ഒഴുകുന്ന കൊട്ടാരം കൊച്ചി തീരത്തണഞ്ഞു
Saturday, November 17, 2012 4:12 PM IST
സ്വന്തം ലേഖകന്‍

കൊച്ചി: പതിനെട്ടുനിലകളുള്ള ഒഴുകുന്ന കൊട്ടാരം അറബിക്കടലിന്റെ റാണിയുടെ തീരത്തണഞ്ഞു. സെവന്‍സ്റാര്‍ ഹോട്ടലും ഷോപ്പിംഗ് മാളും ഒന്നിച്ചുചേര്‍ന്നു കടലലകളിലൂടെ ഒഴുകിനീങ്ങുന്ന അദ്ഭുതമായ സെലിബ്രിറ്റീസ് സോള്‍സ്റീസ് എന്ന കൂറ്റന്‍ ആഡംബര കപ്പലാണ് ഇന്നുരാവിലെ കൊച്ചിയുടെ തീരത്തെത്തിയത്. യു.എസ് കമ്പനിയായ റോയല്‍ കരീബിയന്‍ സെലിബ്രിറ്റി ക്രൂസിന്റെ ഉടമസ്ഥതയിലുള്ള ഈ കപ്പലില്‍ 2788 സഞ്ചാരികളും 1400-ഓളം ജീവനക്കാരുമാണ് ഇക്കുറി യാത്ര ചെയ്യുന്നത്.

പോര്‍ട്ട് ട്രസ്റ്റ് അധികൃതര്‍ കപ്പലിലെ സഞ്ചാരികളെ കൊച്ചിയിലേക്ക് സ്വാഗതം ചെയ്തു. കേരളത്തിന്റെ ടൂറിസം മേഖലയ്ക്ക് വലിയൊരു ഉണര്‍വാണ് കപ്പലെത്തിയതിലൂടെ ലഭിക്കുക.
നാളെ വരെ കപ്പല്‍ കൊച്ചിയിലുണ്ടാകും. പിന്നീട് സെലിബ്രിറ്റി സോള്‍സ്റീസ് സിംഗപ്പൂരിലേക്ക് യാത്രതുടരും. ഇതിനു മുമ്പ് കൊച്ചിയില്‍ വന്ന ആഡംബര കപ്പല്‍ ക്യൂന്‍ എലിസബത്തിനേക്കാള്‍ വലിപ്പമുള്ളതാണ് സെലിബ്രിറ്റീസ് സോള്‍സ്റ്റീസ്. 92,000 ടണ്‍ കേവുഭാരവും 965 മീറ്റര്‍ നീളവുമായിരുന്നു ക്യൂന്‍മേരിയുടെ വലുപ്പം. 2092 യാത്രക്കാര്‍ക്കു സഞ്ചാരസൌകര്യവും ഉണ്ടായിരുന്നു. എന്നാല്‍ സോള്‍സ്റ്റീസിനാകട്ടെ 1033 അടി നീളവും 121 അടി വീതിയും 1,22,000 ടണ്‍ കേവുഭാരവുമാണുള്ളത്. മണിക്കൂറില്‍ 24 നോട്ടിക്കല്‍ മൈല്‍ ആണ് വേഗത.
കപ്പലിലെ 1279 മുറികള്‍ കടലിലേക്കാണ് തുറന്നിരിക്കുന്നത്. 1025 മുറികള്‍ക്ക് ബാല്‍ക്കണിയുമുണ്ട്.

രണ്ടായിരം പേര്‍ക്കു ഭക്ഷണം കഴിക്കാനുള്ള റസ്റോറന്റുമുതല്‍ രണ്ടു നിലകളിലായി പണിതീര്‍ത്തിരിക്കുന്ന വൈന്‍ടവര്‍ വരെ സെലിബ്രിറ്റിയിലുണ്ട്. 10,000 അടി ചതുരശ്ര അടി സ്ഥലത്ത് ഗോള്‍ഫ് കളിക്കുന്നതിനായി പുല്ലുപിടിപ്പിച്ചിരിക്കുന്നു. പുല്‍ത്തകിടിയോരത്തായി വലിയൊരു മരവും. ജോഗിംഗ് ട്രാക്ക്, ബാസ്കറ്റ്ബോള്‍ കോര്‍ട്ട്, മൂന്നു നീന്തല്‍ക്കുളം, സ്പാ, മള്‍ട്ടി ജിംനേഷ്യം, ചൂടുവെള്ളത്തില്‍ കുളിക്കുന്നതിനുള്ള ജാക്വസി, മൂന്നു തിയറ്റര്‍, ടീനേജ് ക്ളബ്, അഞ്ചു സ്പെഷ്യാലിറ്റി റസ്റോറന്റുകള്‍, പന്ത്രണ്ട് ബാറുകള്‍, 24 മണിക്കൂറും തുറന്നിരിക്കുന്ന ബുഫെ ഹാള്‍, ലൈബ്രറി, ലോകോത്തര ചിത്രങ്ങള്‍ ഒരുക്കിയിരിക്കുന്ന ആര്‍ട്ട് ഗാലറി, കാസിനോ, ചൂതാട്ട കേന്ദ്രങ്ങള്‍ തുടങ്ങി സെലിബ്രിറ്റിയിലില്ലാത്തതൊന്നുമില്ല. യാത്രികര്‍ ആവശ്യപ്പെടുന്ന ഏതു ഭക്ഷണവും കപ്പലില്‍ ലഭിക്കും.
കപ്പലിന്റെ നാലും അഞ്ചു നിലകള്‍ ബ്രാന്‍ഡഡ് കമ്പനികളുടെ ടാക്സ് ഫ്രീ ഷോപ്പുകളാണ്. ലോകോത്തര വാച്ചുകള്‍, സ്വര്‍ണ, വജ്രാഭരണങ്ങള്‍, സുഗന്ധദ്രവ്യങ്ങള്‍, ഫാഷന്‍ വാര്‍ഡ് റോബ്സ്, അമൂല്യമായ കലാസൃഷ്ടികള്‍ എന്നിവയെല്ലാം ഇവിടെ നിന്നും വാങ്ങാം.

വിദഗ്ധരായ കലാകാരന്മാരുടെയും മജീഷ്യന്മാരുടെയും തത്സമയ കലാപ്രകടനവും സെലിബ്രിറ്റിയിലുണ്ടാകും. യാത്രികരുടെ ഫോട്ടോ എടുത്തുകൊടുക്കുന്നതിനുവേണ്ടി പതിനഞ്ചു ഫോട്ടോഗ്രാഫര്‍മാര്‍ ഷിപ്പിലുണ്ട്. ഫണ്‍ സ്കൂളില്‍ കുട്ടികളെ നോക്കാന്‍ അഞ്ച് ആയമാര്‍. നാലു നഴ്സുമാരും രണ്ടു ഡോക്ടര്‍മാരും അടങ്ങിയ മെഡിക്കല്‍ സംഘവും കപ്പലിലുണ്ട്. അത്യാവശ്യം സര്‍ജറിക്കുവേണ്ട തിയറ്ററും സജ്ജമാക്കിയിരിക്കുന്നു. അടിയന്തര മെഡിക്കല്‍ സഹായം ആവശ്യമായി വരുമ്പോള്‍ ഹെലികോപ്റ്റര്‍ സൌകര്യവും ഉണ്ടാകും. മലയാളികളായ 27 ജീവനക്കാരാണ് ഈ കപ്പലിലുള്ളത്. ഇവരില്‍ 24 നാലുപേരും ഷെഫുമാരാണ്. കോട്ടയം കൈപ്പുഴ സ്വദേശി രാജേഷ് ആണ് ചീഫ് ഷെഫുമാരില്‍ ഒരാള്‍. ഷിപ്പിലെ സെക്യൂരിറ്റി ഓഫീസര്‍ കുമാരനല്ലൂര്‍ സ്വദേശി ഗോപകുമാര്‍ ആണ്. സെലിബ്രിറ്റിയിലെ അഞ്ചു സ്പെഷ്യാലിറ്റി റസ്റോറന്റുകളില്‍ ഒന്നിന്റെ മാനേജരായി കുമരകം സ്വദേശി റോയി ജോര്‍ജ് ജോലി ചെയ്യുന്നു.

ഏറ്റവും മികച്ച സുരക്ഷാ സംവിധാനങ്ങളാണ് സെലിബ്രിറ്റി സോള്‍സ്റീസില്‍ ഒരുക്കിയിരിക്കുന്നത്. കടല്‍ എത്ര ക്ഷോഭിച്ചാലും യാത്രികര്‍ അതറിയില്ല. ഈ സമയങ്ങളില്‍ ജലനിരപ്പില്‍ നിന്നും ആറടി താഴ്ചയില്‍ കപ്പലില്‍ നിന്ന് രണ്ടു ചിറകുകള്‍ വിടരും. അവ ഷിപ്പിനെ ബാലന്‍സ് ചെയ്യിക്കും. യുപി.എസ്.എച്ച് (യുണൈറ്റഡ് സ്റേറ്റ് പ്രൈമറി ഹെല്‍ത്ത്) ഡിപ്പാര്‍ട്ട്മെന്റിന്റെ ശുചിത്വ മാനദണ്ഡം അനുസരിച്ചാണ് സെലിബ്രിറ്റീസ് സോള്‍സ്റീസ് പ്രവര്‍ത്തിക്കുന്നത്. 216 സോളാര്‍ പാനലുകള്‍ കപ്പലിലുണ്ട്. ഡീസല്‍ വൈദ്യുതിയാക്കി മാറ്റിയാണ് പ്രവര്‍ത്തനം. ഇന്ത്യയില്‍ കൊച്ചി തുറമുഖത്തുമാത്രമാണ് കപ്പല്‍ അടുത്തത്. 2015 വരെയുള്ള ബുക്കിംഗ് പൂര്‍ത്തിയായതിനാല്‍ അടുത്തകാലത്തൊന്നും ഈ കപ്പലില്‍ യാത്ര സാധ്യമല്ല. ഷാരൂഖ്ഖാന്‍ അടക്കമുള്ള സെലിബ്രിറ്റീസ് യാത്ര ചെയ്തിട്ടുള്ള കപ്പല്‍ കൂടിയാണിത്.