ്ത്രീകൾക്കു നിഷേധിക്കുന്നതിന്റെ ഉദാഹരണമാണ്. ആരാധനാലയങ്ങളിലെ സ്ത്രീപ്രവേശനം വിലക്കിയുള്ള ഒരു ലിഖിതനിയമവും ഇന്ത്യയിൽ നിലവിലില്ല. ശബരിമലയിൽ സ്ത്രീകൾ പ്രവേശിക്കരുതെന്നു പറയാൻ ദേവസ്വം പ്രസിഡന്റിനോ ക്ഷേത്ര തന്ത്രിക്കോ അവകാശമില്ലെന്നും പി.കെ. ശ്രീമതി പറഞ്ഞു.

വി.എസ്. സർക്കാരിന്റെ കാലത്ത് ശബരിമലയിലെ സ്ത്രീപ്രവേശനത്തിനു സർക്കാർ അനുകൂല സത്യവാങ്മൂലം സമർപ്പിച്ചിരുന്നു. എന്നാൽ, തുടർന്നുവന്ന സർക്കാർ അതിനെ കേവലം വ്യക്‌തിപരമായ അഭിപ്രായങ്ങളായാണ് പരിഗണിച്ചത്. ഭരണഘടനാപരമായ അഭിപ്രായങ്ങൾ മനസിലാക്കി വേണം സർക്കാരുകൾ കോടതിയിൽ അഭിപ്രായം പറയാൻ. ഇപ്പോൾ കോടതിയുടെ പരിഗണനയിലുള്ള സ്ത്രീപ്രവേശന വിഷയത്തിൽ കോടതിയും സ്ത്രീപക്ഷത്തു നിന്നുള്ള വിധിയാകും പുറപ്പെടുവിക്കുകയെന്നും അവർ പറഞ്ഞു.