രത്നക്കവര്‍ച്ചയ്ക്കിടെ കൊലപാതകം: രേഖാചിത്രം തയാറാക്കും
Wednesday, December 26, 2012 7:11 AM IST
തിരുവനന്തപുരം: വട്ടിയൂര്‍ക്കാവിനു സമീപം നെട്ടയത്ത് പുത്തൂര്‍ക്കോണം കേരള നഗര്‍ ഓംകാര്‍ വീട്ടില്‍ ഹരിഹര വര്‍മ്മയെ കൊലപ്പെടുത്തിയ ശേഷം കോടികള്‍ വില വരുന്ന രത്നങ്ങളുമായി രക്ഷപ്പെട്ട പ്രതികളുടെ രേഖാചിത്രം ഉടന്‍ പോലീസ് തയാറാക്കും. പ്രതികള്‍ കേരളം വിട്ടുവെന്ന് ഏതാണ്ട് ഉറപ്പായ സാഹചര്യത്തിലാണ് രേഖാചിത്രം തയ്യാറാക്കാന്‍ പോലീസ് തീരുമാനിച്ചത്.

തിങ്കളാഴ്ചയാണ് മാവേലിക്കര രാജകുടുംബാംഗമെന്ന് പറയപ്പെടുന്ന ഭാസ്കര വര്‍മ്മയുടെ മകന്‍ ഹരിഹരവര്‍മ്മ (55) നെട്ടയം പുതൂര്‍ക്കോണത്തെ അഡ്വ ഹരിദാസിന്റെ വീട്ടില്‍ കൊല്ലപ്പെട്ടത്. ഹരിഹര വര്‍മ്മയുടെ കൈവശം ഉണ്ടായിരുന്ന അമൂല്യ രത്നങ്ങളും മരതകം കൊണ്ടുള്ള ഗണപതി വിഗ്രഹവും വില്‍പന നടത്താന്‍ ശ്രമിക്കുന്നതിനിടെയാണ് കൊല്ലപ്പെട്ടത്. മൂന്നുറു കോടിയോളം രൂപ വില വരുന്ന അമൂല്യ വസ്തുക്കള്‍ നഷ്ടപ്പെട്ടതെന്നാണ് ലഭിക്കുന്ന വിവരങ്ങള്‍.

അയല്‍വാസിയായ അഡ്വ. ഹരിദാസും ഹരിഹര വര്‍മ്മയും മാത്രമാണ് രത്നം വാങ്ങാനെത്തിയ മൂന്നുപേരുമായി ഇടപാട് സംബന്ധിച്ച ചര്‍ച്ച നടത്തിയത്. തിങ്കളാഴ്ച പത്തുമണിയോടെയാണ് രണ്ടു കാറുകളിലായി സംഘം എത്തിയത്. കച്ചവടം ഉറപ്പിക്കുന്നതിനിടെ വാക്കു തര്‍ക്കം ഉണ്ടാവുകയും തങ്ങളെ രണ്ടുപേരെയും ക്ളോറോഫോം മണപ്പിച്ച ശേഷം മുറിയില്‍ പൂട്ടിയിടുകയായിരുന്നുവെന്നാണ് ഹരിദാസിന്റെ മൊഴി. യോഗേഷ്, പ്രേംരാജ്, കണ്ടാലറിയുന്ന ഒരാള്‍ എന്നിവര്‍ സംഘത്തിലുണ്ടായിരുന്നതായാണ് ഇയാളുടെ മൊഴി.

ഹരിദാസിനെ നാലു തവണ ഇതിനകം കേസ് അന്വേഷണത്തിന് നേതൃത്വം നല്‍കുന്ന സിറ്റി പോലീസ് കമ്മീഷണര്‍ ടി.ജെ ജോസിന്റെ നേതൃത്വത്തിലുള്ള പോലീസ് സംഘം ചോദ്യം ചെയ്തിരുന്നു. ആദ്യം പറഞ്ഞ മൊഴിയില്‍ തന്നെയാണ് ഇയാള്‍ ഇപ്പോഴും ഉറച്ചുനില്‍ക്കുന്നത്. ഹരിഹര വര്‍മ്മയുടെ പോസ്റ്റുമോര്‍ട്ടം റിപ്പോര്‍ട്ട് ഇന്നലെ പോലീസിന് ലഭിച്ചു. കഴുത്തിനേറ്റ ക്ഷതവും ശ്വാസം മുട്ടിയതുമാണ് മരണകാരണമെന്നാണ് റിപ്പോര്‍ട്ടില്‍ പറയുന്നത്. കൊല നടത്തിയ ശേഷം രത്നങ്ങളുമായി സംഘം വട്ടിയൂര്‍ക്കാവ് വരെ ഒരു ഓട്ടോറിക്ഷയിലും അവിടെ നിന്ന് ഇന്‍ഡിക്ക കാറില്‍ തമ്പാനൂര്‍ റെയില്‍വേ സ്റേഷനിലേക്കുമാണ് രക്ഷപ്പെട്ടത്.

ഈ രണ്ടു വാഹനങ്ങളും പോലീസ് കസ്റ്റഡിയിലെടുത്തു. ഈ വാഹനങ്ങളുടെ ഡ്രൈവര്‍മാരുടേയും അഡ്വ. ഹരിദാസിന്റേയും മൊഴികളുടെയും വിവരങ്ങളുടെയും അടിസ്ഥാനത്തിലാണ് പോലീസ് രേഖാചിത്രം തയ്യാറാക്കുന്നത്. സംഭവത്തിന് ശേഷം ഹരിഹര വര്‍മ്മയുടേയും ഹരിദാസിന്റേയും മൊബൈല്‍ ഫോണുകളുമായാണ് ഇവര്‍ രക്ഷപ്പെട്ടത്. ഇത് അവസാനമായി ഓണായത് ആലുവയ്ക്ക് സമീപം വച്ചാണ്. ഇതിനു ശേഷം ഇതു സ്വിച്ച് ഓഫാണ്.

ഡിസിപി പുട്ടവിമലാദിത്യയുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ചാണ് ഇപ്പോള്‍ അന്വേഷണം നടക്കുന്നത്. കൊലയാളി സംഘത്തെക്കുറിച്ച് പല നിര്‍ണായക വിവരങ്ങളും ഇതിനകം അന്വേഷണ സംഘത്തിന് ലഭിച്ചിട്ടുണ്ട്. ഇക്കഴിഞ്ഞ മൂന്നാം തീയതി ഇന്‍ഡിഗോ വിമാനത്തില്‍ ഒരു സ്ത്രീ അടങ്ങുന്ന മൂന്നംഗ സംഘം ഹരിഹരവര്‍മ്മയുമായി രത്നങ്ങളുടെ വില്‍പന സംബന്ധിച്ച് ചര്‍ച്ച നടത്തിയിരുന്നു. വില ശരിയാകാത്തതുകൊണ്ടാണ് അന്ന് ഇവര്‍ മടങ്ങിപ്പോയത്. അതിനു ശേഷം കരുതിക്കൂട്ടി തന്നെയാണ് സംഘം ഇവരെ വീണ്ടും സമീപിച്ചതെന്നാണ് അന്വേഷണത്തില്‍ ലഭിക്കുന്ന വിവരം. ഹരിദാസു വഴിയാണ് ഹരിഹര വര്‍മ്മ ഇടപാടു സംഘവുമായി ബന്ധപ്പെട്ടതെന്നാണ് മറ്റൊരു വിവരം. ഇതിന്റെ അടിസ്ഥാനത്തില്‍ ഹരിദാസിനെ വീണ്ടും ചോദ്യം ചെയ്യും. പോലീസിന്റെ അന്വേഷണം ഇപ്പോഴും മുന്നോട്ടു പോകുന്നത് ഹരിദാസിനെ ചുറ്റിപ്പറ്റി തന്നെയാണ്. ഇയാളുടെ ഇടപാടുകളേയും ബന്ധങ്ങളേയും പറ്റിയൊക്കെ ഇതിനകം പോലീസ് അന്വേഷണം ആരംഭിച്ചിട്ടുണ്ട്.