തീര്‍ഥാടകരെ വരവേല്‍ക്കാന്‍ ശബരിമല ഒരുങ്ങി
Thursday, November 15, 2012 4:06 AM IST
ശബരിമല: മണ്ഡല മഹോത്സവത്തിനായി ശബരിമല അയ്യപ്പക്ഷേത്ര നട ഇന്നു തുറക്കുന്നു. നാളെ മണ്ഡലവ്രതാരംഭം കുറിക്കുന്നതോടെ ഇനിയുള്ള രണ്ടുമാസം എല്ലാവഴികളും ശബരിമലയിലേക്കാണ്.

കാനനക്ഷേത്രമായ ശബരിമലയില്‍ 60 ദിവസം നീളുന്ന മണ്ഡല, മകരവിളക്കു മഹോത്സവത്തിനു ദര്‍ശനത്തിനെത്തുന്നവരുടെ എണ്ണം കേരളത്തിലെ ജനസംഖ്യയിലുമധികമാണ്. കേന്ദ്രസംസ്ഥാന സര്‍ക്കാരുകളിലെ വിവിധ വകുപ്പുകളുടെ യോജിച്ചുള്ള പ്രവര്‍ത്തനമാണ് ശബരിമല തീര്‍ഥാടനത്തിന്റെ വിജയം. ഏറെ അവലോകനയോഗങ്ങള്‍ക്കും ക്രമീകരണങ്ങള്‍ക്കും ശേഷമാണ് തീര്‍ഥാടകരെ വരവേല്‍ക്കുന്നത്. എവിടെയെങ്കിലും പാളിച്ചയുണ്ടാകുന്നുവെങ്കില്‍ അത് അപ്പോള്‍തന്നെ പരിഹരിക്കണമെന്ന് മുഖ്യമന്ത്രി ഉമ്മന്‍ ചാണ്ടിയുടെ പ്രത്യേക നിര്‍ദേശം എല്ലാ വകുപ്പുകളിലേക്കും ലഭിച്ചിട്ടുണ്ട്.

ശബരിമലയിലേക്കെത്തുന്നവരുടെ യാത്ര സുഗമമാക്കാനും അടിസ്ഥാന ആവശ്യങ്ങള്‍ക്കു പരിഹാരം കാണാനും സുഖദര്‍ശനം സാധ്യമാക്കുന്നതിനും ആവശ്യമായ ക്രമീകരണങ്ങള്‍ക്കാണ് മുന്‍തൂക്കം നല്കുന്നത്. ദേവസ്വം, ഗതാഗതം, പോലീസ്, ആരോഗ്യം, ജലവിഭവം, റവന്യൂ, വനം, ഫയര്‍ഫോഴ്സ്, എക്സൈസ് തുടങ്ങിയ വകുപ്പുകള്‍ ശബരിമലയുമായി ബന്ധപ്പെട്ട പ്രവര്‍ത്തനങ്ങളില്‍ നിതാന്ത ജാഗ്രത പുലര്‍ത്തുന്നു. വകുപ്പുകളുടെ പ്രവര്‍ത്തനങ്ങള്‍ ഏകോപിപ്പിക്കാന്‍ ഉദ്യോഗസ്ഥരെയും നിയോഗിച്ചിട്ടുണ്ട്. റോഡുകള്‍ പൂര്‍ണമായി ഗതാഗതയോഗ്യമാക്കിയതായി പൊതുമരാമത്ത്വകുപ്പ് അവകാശപ്പെട്ടിട്ടുണ്ട്. ഇതോടൊപ്പം യാത്ര സുഗമമാക്കാനും അപകടങ്ങള്‍ ഒഴിവാക്കുന്നതിനുമായി മോട്ടോര്‍ വാഹനവകുപ്പും രംഗത്തുണ്ട്.

പമ്പയിലും സന്നിധാനത്തും സമ്പൂര്‍ണ ശുചിത്വം ഉറപ്പാക്കാനുള്ള ക്രമീകരണങ്ങളും പൂര്‍ത്തിയായി. മുന്‍വര്‍ഷത്തേതുപോലെ ശബരിമല സാനിറ്റേഷന്‍ സൊസൈറ്റിയാണ് ഇത്തവണയും ശബരിമല ശുചീകരണം നടത്തുന്നത്. തീര്‍ഥാടനകാലത്തിനു മുന്നോടിയായുള്ള ശുചീകരണ പ്രവര്‍ത്തനങ്ങള്‍ വിവിധ സന്നദ്ധസംഘടനകളുടെ ചുമതലയില്‍ പൂര്‍ത്തീകരിച്ചു. സാനിറ്റേഷന്‍ സൊസൈറ്റിയുടെ ചുമതലയില്‍ ശുചീകരണ ജോലികള്‍ക്കു തമിഴ്നാട്ടില്‍ നിന്നുള്ളവരെ റിക്രൂട്ട് ചെയ്തിട്ടുണ്ട്. വിശുദ്ധി സേന എന്ന പേരിലാണ് ഇവര്‍ അറിയപ്പെടുന്നത്. പ്രത്യേക യൂണിഫോം ധാരികളായ ശുചീകരണ പ്രവര്‍ത്തകര്‍ പമ്പ, സന്നിധാനം, തീര്‍ഥാടനപാത, നിലയ്ക്കല്‍, പന്തളം, എരുമേലി എന്നിവിടങ്ങളില്‍ ഡ്യൂട്ടിക്കുണ്ടാകും.

ഭക്ഷണശാലകളിലെ ആഹാരത്തിന്റെ ശുചിത്വം, അളവ്, ഗുണമേന്‍മ, വില എന്നിവ പരിശോധിക്കുന്നതിനു റവന്യൂ, ലീഗല്‍ മെട്രോളജി, ആരോഗ്യം, സിവില്‍ സപ്ളൈസ് വകുപ്പുകളിലെ ഉദ്യോഗസ്ഥര്‍ പോലീസിന്റെ കൂടി സഹകരണത്തില്‍ പ്രത്യേക സ്ക്വാഡുകള്‍ രൂപീകരിച്ചു പരിശോധനകള്‍ നടത്തും. പമ്പ, സന്നിധാനം, നിലയ്ക്കല്‍, വടശേരിക്കര, ളാഹ, പത്തനംതിട്ട, പന്തളം പ്രദേശങ്ങളിലാണ് പ്രധാനമായും പരിശോധനകള്‍ നടത്തുന്നത്. ശബരിമലയില്‍ വിതരണം ചെയ്യുന്ന പ്രസാദവും ഭക്ഷ്യസുരക്ഷ പരിശോധനയ്ക്കു വിധേയമാക്കാന്‍ നിര്‍ദേശം നല്കിയിട്ടുണ്ട്.