ട്രംപ് ജൂനിയർ ഇന്ന് ഇന്ത്യയിലെത്തും
Monday, February 19, 2018 7:32 AM IST
ന്യൂഡൽഹി: അമേരിക്കൻ പ്രസിഡന്‍റ് ഡോണൾഡ് ട്രംപിന്‍റെ മകൻ ട്രംപ് ജൂനിയർ ഇന്ന് ഇന്ത്യയിലെത്തും. റിയൽ എസ്റ്റേറ്റ് വ്യവസായത്തിന്‍റെ ഭാഗമായാണ് അദ്ദേഹം രാജ്യതലസ്ഥാനത്ത് എത്തുന്നത്. 1500 കോടിയുടെ റിയൽ എസ്റ്റേറ്റ് വ്യവസായത്തിലാണ് ട്രംപ് ജൂനിയർ പങ്കാളിയാകുന്നത്.

ട്രംപ് ജൂനിയർ മുതൽമുടക്കുന്ന ആഡംബര ഫ്ലാറ്റ് സമുച്ചയത്തിൽ ഫ്ലാറ്റ് ബുക്ക് ചെയ്യുന്നവർക്ക് അദ്ദേഹത്തിനൊപ്പം അത്താഴവിരുന്നിനുള്ള അവസരവും ഒരുക്കിയിട്ടുണ്ട്. ഒൻപത് കോടി രൂപയാണ് ഒരു ഫ്ലാറ്റിന്‍റെ വില. ഹരിയാനയിലെ ഗുഡ്ഗാവിലാണ് ട്രംപ് ടവർ എന്ന് പോരിട്ടിരിക്കുന്ന രണ്ട് ഫ്ലാറ്റ് സമുച്ചയങ്ങൾ പണിയുന്നത്. 47 നിലകളുള്ള രണ്ട് സമുച്ചയങ്ങളിലുമായി 145 ഫ്ലാറ്റുകളാണ് ഉള്ളത്.

ഇന്ത്യയിലെ മറ്റ് നഗരങ്ങളിലും ട്രംപ് ജൂനിയർ റിയൽ എസ്റ്റേറ്റ് ബിസിനസിൽ പങ്കാളിയാകുമെന്നാണ് വിവരം. അദ്ദേഹം എത്തുന്നതിനു മുന്നേ അമേരിക്കൻ രഹസ്യാന്വേഷണ വിഭാഗവും മറ്റ് സുരക്ഷാ ഉദ്യോഗസ്ഥരും ഇന്ത്യയിലെത്തിയിട്ടുണ്ട്. ഒരാഴ്ച ട്രംപ് ജൂനിയർ ഇന്ത്യയിൽ ഉണ്ടാകുമെന്നാണ് വിവരം.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.