എൻഎച്ച് 47 ൽ രാത്രി യാത്ര ചെയ്യാൻ ധൈര്യമുണ്ടോ..‍? മുരളി ഗോപിയുടെ വെല്ലുവിളി

Tuesday, February 7, 2017 5:01 AM IST

വേറിട്ട അഭിനയവും സിനിമകളും സമ്മാനിച്ചു മലയാളികളുടെ ഇഷ്ടം നേടിയെടുത്ത മുരളി ഗോപി പൊതു വിഷയങ്ങളിൽ തന്‍റെ നിലപാടുകൾ തുറന്നെഴുതിയും വാർത്ത സൃഷ്ടിക്കാറുണ്ട്. തിരുവനന്തപുരത്തു നിന്നു കോച്ചിയിലേക്കു എൻ എച്ച് 47ലൂടെ രാത്രിയിൽ ഡ്രൈവ് ചെയ്തതിന്‍റെ ദുരനുഭവങ്ങൾ വിവരിച്ചുകൊണ്ട് താരം ഇട്ട ഫേസ് ബുക്ക്പോസ്റ്റും ചർച്ചയായിക്കഴിഞ്ഞു.

തെളിയാത്ത വഴിവിളക്കുകൾ, അസ്ഥാനത്തുള്ള ഡിവൈഡറുകൾ എന്നിങ്ങനെ ആ യാത്രയിൽ താൻ നേരിട്ട എല്ലാ വെല്ലുവിളികളെക്കുറിച്ചും നർമത്തിൽ ചാലിച്ച ഭാഷയിൽ ഏറെ അമർഷത്തോടെ താരം എഴുതിയിട്ടുണ്ട്.

മുരളി ഗോപിയുടെ ഫേസ്ബുക്ക് പോസ്റ്റിന്‍റെ പൂർണരൂപം

രാത്രി. തലസ്ഥാനത്തുനിന്ന് വളയം പിടിച്ചു കൊച്ചിയിലേക്ക്. ഒറ്റ തെരുവ് വിളക്ക് പോലും ഇല്ലാത്ത കിലോമീറ്റർസ് ആൻഡ് കിലോമീറ്റർസ്. ഫുട്പാത്തിനു പകരം കാട്ടുപൊന്തകൾ. ഹൈ ബീം മാത്രം ഇട്ടു എതിരെ വരുന്ന കാറോട്ടികൾ. അസ്ഥാനത്തുള്ള ഡിവൈഡറുകൾ. ചിരങ്ങുപിടിച്ച റോഡുകൾ.

ബ്രിട്ടീഷുകാർ പണ്ട് കെട്ടിത്തന്ന ഇടുങ്ങിയ ചില പാലങ്ങൾ; അവയിൽ വച്ച് മാത്രം ഓവർടേക്ക് ചെയ്യുന്ന ശശികല ലോറികൾ. ശ്രീമാൻ ഇൻഡ്യാനാ ജോൺസ്‌, താങ്കളെ ഞാൻ വെല്ലുവിളിക്കുന്നു. ആമസോണിലെ പൊന്നും വജ്രവും പിന്നെ തേടാം. ആദ്യം NH 47 ലൂടെ തിരുവനന്തപുരത്തു നിന്നും കൊച്ചി വരെ രാത്രി കാലത്തു ഒന്ന് ഓടിച്ചു കാട്ടൂ.

മെയ് മാസം തീരും മുൻപ് വന്നാൽ താങ്കൾക്ക് ഒരു ഗുണം ഉണ്ടാവും. ഇവിടെ ഉത്സവകാലം ആയതിനാൽ റോഡരുകിലെ അമ്പലങ്ങളുടെ മതിലുകൾ നിറയെ കളർ ബൾബുകൾ തൂക്കിയിട്ടുണ്ട്. പ്രതിഷ്ഠയുടെ വെളിച്ചത്തിൽ "അഹിന്ദു"വായ താങ്കൾക്ക് അവകാശം ഇല്ലെങ്കിലും ഈ ബൾബുകൾ തരുന്ന വെളിച്ചം ഉപയോഗപ്പെടുത്താവുന്നതാണ്!! വേഗം വന്നോളൂ.....

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.