ബാല്‍ താക്കറെയ്ക്കു പതിനായിരങ്ങളുടെ യാത്രാമൊഴി
Sunday, November 18, 2012 8:02 AM IST
മുംബൈ: പതിനായിരക്കണക്കിന് അനുയായികളുടെയും ആരാധകരുടേയും അന്ത്യോപചാരം ഏറ്റുവാങ്ങി ശിവസേനാ തലവന്‍ ബാല്‍ താക്കറെ ജ്വലിക്കുന്ന ഓര്‍മ്മയായി. അന്തരിച്ച ശിവസേനാ നേതാവ് താക്കറെയുടെ ഭൌതികദേഹം പൂര്‍ണ ഔദ്യോഗിക ബഹുമതികളോടെ മുംബൈയുടെ മണ്ണില്‍ സംസ്കരിച്ചു. ശിവജി പാര്‍ക്കില്‍ നടന്ന സംസ്കാരചടങ്ങുകള്‍ക്ക് മകന്‍ ഉദ്ധവ് താക്കറെയും ജയ്ദേവും നേതൃത്വം നല്‍കി. ചിതയ്ക്കു ഉദ്ധവ് തീകൊളുത്തി.

ഇന്നു വൈകീട്ട് അഞ്ചു മണിയോടെ മൃതദേഹം ശിവജി പാര്‍ക്കില്‍ പൊതുദര്‍ശനത്തിനുവച്ചു. കേന്ദ്രമന്ത്രി ശരത് പവാര്‍, ബിജെപി പ്രസിഡന്റ് നിതിന്‍ ഗഡ്കരി, മുതിര്‍ന്ന ബിജെപി നേതാക്കളായ എല്‍.കെ. അഡ്വാനി, അരുണ്‍ ജെയ്റ്റ്ലി, സുഷമ സ്വരാജ്, പ്രകാശ് ജാവേദ്കര്‍, ബിജെപി മഹിളാ മോര്‍ച്ചാ നേതാവ് സ്മൃതി ഇറാനി, ബിജെപി വക്താവ് ഷഹ്നാവാസ് ഹുസൈന്‍, കോണ്‍ഗ്രസ് നേതാവ് രാജീവ് ശുക്ള, ബോളിവുഡ് താരം അമിതാഭ് ബച്ചന്‍, ഗായിക ലതാ മങ്കേഷ്കര്‍, എഡിഎജി അധ്യക്ഷന്‍ അനില്‍ അംബാനി, ബിജെപി എംപി മേനകാ ഗാന്ധി, എന്‍സിപി നേതാവ് ഛഗന്‍ ഭുജ്പാല്‍, ബോളിവുഡ് സംവിധായകന്‍ മാധുര്‍ ഭണ്ടാര്‍ക്കര്‍, നടനും സംവിധായകനുമായ മഹേഷ് മഞ്ജരേക്കര്‍, റിതേഷ് ദേശ്മുഖ്, നാനാ പടേകര്‍ തുടങ്ങിയ പ്രമുഖരടക്കം ഒട്ടേറെപ്പേര്‍ ആദരാഞ്ജലി അര്‍പ്പിക്കാനെത്തി. തങ്ങളുടെ പ്രിയപ്പെട്ട നേതാവിനെ അവസാനമായി ഒരുനോക്കു കാണാന്‍ പതിനായിരക്കണക്കിനു അനുയായികളാണ് ശിവജി പാര്‍ക്കിലേയ്ക്കു ഒഴുകിയെത്തിയത്. താക്കറെയുടെ മരുമകനും എംഎന്‍എസ് നേതാവുമായ രാജ് താക്കറെ ശിവജി പാര്‍ക്കിലെത്തി അന്തിമോപചാരം അര്‍പ്പിച്ചു. താക്കറെയുടെ ഭൌതികദേഹവും വഹിച്ച് അദ്ദേഹത്തിന്റെ വസതിയായ മാതോശ്രീയില്‍ നിന്നു ശിവജി പാര്‍ക്കിലേയ്ക്കുള്ള വിലാപയാത്രയില്‍ മുംബൈ ഇതുവരെ കണ്ടിട്ടില്ലാത്ത ജനബാഹുല്യമാണ് കണ്ടത്. ഇരുപതു ലക്ഷത്തോളം അനുയായികളാണ് വഴിയരികില്‍ കാത്തുനിന്നിരുന്നത്. സുരക്ഷയുടെ ഭാഗമായി മുംബൈയില്‍ 20,000ത്തോളം പോലീസുകാരെയാണ് വിന്യസിച്ചിരുന്നത്.

ഭാഷയുടെപേരില്‍ പ്രാദേശികവാദം ഉയര്‍ത്തി ഇന്ത്യന്‍ രാഷ്ട്രീയത്തില്‍ നിര്‍ണായക ശബ്ദമായി മാറിയ താക്കറെ പക്ഷേ മഹാരാഷ്ട്രയുടെ അതിരു കടന്നില്ല. മഹാരാഷ്ട്രക്കാരന്റെ മജ്ജയും മാംസവുമായി ശിവസേനയെന്ന പാര്‍ട്ടിയും അതിന്റെ നേതാവും വളര്‍ന്നു. പക്ഷേ, രാജാവ് ഒരിക്കലും കിരീടം വച്ചില്ല. സംഘടനയുടെ നേതാവായി മാത്രം നിലനിന്നു. ഭരണത്തില്‍ നേരിട്ടു പങ്കാളിയായില്ല. മന്ത്രിയോ മുഖ്യമന്ത്രിയോ ആകാന്‍ ശ്രമിച്ചില്ല. പക്ഷേ, ഭരണത്തിന്റെ കടിഞ്ഞാണ്‍ അദ്ദേഹത്തിന്റെ കൈയിലായിരുന്നു. ശിവസേനയുടെ സ്ഥാപകനും തലവനുമായിരുന്ന ബാല്‍ താക്കറെ അനുയായികള്‍ക്കിടയില്‍ അറിയപ്പെട്ടിരുന്നത് കടുവയെന്നാണ്. താക്കറെ യുഗം അവസാനിക്കുമ്പോള്‍ ഒരു രാഷ്ട്രീയ പ്രസ്ഥാനം എന്ന നിലയില്‍ ശിവസേന നേരിടുന്ന പ്രതിസന്ധി ചെറുതല്ല. ആ ഗര്‍ജനവും കാല്‍പ്പെരുമാറ്റവും നിലച്ചതു വലിയൊരു നിശബ്ദത സൃഷ്ടിച്ചിട്ടുണ്ട്. മറാത്താവാദികളുടെ ഹൃദയത്തെ മഥിക്കുന്ന ശൂന്യത.