മെക്സിക്കോ എണ്ണകമ്പനിയിലെ പൊട്ടിത്തെറി; മരണം 25 ആയി
Friday, February 1, 2013 7:32 PM IST
മെക്സിക്കോസിറ്റി: മെക്സിക്കോയുടെ തലസ്ഥാന നഗരമായ മെക്സിക്കോസിറ്റിയിലെ സര്‍ക്കാര്‍ ഉടമസ്ഥതയിലുള്ള എണ്ണകമ്പനിയിലുണ്ടായ സ്ഫോടനത്തില്‍ മരിച്ചവരുടെ എണ്ണം 25 ആയി. നൂറോളം പേര്‍ക്ക് പരിക്കേറ്റിട്ടുണ്ട്. പൊട്ടിത്തെറിയുടെ ആഘാതത്തില്‍ കമ്പനി കെട്ടിടത്തിന്റെ മൂന്ന് നിലകള്‍ക്ക് സാരമായ കേടുപാടു പറ്റി. നഗരത്തിലെ ഏറ്റവും ഉയരം കൂടിയ അന്‍പത്തിയൊന്ന് നിലകളുള്ള പീമെക്സ് ടവറിന് സമീപത്തുള്ള കമ്പനിയിലാണ് അപകടമുണ്ടായത്.

പ്രാദേശിക സമയം ഉച്ചയ്ക്ക് 3.45#ൂ നായിരുന്നു സ്ഫോടനം. സ്ഫോടനസമയത്ത് തൊഴിലാളികളില്‍ അധികം പേരും ഭക്ഷണം കഴിക്കാന്‍ പോയതിനാല്‍ വന്‍ ദുരന്തം ഒഴിവാകുകയായിരുന്നു. കെട്ടിടത്തിന്റെ അവശിഷ്ടങ്ങള്‍ക്കിടയില്‍ ആളുകള്‍ കുടുങ്ങിക്കിടപ്പുണ്ടോയെന്നറിയാന്‍ രക്ഷാപ്രവര്‍ത്തകര്‍ തെരച്ചില്‍ തുടരുകയാണ്. സൈന്യവും റെഡ് ക്രോസും അഗ്നിശമന സേനയുമാണ് രക്ഷാപ്രവര്‍ത്തനം നടത്തുന്നത്. രക്ഷാപ്രവര്‍ത്തനത്തില്‍ പരിശീലനം ലഭിച്ച നായ്ക്കളുടെ സഹായത്തോടെയാണ് തെരച്ചില്‍ നടക്കുന്നത്. സ്ഫോടനത്തിന്റെ ആഘാതത്തിലുണ്ടായ പുക മണിക്കൂറുകളോളം അന്തരീക്ഷത്തില്‍ തങ്ങിനിന്നിരുന്നു. പൊട്ടിത്തെറിയുടെ കാരണം പ്രാഥമിക അന്വേഷണത്തില്‍ കണ്ടെത്താനായിട്ടില്ല. കെട്ടിടത്തിന്റെ താഴെയുള്ള പാര്‍ക്കിംഗ് മേഖലയിലാണ് പൊട്ടിത്തെറിയുണ്ടായത്.

കഴിഞ്ഞ സെപ്റ്റംബറില്‍ വടക്കന്‍ മെക്സിക്കോയിലെ പെമെക്സ് വാതക പ്ളാന്റിലുണ്ടായ സ്ഫോടനത്തില്‍ 30 പേര്‍ കൊല്ലപ്പെട്ടിരുന്നു.