മൂന്നാർ ഒഴിപ്പിക്കൽ: മുഖ്യമന്ത്രിയുടെ പരസ്യവിമർശനത്തിൽ സിപിഐക്ക് കടുത്ത അതൃപ്തി
Friday, April 21, 2017 11:56 AM IST
കോട്ടയം: വിവിധ വിഷയങ്ങളിൽ പുകഞ്ഞുനിന്നിരുന്ന സിപിഎം- സിപിഐ തർക്കം മൂന്നാർ പാപ്പാത്തിച്ചോലയിലെ കൈയേറ്റം ഒഴിപ്പിക്കൽ വിവാദത്തോടെ രൂക്ഷമാകുന്നു. സർക്കാർ അറിയാതെയാണ് റവന്യൂവകുപ്പ് കുരിശുപൊളിച്ചുനീക്കിയതെന്നാണ് വ്യാഴാഴ്ച കോട്ടയത്ത് മുഖ്യമന്ത്രി പിണറായി വിജയൻ പരസ്യമായി പ്രസംഗിച്ചത്. തന്‍റെ മന്ത്രിസഭയിലെ ഒരു വകുപ്പിന്‍റെ പ്രവർത്തനത്തിനെതിരേ മുഖ്യമന്ത്രി പരസ്യവേദിയിൽ ആക്ഷേപം ഉന്നയിക്കുന്ന സ്ഥിതി അപൂർവമാണ്, പ്രത്യേകിച്ചു മറ്റൊരു കക്ഷിയുടെ മന്ത്രി ഭരിക്കുന്ന വകുപ്പിനെക്കുറിച്ച്. റവന്യൂവകുപ്പിലെ ഉദ്യോഗസ്ഥരെ നേരിട്ട് അതൃപ്തി അറിയിച്ചു. ഇത്തരം നടപടികൾ സ്വീകരിക്കുന്നതിനു മുന്പ് ഇവിടെ ഒരു സർക്കാർ ഉണ്ടെന്ന് ഓർക്കണമെന്ന കർശന മുന്നറിയിപ്പും നൽകിയെന്നും അദ്ദേഹം പറഞ്ഞിരുന്നു.

ഘടകകക്ഷിയുടെ വകുപ്പിനെക്കുറിച്ചുള്ള ഇത്തരം പരസ്യവിമർശനം മുഖ്യമന്ത്രി നടത്തുന്നത് അസാധാരണമാണ്. ഘടകക്ഷികളുടെ പ്രവർത്തനങ്ങളിലുള്ള അതൃപ്തി പലപ്പോഴും മുഖ്യമന്ത്രി മന്ത്രിസഭായോഗങ്ങളിലാണ് പ്രകടിപ്പിക്കാറുള്ളതും പങ്കുവയ്ക്കാറുള്ളതും. ഈ പതിവ് തെറ്റിച്ചായിരുന്നു മുഖ്യമന്ത്രിയുടെ പരസ്യവിമർശനം. മുഖ്യമന്ത്രിയുടെ ചുമതലയിലുള്ള പോലീസ് വകുപ്പിനെക്കുറിച്ചു സിപിഐ നേതാക്കൾ ഒളിഞ്ഞും തെളിഞ്ഞും നടത്തിവന്നിരുന്ന വിമർശനങ്ങൾക്ക് അവസരം ഒത്തുവന്നപ്പോൾ തിരിച്ചടി നൽകിയതാണെന്നു കരുതപ്പെടുന്നു.

എന്തായാലും മുഖ്യമന്ത്രിയുടെ രൂക്ഷമായ ഭാഷയിലുള്ള പരസ്യവിമർശനം സിപിഐയെ ചൊടിപ്പിച്ചിട്ടുണ്ട്. മുഖ്യമന്ത്രി അറിയാതെയല്ല കുരിശുനീക്കിയതെന്നു സിപിഐയും റവന്യൂവകുപ്പും പ്രതികരിച്ചിരിക്കുന്നത്. മുഖ്യമന്ത്രിക്ക് മറുപടി പറയാനില്ലെന്ന് റവന്യൂമന്ത്രി ഇ.ചന്ദ്രശേഖരൻ പ്രതികരിക്കുകയും ചെയ്തു. വ്യാഴാഴ്ച നടന്നത് റവന്യൂവകുപ്പ് സാധാരണ നടത്തുന്ന രീതിയിലുള്ള ഒഴിപ്പിക്കൽ നടപടി മാത്രമാണെന്നും അതു മുഖ്യമന്ത്രിയെ അറിയിച്ച് അനുവാദം വാങ്ങേണ്ട കാര്യമില്ലെന്നുമാണ് സിപിഐയുടെ നിലപാട്.

നേരത്തെ, എൻജിനിയറിംഗ് വിദ്യാർഥി ജിഷ്ണുവിന്‍റെ മരണത്തെത്തുടർന്നുണ്ടായ വിവാദങ്ങളിൽ ഇരുകക്ഷികളും തമ്മിൽ രൂക്ഷമായ വാക്പോരു നടന്നിരുന്നു. ജിഷ്ണുവിന്‍റെ അമ്മയെ പോലീസ് ആസ്ഥാനത്തിനു മുന്നിൽനിന്ന് അറസ്റ്റ് ചെയ്തു നീക്കിയ രീതിക്കെതിരേ സിപിഐ പരസ്യമായി രംഗത്തുവന്നു. പോലീസിനെ നിലയ്ക്കുനിർത്താൻ മുഖ്യമന്ത്രി തയാറാകണമെന്നതായിരുന്നു സിപിഐ വിമർശനങ്ങളുടെ കാതൽ. അഭിപ്രായ ഭിന്നത പല കാര്യങ്ങളിലുമുണ്ടെന്നും അതു ചർച്ചകളിലൂടെ തീർക്കുമെന്നും സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും സിപിഐ സംസ്ഥാന സെക്രട്ടറി കാനം രാജേന്ദ്രനും പറഞ്ഞിരുന്നു. ഇരുകൂട്ടരും നിലപാടുകൾ വ്യക്തമാക്കാൻ പത്രസമ്മേളനങ്ങളും വിളിച്ചു. ഒടുവിൽ കേന്ദ്ര നേതാക്കൾ വരെ പരസ്പരം സംസാരിച്ചാണ് വലിയ കോലാഹലങ്ങൾക്ക് തത്കാലം തടയിട്ടത്. എന്നാൽ, മൂന്നാർ വിഷയത്തോടെ ഈ മുറുമുറുപ്പ് വീണ്ടും ശക്തമായിരിക്കുകയാണ്.

സിപിഎം നേതാക്കളുടെയും ഇഷ്ടക്കാരുടെയും എതിർപ്പിനെ മറികടന്ന് സിപിഐ നിയന്ത്രണത്തിലുള്ള റവന്യൂവകുപ്പ് മൂന്നാറിൽ ഒഴിപ്പിക്കൽ നടപടികൾ നടത്തുന്നതാണ് സിപിഎമ്മിനെ ചൊടിപ്പിക്കുന്നത്. ദേവികുളം സബ് കളക്ടറെ തടഞ്ഞുവച്ചു സിപിഎം പ്രാദേശിക നേതൃത്വം തങ്ങളുടെ എതിർപ്പ് പരസ്യമാക്കി. കൈയേറ്റത്തിനെതിരേ ജനരോഷം നിലനിൽക്കുന്നതിനാൽ സിപിഎം സംസ്ഥാന നേതൃത്വവും സർക്കാരും പരസ്യമായി ഒഴിപ്പിക്കൽ നടപടികളെ തള്ളിപ്പറഞ്ഞിരുന്നില്ല.

എന്നാൽ, പാപ്പാത്തിച്ചോലയിൽ കുരിശു സ്ഥാപിച്ച് ആത്മീയ സംഘടനയുടെ മറവിൽ ചിലർ നടത്തിയ കൈയേറ്റം ഒഴിപ്പിച്ചതോടെ മുഖ്യമന്ത്രി അടക്കം ഒഴിപ്പിക്കലിനെതിരേ പരസ്യമായി വിമർശനം ഉന്നയിച്ചിരിക്കുകയാണ്. ഒഴിപ്പിക്കലിന്‍റെ ഭാവി ഇന്നത്തെ എൽഡിഎഫ് യോഗത്തിനു ശേഷമേ വ്യക്തമാകൂ.
RELATED NEWS
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.