കോട്ടയത്ത് നഗ്നനായി ബൈക്ക് ഓടിച്ച യുവാവ് സന്യാസിയുടെ നിയന്ത്രണത്തില്‍?
Saturday, November 17, 2012 5:44 PM IST
കോട്ടയം: നഗ്നനായി ബൈക്ക് ഓടിച്ച യുവാവ് കഴിഞ്ഞ നാലു മാസമായി പുതുപ്പള്ളി പയ്യപ്പാടിക്കു സമീപമുള്ള സന്യാസിയുടെ നിയന്ത്രണത്തിലായിരുന്നുവെന്നു സൂചന. സ്വാമിയോടുള്ള അമിത ഭക്തിമൂലം ഉടലെടുത്ത മാനസികന്യൂനതയാണു വിഭ്രാന്തിയിലേക്കു വഴിതെളിച്ചതെന്നു കരുതുന്നു.

അതേസമയം വസ്ത്രങ്ങളില്ലാതെ ബൈക്കില്‍ പാഞ്ഞ ഗോപന്റെ മാനസികന്യൂനത മറയാക്കി പണം തട്ടാന്‍ ശ്രമം നടക്കുന്നതായി ബന്ധുക്കള്‍ പോലീസില്‍ പരാതിപ്പെട്ടു. യുവാവ് ജോലി ചെയ്യുന്ന സ്വകാര്യ ധനകാര്യ സ്ഥാപനത്തില്‍നിന്നു വായ്പയെടുത്ത ചിലര്‍ക്കെതിരെയാണു ബന്ധുക്കള്‍ പരാതി നല്കിയത്. ഗോപനെതിരേ ആരോപണം ഉന്നയിച്ചു പണം തിരിച്ചടയ്ക്കുന്നത് ഒഴിവാക്കാന്‍ ശ്രമം നടക്കുന്നതായി ഇവര്‍ പറയുന്നു. വ്യാഴാഴ്ച പണപ്പിരിവ് നടത്തിയശേഷം ബില്‍ നല്കിയില്ലെന്ന് ആരോപിച്ചു കുറേ ആളുകള്‍ സ്ഥാപനത്തില്‍ വിളിച്ചു രസീത് നല്കിയില്ലെന്നു പറഞ്ഞു. കളക്ഷന്‍ എടുത്ത പണം മുഴുവന്‍ ഗോപന്റെ ബാഗില്‍ തന്നെ ഉണ്ടായിരുന്നുവെന്നും ഇതിന്‍ പ്രകാരം രസീത് നല്കാനില്ലെന്നുമാണു ബന്ധുക്കള്‍ പറയുന്നത്. ഗോപന്റെ കൈവശം ഉണ്ടായിരുന്ന മൊബൈല്‍ ഫോണും നഷ്ടപ്പെട്ടിട്ടുണ്ട്. ഇതു മറ്റാര്‍ക്കൊ ലഭിച്ചതായി പറയുന്നു. പോലീസ് പിടികൂടിയ മണര്‍കാട് ഒറവയ്ക്കല്‍ പുതിയകാവില്‍ ഗോപന്‍ ടി.നായര്‍ (32)ക്കു ചങ്ങനാശേരി ഒന്നാം ക്ളാസ് മജിസ്ട്രേട്ട് കോടതി ജഡ്ജി എ.എം. ബഷീര്‍ ജാമ്യം അനുവദിച്ചു. മാനസിക വിഭ്രാന്തിയില്‍ നഗ്നനായി ബൈക്ക് ഓടിച്ച യുവാവിനെ ക്രൂരമായി മര്‍ദിച്ചവര്‍ക്കെതിരെയാണു കേസെടുക്കേണ്ടതെന്നു കോടതി വിമര്‍ശിച്ചു. പാമ്പാടി, മണര്‍കാട്, കോട്ടയം വെസ്റ്റ്, ചിങ്ങവനം സ്റ്റേഷന്‍ പരിധിയിലാണു സംഭവങ്ങള്‍ അരങ്ങേറിയത്.

പൂര്‍ണ നഗ്നനായി നഗരമധ്യത്തിലൂടെ യുവാവ് ബൈക്ക് ഓടിച്ചതു പെട്ടെന്നുണ്ടായ മാനസികാസ്വാസ്ഥ്യത്തെത്തുടര്‍ന്നെന്നാണു പോലീസ് പറയുന്നത്. ഇയാള്‍ മദ്യമോ മറ്റു ലഹരി പദാര്‍ഥങ്ങളോ ഉപയോഗിച്ചിരുന്നില്ലെന്നു വൈദ്യപരിശോധനയില്‍ തെളിഞ്ഞു. ബൈക്ക് യാത്രയ്ക്കിടെ യുവാവ് വഴിയരികിലേക്കു വലിച്ചെറിഞ്ഞ 37,000 രൂപ അടങ്ങിയ ബാഗ് മണര്‍കാട് എരുമപ്പെട്ടിയില്‍നിന്നു പോലീസിനു ലഭിച്ചു. ബാഗ് കളഞ്ഞുകിട്ടിയ ആള്‍ പോലീസില്‍ ഏല്പിക്കുകയായിരുന്നു. പാമ്പാടിയില്‍നിന്നുള്ള യാത്രയ്ക്കിടെ എരുമപ്പെട്ടിക്കു സമീപം പണമടങ്ങിയ ബാഗ് വലിച്ചെറിയുകയായിരുന്നു. വിവിധ സ്ഥലങ്ങളില്‍നിന്നു പിരിച്ചെടുത്ത തുകയായിരുന്നു ബാഗില്‍. ഇന്നലെ രാവിലെ പാമ്പാടി എരുമപ്പെട്ടി ഭാഗത്തെ പറമ്പില്‍ പുല്ലു ചെത്താന്‍ എത്തിയ ആളാണു ബാഗ് കണ്െടത്തിയത്. ഇതു പാമ്പാടി സിഐ സാജു വര്‍ഗീസിനെ ഏല്‍പ്പിച്ചു. 37,000 രൂപയും ബില്ലിംഗ് യന്ത്രവും ചെക്കു ബുക്കുകളുമാണ് ബാഗിനുള്ളില്‍ ഉണ്ടായിരുന്നത്.

വ്യാഴാഴ്ച വൈകുന്നേരം അഞ്ചോടെയാണു പാമ്പാടി മുതല്‍ കോട്ടയം നഗരത്തിലെ മൂലവട്ടം വരെ ഗോപന്‍ പൂര്‍ണ നഗ്നനായി ബൈക്ക് ഓടിച്ചത്. കളത്തിപ്പടിയിലെ സ്വകാര്യ ധനകാര്യ സ്ഥാപനത്തിലെ ജീവനക്കാരനായ ഗോപന്‍ ഒരാഴ്ചയിലേറെയായി മാനസിക അസ്വാസ്ഥ്യം പ്രകടിപ്പിച്ചിരുന്നതായി ബന്ധുക്കള്‍ പറഞ്ഞു. വ്യാഴാഴ്ച ഉച്ചവരെ ജോലിസ്ഥലത്തുണ്ടായിരുന്നു. രണ്ടരയോടെ വീട്ടിലെത്തി ഭക്ഷണം കഴിച്ചശേഷം പണം പിരിക്കുന്നതിനായി കാഞ്ഞിരപ്പള്ളിയിലേക്കു പോയി. തിരികെ പാമ്പാടിയില്‍ എത്തി പെട്രോള്‍ പമ്പില്‍ പെട്രോള്‍ അടിക്കുന്നതിനിടെ തലയ്ക്കുള്ളില്‍ മരവിപ്പുണ്ടായതായും പിന്നീട് എന്തു സംഭവിച്ചെന്ന് ഓര്‍മയില്ലെന്നും ഗോപന്‍ പോലീസിനു മൊഴി നല്‍കി.

പാമ്പാടി ആറാം മൈലില്‍ ബൈക്ക് നിര്‍ത്തിയ ഒരാള്‍ ഷര്‍ട്ട് അഴിച്ചു മാറ്റുന്നതു കണ്ടതായി നാട്ടുകാര്‍ പറയുന്നു. ഇതു ഗോപനാണെന്നു പോലീസ് പറയുന്നു. ചൂടായതിനാലാണു ഷര്‍ട്ട് അഴിക്കുന്നതെന്നാണു നാട്ടുകാരോട് പറഞ്ഞത്. തുടര്‍ന്നു നഗരത്തിലൂടെ ബൈക്കില്‍ പാഞ്ഞ ഗോപനെ മൂലവട്ടം ഭാഗത്തു വച്ചു ജനങ്ങള്‍ തടഞ്ഞു നിര്‍ത്തി. ഇവിടെ വച്ചാണു ഗോപനു മര്‍ദനമേറ്റത്. തുടര്‍ന്നു ചിങ്ങവനം എസ്ഐ നിര്‍മ്മല്‍ ബോസും കോട്ടയം വെസ്റ്റ് എസ്ഐ ബിന്‍സ് ജോസഫും ചേര്‍ന്ന് അറസ്റ്റു ചെയ്യുകയായിരുന്നു.