റിപ്പബ്ളിക്ദിന പരേഡ്: കേരളത്തിന് സ്വര്‍ണപതക്കം
Thursday, January 31, 2013 8:11 PM IST
ന്യൂഡല്‍ഹി: റിപ്പബ്ളിക് ദിനത്തില്‍ രാജ്പഥിലൂടെ മന്ദം ഒഴുകി നീങ്ങിയ കേരളം അവതിപ്പിച്ച ഹൌസ് ബോട്ട് ഫ്ളോട്ടിന് സ്വര്‍ണപതക്കം. മൂന്നു വര്‍ഷത്തെ ഇടവേളയ്ക്കുശേഷം സംസ്ഥാനത്തിന് റിപ്പബ്ളിക് ദിന പരേഡില്‍ സ്വര്‍ണമെഡല്‍ ലഭിക്കുന്നത്. കായല്‍സഞ്ചാരത്തിനുശേഷം കരയിലേക്കടുക്കുന്ന രീതിയില്‍ രൂപ കല്‍പ്പന ചെയ്ത ഹൌസ് ബോട്ടില്‍ പത്ത് കലാകാരന്‍മാരാണുണ്ടായിരുന്നത്.


ബാല്‍ക്കണിയില്‍ വിശ്രമിക്കുന്ന യൂറോപ്യന്‍ സഞ്ചാരി, ബൈനോക്കുലറിലൂടെ കായല്‍ക്കാഴ്ചകള്‍ വീക്ഷിക്കുന്ന സ്വര്‍ണത്തലമുടിയുളള പെണ്‍കുട്ടി, ബോട്ടിന്റെ ജനാലയില്‍ വിശ്രമിക്കുന്ന വിദേശ ദമ്പതികള്‍, മധുവിധുവിനെത്തിയ പഞ്ചാബി ദമ്പതികള്‍, കായല്‍ ഭംഗി കാമറയില്‍ പകര്‍ത്തുന്ന നീഗ്രോ യുവതി, കായല്‍ ദൃശ്യങ്ങള്‍ വീഡിയോയില്‍ പകര്‍ത്തുന്ന ഫ്രഞ്ച് യുവാവ്, ഇളനീര്‍ വിതരണം ചെയ്ത് സഞ്ചാരികളെ ഹൃദ്യമായി പരിപാലിക്കുന്ന പരിചാരകന്‍, ഇവയൊന്നും ശ്രദ്ധിക്കാതെ ബോട്ടോടിക്കുന്ന സ്രാങ്ക്, ഇവര്‍ തമ്മിലുളള ശരീരഭാഷ എന്നിവ കലാകാരന്മാര്‍ ഏറെ ഭംഗിയായി അവതരിപ്പിച്ചു.

തീമിനു യോജിക്കുന്ന വിധത്തിലുളള കലാകാരന്‍മാരുടെ ശരീര ഭാഷയും യോജിച്ച വേഷ വിധാനവും ഹൃദ്യമായ ആശയ വിനിമയവും ബോട്ടിന്റെ രൂപ കല്‍പ്പനയും പശ്ചാത്തല സംഗീതവുമാണ് കേരളത്തിന് ഈ വിജയം നേടിത്തന്നതെന്ന് ഐ ആന്‍ഡ് പിആര്‍ഡി ഡല്‍ഹി ഡെപ്യൂട്ടി ഡയറക്ടര്‍ കെ. സന്തോഷ് കുമാര്‍ പറഞ്ഞു.

ഐ ആന്‍ഡ് പി ആര്‍ ഡി അസി. ഇന്‍ഫര്‍മേഷന്‍ ഓഫീസര്‍ സിനി കെ. തോമസിന്റെ നേതൃത്വത്തില്‍ പാലക്കാട് നിന്നുളള സുരേഷ്. എന്‍, പ്രസാദ്. എസ്, അനീഷ്. കെ, തിരുവനന്തപുരത്തുനിന്നുളള ഷാജി. വി.എ, ഡല്‍ഹിയില്‍ നിന്നുള്ള എ. ചന്ദ്രകുമാര്‍, നേഹ ഭാസ്കര്‍, പത്തനംതിട്ടയില്‍ നിന്നുളള ശാലിനി. എല്‍. ആര്‍, എറണാകുളത്തു നിന്നുളള ഹരിത. പി, കാസര്‍ഗോഡുനിന്നുളള നിമ്മി. ഐ എന്നിവരാണ് ടാബ്ളോയില്‍ പങ്കെടുത്ത കലാകാരന്‍മാര്‍.

ഫെബ്രുവരി ഒന്നിന് രാവിലെ 11ന് രാഷ്ട്രീയ രംഗശാല ക്യാമ്പില്‍ (ആര്‍.ആര്‍.ക്യാമ്പ്) നടക്കുന്ന ചടങ്ങില്‍ ഐ ആന്‍ഡ് പിആര്‍ഡി വകുപ്പ് സെക്രട്ടറി ടി.ജെ. മാത്യുവും വകുപ്പ് ഡയറക്ടര്‍ എ. ഫിറോസും ചേര്‍ന്ന് പ്രതിരോധ മന്ത്രി എ.കെ. ആന്റണിയില്‍ നിന്ന് പുരസ്കാരം ഏറ്റുവാങ്ങും.

റിപ്പബ്ളിക് ദിന പരേഡില്‍ കേരളത്തിന്റെ കഴിഞ്ഞ പത്തുവര്‍ഷത്തെ പങ്കാളിത്തം ശ്രദ്ധേയമാണ്. 2007 ല്‍ അവതരിപ്പിച്ച പൂരത്തിനും 2009 ല്‍ അവതരിപ്പിച്ച ഓണത്തിനും കേരളം സ്വര്‍ണമെഡല്‍ നേടിയിരുന്നു. 2003 ല്‍ അവതരിപ്പിച്ച തെയ്യം വെളളി മെഡല്‍ നേടി. 1996 ലെ സ്പൈസസ് ബോട്ടാണ് കേരളത്തിന് ആദ്യമായി സ്വര്‍ണമെഡല്‍ നേടിത്തന്നത്.