ഹരിഹര വര്‍മയുടെ കൊലപാതകം ആസൂത്രിതം; അഞ്ചുപേര്‍ പിടിയിലായെന്നു പോലീസ്
Saturday, January 5, 2013 4:41 PM IST
തിരുവനന്തപുരം: തിരുവനന്തപുരത്ത് രത്നവ്യാപാരി ഹരിഹര വര്‍മയുടെ കൊലപാതകവുമായി ബന്ധപ്പെട്ട് അഞ്ചു പേരെ അറസ്റുചെയ്തതായി പോലീസ് വെളിപ്പെടുത്തി. ഇതില്‍ മൂന്നുപേര്‍ വിദ്യാര്‍ഥികളാണ്. തിരുവനന്തപുരത്ത് വാര്‍ത്താസമ്മേളനത്തില്‍ എഡിജിപി എ.ഹേമചന്ദ്രനാണ് വിവരങ്ങള്‍ പുറത്തുവിട്ടത്.

തലശേരി സ്വദേശിയായ ജിതേഷാണ് സംഭവത്തിന്റെ മുഖ്യ ആസൂത്രകനെന്ന് എഡിജിപി അറിയിച്ചു. കോഴിക്കോട് കുറ്റ്യാടി സ്വദേശി അജീഷ്, ജിതേഷിന്റെ ബന്ധുവും ബാംഗളൂരില്‍ എന്‍ജിനീയറിംഗ് വിദ്യാര്‍ഥിയുമായ രാഗില്‍, ചാലക്കുടി സ്വദേശിയും ബാംഗളൂരില്‍ വിദ്യാര്‍ഥിയുമായ രാഗേഷ്, കൂര്‍ഗില്‍ താമസിക്കുന്ന എന്‍ജിനീയറിംഗ് വിദ്യാര്‍ഥി ജോസഫ് എന്നിവരാണ് പിടിയിലായതെന്ന് പോലീസ് വ്യക്തമാക്കി. സംഭവത്തില്‍ ഉള്‍പ്പെട്ട കൂടുതല്‍ പ്രതികള്‍ക്കായുള്ള അന്വേഷണം നടന്നുവരുകയാണെന്നും എഡിജിപി പറഞ്ഞു.

മൂല്യം കുറഞ്ഞ കല്ലുകള്‍ വിലപിടിപ്പേറിയ രത്നങ്ങളാണെന്ന വ്യാജേന കൊല്ലപ്പെട്ട ഹരിഹര വര്‍മ വില്‍ക്കാന്‍ ശ്രമിച്ചിരുന്നുവെന്നും ഇത് വാങ്ങുന്നതിന്റെ ഭാഗമായി മുന്‍പ് മൂന്നുതവണ പ്രതികള്‍ ഹരിഹരവര്‍മയുടെ വീട്ടിലെത്തിയിരുന്നുവെന്നും പോലീസ് പറഞ്ഞു. വര്‍മയില്‍ നിന്ന് രത്നങ്ങള്‍ തട്ടിയെടുക്കാനായി പ്രതികള്‍ ഗൂഢാലോചന നടത്തി പദ്ധതി തയാറാക്കുകയായിരുന്നു. ഇതിന്റെ ഭാഗമായി പ്രതികള്‍ എറണാകുളം ഏലൂരില്‍ വീട് വാടകയ്ക്കെടുത്ത് താമസിച്ചിരുന്നു. ഇംഗ്ളീഷ്, കന്നഡ ഭാഷകള്‍ നന്നായി കൈകാര്യം ചെയ്യാനറിയാവുന്ന ജോസഫിനെ കര്‍ണാടക മന്ത്രിയുടെ മകനെന്ന വ്യാജേനയാണ് വര്‍മയെ പരിചയപ്പെടുത്തിയിരുന്നതെന്ന് എഡിജിപി പറഞ്ഞു. വര്‍മ കൊല്ലപ്പെട്ട ദിവസം ഇദ്ദേഹത്തിന്റെ സുഹൃത്തും അഭിഭാഷകനുമായ ഹരിദാസിന്റെ മകളുടെ പേരിലുള്ള ഞെട്ടയം പൂത്തൂര്‍കോണത്തെ വീട്ടില്‍ പ്രതികള്‍ എത്തുകയായിരുന്നു. നേരത്തെതന്നെ മയക്കാനുള്ള മരുന്നുകള്‍ കലക്കിയ കൂള്‍ഡ്രിംഗ്സ് ഇവര്‍ കൈയില്‍ കരുതിയിരുന്നു. രത്നത്തിന്റെ വിലയെക്കുറിച്ച് സംസാരിക്കുന്നതിനിടെ കൂള്‍ഡ്രിംഗ്സ് വര്‍മയെ കുടിപ്പിക്കുകയായിരുന്നു. ഇതിനുശേഷം വര്‍മയെയും അഭിഭാഷകനെയും ബലപ്രയോഗത്തിലൂടെ കീഴടക്കി കൈയില്‍ കരുതിയിരുന്ന ക്ളോറോഫോം മണപ്പിച്ച് ബോധം കെടുത്തുകയായിരുന്നുവെന്നും ഇതിനിടെയാണ് വര്‍മ മരിച്ചതെന്നും എഡിജിപി പറഞ്ഞു.

മൊബൈല്‍ ഫോണ്‍ ഉപയോഗിക്കുന്നതിന്റെ പരിധി നോക്കി പോലീസ് പിടിക്കാതിരിക്കാനായി വ്യാജപേരില്‍ സംഘടിപ്പിച്ചിരുന്ന മൊബൈല്‍ ഫോണാണ് പ്രതികള്‍ ഉപയോഗിച്ചിരുന്നതെന്നും സംഭവദിവസം ഇവര്‍ മൊബൈല്‍ ഫോണുകള്‍ ഉപയോഗിച്ചിരുന്നില്ലെന്നും എഡിജിപി വെളിപ്പെടുത്തി. എങ്കിലും അന്വേഷണ സംഘം നടത്തിയ ആസൂത്രിതമായ നീക്കത്തില്‍ പ്രതികള്‍ കുടങ്ങുകയായിരുന്നുവെന്നും എഡിജിപി ഹേമചന്ദ്രന്‍ വ്യക്തമാക്കി.

രണ്ടു ദിവസം മുന്‍പ് ഹരിഹര വര്‍മ്മയുടെ കൊലപാതക കേസ് ക്രൈംബ്രാഞ്ചിന് വിട്ടിരുന്നു. എന്നാല്‍ ക്രൈംബ്രാഞ്ച് അന്വേഷണം ആരംഭിച്ചിരുന്നില്ല. ഇതിനകം തന്നെ സിറ്റി സിറ്റി പോലീസ് പ്രതികളെ കുടുക്കിയിരുന്നു.

ഡിസംബര്‍ 24 ന് രാവിലെയാണ് ഞെട്ടയം പൂത്തൂര്‍കോണത്തെ ആളില്ലാത്ത വീട്ടില്‍ ഹരിഹരവര്‍മയെ മരിച്ച നിലയില്‍ കണ്െടത്തിയത്. മൂക്കിലും കഴുത്തിലും മുറിവേറ്റ പാടുകളുണ്ടായിരുന്നു. ഈ വീട് ഹരിഹര വര്‍മയുടെ സുഹൃത്ത് അഡ്വ.ഹരിദാസിന്റെ മകളുടെ ഉടമസ്ഥതയിലുള്ളതാണ്. ഹരിദാസിനെ നേരത്തെ നിരവധി തവണ പോലീസ് സംഘം ചോദ്യം ചെയ്തിരുന്നെങ്കിലും യാതൊരു വിവരങ്ങളും ലഭിച്ചിരുന്നില്ല.