ലിംകാ റെക്കോര്‍ഡ്സിലെത്തിയ കോഴിക്കോടന്‍ ഫേസ്ബുക്ക് കൂട്ടായ്മ
Friday, February 1, 2013 11:25 PM IST
കോഴിക്കോട്: സൌഹൃദത്തിന്റെ നാടാണ് കോഴിക്കോട്. കൂട്ടായ്മകള്‍ക്കും സൊറവട്ടങ്ങള്‍ക്കും പുകള്‍പെറ്റ കോഴിക്കോടന്‍ സൌഹൃദം ഏറെ പ്രസിദ്ധവുമാണ് വൈക്കം മുഹമ്മദ് ബഷീറും എംടിയും എസ്കെ പൊറ്റക്കാടുമെല്ലാം ഒരുകാലത്ത് ഇങ്ങിനെയുള്ള സൌഹൃദവലയത്തില്‍ നിന്നാണ് ജീവിതഗന്ധിയായ കഥകള്‍ മെനഞ്ഞിരുന്നത്.

പിന്നീടും കോഴിക്കോടന്‍ കൂട്ടുകൂടലിന് മാനാഞ്ചിറയും ബീച്ചുമെല്ലാം സാക്ഷിയായി. സായാഹ്നങ്ങള്‍ ചര്‍ച്ചകള്‍കൊണ്ടും സംവാദങ്ങള്‍കൊണ്ടും നിറഞ്ഞു. കാലം മാറിയപ്പോഴും കോഴിക്കോടന്‍ സൌഹൃദത്തിന് മാറ്റ് കുറഞ്ഞില്ല. അവര്‍ ഒത്തുകൂടി, സൊറ പറയുകമാത്രമല്ല ഇറങ്ങിത്തിരിച്ച് വേണ്ടത് ചെയ്യുകയും ചെയ്തു. എന്നാല്‍ പഴയതില്‍നിന്ന് ഒരു വ്യത്യാസം-ഈ കൂട്ടായ്മയും പ്രവൃത്തിയുമെല്ലാം കംപ്യൂട്ടര്‍ മോണിറ്ററിലൂടെയാണെന്നു മാത്രം. കംപ്യൂട്ടര്‍ ഒരു ഇടനിലക്കാരന്‍ മാത്രം. സൌഹൃദത്തിന്റെ വലയം കോഴിക്കോടില്‍മാത്രം ഒതുങ്ങാതിരിക്കാനുള്ള ഒരുപാധി.

നമ്മുടെ കോഴിക്കോട് എന്ന ഫേസ് ബുക്ക് കൂട്ടായ്മ അംഗബലം കൊണ്ടും ചിട്ടയായ പ്രവര്‍ത്തനം കാഴ്ചവച്ചും ലിംകാ ബുക്ക് ഓഫ് റെക്കോര്‍ഡ്സില്‍ സ്ഥാനം നേടിയിരിക്കുന്നു. ഇതാദ്യമായാണ് കേരളത്തില്‍നിന്ന് ഒരു ഇന്റര്‍നെറ്റ് കൂട്ടായ്മ ലിംകാ ബുക്ക് ഓഫ് റെക്കോര്‍ഡ്സില്‍ ഇടം നേടുന്നത്. ഇതോടെ രാജ്യത്തിലെ തന്നെ സൈബര്‍ സൌഹൃദവലയത്തില്‍ ഏറ്റവും മികച്ച കൂട്ടായ്മകളിലൊന്നായി 'നമ്മുടെ കോഴിക്കോട്'. ഒരു ലക്ഷത്തിലധികം അംഗബലം, വെര്‍ച്വല്‍ കൂട്ടായ്മയെന്നതില്‍ കവിഞ്ഞ് നടത്തുന്ന മാതൃകാപരമായ പ്രവര്‍ത്തനം തുടങ്ങിയ ഘടകങ്ങള്‍ പരിഗണിച്ചാണ് നമ്മുടെ കോഴിക്കോടിന് ലിംകാ ബുക്ക് ഓഫ ്റെക്കോര്‍ഡ്സില്‍ ഇടം നേടാനായത്. 2012 ജൂണില്‍ ലിംകാ ബുക്ക് ഓഫ് റെക്കോര്‍ഡ്സ് ദേശീയതലത്തില്‍ സ്വീകരിച്ച അപേക്ഷകളുടെ അടിസ്ഥാനത്തിലായിരുന്നു തെരഞ്ഞെടുപ്പ്.

ഡല്‍ഹിയില്‍ നടന്ന ചടങ്ങില്‍ ലിംകാ ബുക്ക് ഓഫ് റെക്കോര്‍ഡ്സ്് എഡിറ്റര്‍ വിജയ്ഘോഷില്‍നിന്ന് നമ്മുടെ കോഴിക്കോടിന്റെ ഫൌണ്ടര്‍ രോഹിത് തയ്യില്‍ പുരസ്കാരം ഏറ്റുവാങ്ങി. രണ്ടുവര്‍ഷം മുമ്പ് യുവ ബിസിനസുകാരനായിരുന്ന രോഹിത് തയ്യില്‍ തുടക്കമിട്ട കൂട്ടായ്മയാണ് ചുരുങ്ങിയ കാലയളവില്‍തന്നെ ഒരു വലിയ കമ്യൂണിറ്റിയായി വളര്‍ന്നത്. രാജ്യത്തിന്റെ അകത്തും പുറത്തുമുള്ള കോഴിക്കോട്ടുകാരും കോഴിക്കോടിനെ സ്നേഹിക്കുന്നവരുമെല്ലാം കോഴിക്കോടന്‍ വിശേഷങ്ങള്‍ അറിയാനും പങ്കുവയ്ക്കാനും കമ്യൂണിറ്റിയെ ആശ്രയിച്ചുതുടങ്ങിയതോടെ കൂട്ടായ്മയെ വെര്‍ച്വല്‍ എന്നതില്‍നിന്ന് സന്നദ്ധസംഘം എന്ന നിലയിലേക്കുകൂടി വളര്‍ത്തുകയായിരുന്നു രോഹിത് തയ്യില്‍.

കോഴിക്കോട് ടാസ്ക് ഫോഴ്സ്

നമ്മുടെ കോഴിക്കോട് എന്ന ഫേസ് ബുക്ക് കൂട്ടായ്മയെ പുരസ്കാരത്തിനര്‍ഹമാക്കിയത് ഒരു ലക്ഷത്തിലധികം അംഗങ്ങള്‍ എന്നതില്‍ കവിഞ്ഞ് മാതൃകാപരമായ പ്രവര്‍ത്തനം കൂടിയാണ്. അതിന് കൂട്ടായ്മയ്ക്കു കഴിഞ്ഞത് കോഴിക്കോട് ടാസ്ക് ഫോഴ്സ് എന്ന സന്നദ്ധ സംഘവും. കൂട്ടായ്മയിലെ നഗരത്തില്‍തന്നെയുള്ള സജീവ അംഗങ്ങളെ ഉള്‍പ്പെടുത്തി രൂപീകരിച്ച സംഘമാണ് ടാസ്ക് ഫോഴ്സ്. ഇവര്‍ വഴിയാണ് സന്നദ്ധ പ്രവര്‍ത്തനങ്ങള്‍ ഏറ്റെടുത്തു നടത്തുന്നത്. മറ്റ് അംഗങ്ങളുടെ പിന്തുണയും സഹായവും ഇവര്‍ക്കുണ്ടാകുകയും ചെയ്യും.

ടാസ്ക് ഫോഴ്സിന്റെ നേതൃത്വത്തില്‍ നിര്‍ധന വിദ്യാര്‍ഥികള്‍ക്ക് സൌജന്യ ബുക്ക് വിതരണം, മരുന്ന് വിതരണം തുടങ്ങിയ പ്രവര്‍ത്തനങ്ങള്‍ക്ക് തുടക്കം കുറിച്ചു. സൌജന്യ വൃക്ഷത്തൈ വിതരണം, ബാലികാ സദനത്തില്‍ പണം സ്വരൂപിച്ച് നല്‍കല്‍, പുതിയാപ്പ സ്കൂളിലെ വിദ്യാര്‍ഥികള്‍ക്കായി റൌണ്ട് ടേബിള്‍ സ്പോണ്‍സര്‍ ചെയ്തത് തുടങ്ങിയ പ്രവര്‍ത്തനങ്ങള്‍ നമ്മുടെ കോഴിക്കോടിനെ കൂടുതല്‍ ജനകീയമാക്കി. വര്‍ഷാവര്‍ഷം ക്രിസ്മസ്, ന്യൂ ഇയര്‍ ഗെറ്റുഗദര്‍, ഫുട്ബോള്‍ മാച്ചുകള്‍ തുടങ്ങിയവയും നടത്തിവരുന്നു.
നൂറിലധികം ആക്ടീവ് മെമ്പര്‍മാരാണ് ടാസ്ക് ഫോഴ്സിലുള്ളത്.

വല നിറയെ സൌഹൃദം

കോഴിക്കോടന്‍ വിശേഷങ്ങളെക്കുറിച്ചുള്ള സജീവ ചര്‍ച്ചയാണ് നമ്മുടെ കോഴിക്കോട്ട് നടക്കുന്നത്. നഗരത്തിലെ സാംസ്കാരിക-സംഗീത-കായിക പരിപാടികളെ കുറിച്ചുള്ള വിവരങ്ങള്‍ അംഗങ്ങള്‍ നേരത്തെ പോസ്റ്റ് ചെയ്യുന്നതിനാല്‍ മറ്റുള്ളവര്‍ക്കും അത് ഉപകാരപ്രദമാകുന്നു. കൂടാതെ റിയല്‍ എസ്റേറ്റ്, സ്വര്‍ണവില, രാഷ്ട്രീയ, സിനിമ, സംഗീതം, യൂസ്ഡ് വാഹനങ്ങളുടെ വാങ്ങല്‍, വില്‍പ്പന തുടങ്ങിയവയുടെ ഗൌരവമാര്‍ന്ന ചര്‍ച്ചയും ആലോചനകളുമാണ് നമ്മുടെ കോഴിക്കോടില്‍ നടക്കുന്നത്.

കമ്യൂണിറ്റിയുടെ രണ്ടുവര്‍ഷത്തെ പ്രവര്‍ത്തനങ്ങളെ നിരീക്ഷിച്ചും വിലയിരുത്തിയുമാണ് ലിംകാ അധികൃതര്‍ നമ്മുടെ കോഴിക്കോടിനെ പുരസ്കാരത്തിന് തെരഞ്ഞെടുത്തിരിക്കുന്നത്. ഇത് വരുംനാളുകളിലെ പ്രവര്‍ത്തനങ്ങളെ കൂടുതല്‍ സജീവമാക്കാന്‍ ഉപയോഗിക്കുമെന്ന് ഗ്രൂപ്പ് ഫൌണ്ടര്‍ രോഹിത് തയ്യില്‍ പറഞ്ഞു. കൂടുതല്‍ വൈവിധ്യം, കൂടുതല്‍ പ്രവര്‍ത്തനസജ്ജം എന്ന നിലയില്‍ ഗ്രൂപ്പിനെ കൂടുതല്‍ ഉയരത്തിലെത്തിക്കുമെന്നും അദ്ദേഹം പറഞ്ഞു.