എളമരം കരീമിന് വീണ്ടും ആന്റണിയുടെ പ്രശംസ
Saturday, November 17, 2012 4:57 PM IST
കാസര്‍ഗോഡ്: മുന്‍ വ്യവസായ മന്ത്രി എളമരം കരീമിന് വീണ്ടും കേന്ദ്രപ്രതിരോധമന്ത്രി എ.കെ ആന്റണിയുടെ പ്രശംസ. കാസര്‍ഗോഡ് എച്ച്എഎല്‍ ഫാക്ടറി കൊണ്ടുവരാന്‍ തന്നെ ഏറ്റവും കൂടുതല്‍ സഹായിച്ചത് അന്നത്തെ വ്യവസായമന്ത്രിയായിരുന്ന കരീമാണെന്ന് പറഞ്ഞായിരുന്നു ആന്റണിയുടെ അഭിനന്ദനം. ഫാക്ടറിയുടെ ഉദ്ഘാടനച്ചടങ്ങില്‍ സംസാരിക്കുകയായിരുന്നു ആന്റണി. എളമരം കരീം കൂടി ഇരുന്ന വേദിയിലാണ് ആന്റണി അദ്ദേഹത്തെ പ്രകീര്‍ത്തിച്ചത്.

ആളുകളുടെ കര്‍മത്തെ അംഗീകരിക്കുന്നതില്‍ താന്‍ രാഷ്ട്രീയം നോക്കാറില്ലെന്നും വികസന കാര്യത്തിലും രാഷ്ട്രീയം നോക്കരുതെന്നാണ് തന്റെ നിലപാടെന്നും അദ്ദേഹം വിശദീകരിച്ചു. അമിത രാഷ്ട്രീയവും വിവാദങ്ങളുമാണ് കേരളത്തില്‍ വികസനത്തിന് തടസം. എഡിബി വായ്പയ്ക്ക് നായനാര്‍ സര്‍ക്കാര്‍ അന്ന് യുഡിഎഫിന്റെ സഹായം തേടിയിരുന്നതായും ആന്റണി പറഞ്ഞു. കഴിഞ്ഞ ദിവസം തിരുവനന്തപുരത്ത് ബ്രഹ്മോസ് മിസൈല്‍ യൂണിറ്റിന്റെ ഉദ്ഘാടന വേളയില്‍ താന്‍ നടത്തിയ പ്രസംഗത്തിന് മറ്റ് വ്യാഖ്യാനങ്ങള്‍ നല്‍കേണ്ടെന്ന് അദ്ദേഹം പറഞ്ഞു. കേരളത്തിലെ വ്യവസായങ്ങള്‍ തകരരുതെന്ന് ആത്മാര്‍ഥമായി ആഗ്രഹിച്ചാണ് താന്‍ അക്കാര്യങ്ങള്‍ പറഞ്ഞതെന്നും ആന്റണി കൂട്ടിച്ചേര്‍ത്തു. കേരളത്തിന്റെ നന്‍മയ്ക്ക് വേണ്ടിയാണ് അങ്ങനെ പറഞ്ഞത്. തന്റെ മനസാക്ഷിയനുസരിച്ചാണ് അഭിപ്രായം പറഞ്ഞതെന്നും ആവശ്യമില്ലെങ്കില്‍ തള്ളിക്കളയാനും ആന്റണി പറഞ്ഞു.

ബ്രഹ്മോസ് മിസൈല്‍ യൂണിറ്റിന്റെ ഉദ്ഘാടന വേളയില്‍ കേരളത്തിലെ നിലവിലെ വ്യവസായ അന്തരീക്ഷത്തെക്കുറിച്ച് ആന്റണി നടത്തിയ പരാമര്‍ശം വിവാദമായിരുന്നു. മുഖ്യമന്ത്രിയായിരുന്ന വി.എസിനെയും വ്യവസായമന്ത്രിയായിരുന്ന എളമരം കരീമിനെയും അന്നും അദ്ദേഹം പ്രശംസിച്ചിരുന്നു. യുഡിഎഫ് ഘടകകക്ഷികളിലും കോണ്‍ഗ്രസിനുള്ളിലും ഇതിനോട് വിയോജിപ്പുയര്‍ന്നിരുന്നു. ഈ സാഹചര്യത്തിലായിരുന്നു ഇന്നത്തെ ഉദ്ഘാടനച്ചടങ്ങ്.

എച്ച്എഎല്‍ ഫാക്ടറിയുടെ രണ്ടാം ഘട്ടം പ്രവര്‍ത്തനങ്ങള്‍ക്ക് ഏതാനും മാസങ്ങള്‍ക്കുളളില്‍ തുടക്കം കുറിക്കുമെന്നും ആന്റണി പറഞ്ഞു. ഫാക്ടറി പടിപടിയായി വികസിപ്പിച്ച് ഇന്ത്യയിലെ ഏറ്റവും മുന്‍നിരയിലുളള സ്ഥാപനമാക്കി മാറ്റാനാണ് ലക്ഷ്യമിടുന്നതെന്നും ആന്റണി പറഞ്ഞു.