കാർ വാങ്ങാം, ഒരു പാനീയം വാങ്ങുന്ന ലാഘവത്തിൽ

ചൈനീസ് ഇ-കൊമേഴ്സ് ഭീമൻ അലിബാബയും അമേരിക്കൻ വാഹനിർമാതാവായ ഫോർഡും ചേർന്ന് കാർ വെൻഡിംഗ് മെഷീൻ ചൈനയിൽ സ്ഥാപിച്ചു. ഒരു പാനീയം വാങ്ങുന്ന ലാഘവത്തോടെ കാർ വാങ്ങാൻ ജനങ്ങളെ പ്രാപ്തരാക്കുകയാണ് ഇരുകമ്പനികളുടെയും ലക്ഷ്യം.

വാഹനം ടെസ്റ്റ്‌ഡ്രൈവ് നടത്താൻ താത്പര്യപ്പെടുന്നവർക്ക് പത്തു മിനിറ്റിനുള്ളിൽ മറ്റാരുടെയും സഹായമില്ലാതെ വാഹനം ലഭിക്കുമെന്നതാണ് പ്രത്യേകത. ഗ്വാൻഷോയിൽ സ്ഥാപിച്ചിരിക്കുന്ന അഞ്ചു നിലകളുള്ള വെൻഡിംഗ് മെഷീനിൽ ജീവനക്കാരുമില്ല. വൈകാതെ ഇത്തരം കാർ വെൻഡിംഗ് മെഷീനുകൾ ബെയ്ജിംഗിലും ഹാങ്ഷോയിലും സ്ഥാപിക്കാനാണ് തീരുമാനം.

ആലിബാബയുടെ ടി മാൾ, ടൗബൗ ആപ് തുടങ്ങിയവ ഉപയോഗിച്ചാണ് ഡിജിറ്റൽ വെൻഡിംഗ് മെഷീന്‍റെ പ്രവർത്തനം. ആപ്പിലെ ഫോർഡ് വാഹനങ്ങളുടെ ഓപ്ഷൻ തെരഞ്ഞെടുത്ത ശേഷം ടെസ്റ്റ് ഡ്രൈവിനു വേണ്ട വാഹനം തെരഞ്ഞെടുക്കണം. തുടർന്ന് ഇലക്‌ട്രോണിക് മാർഗം വഴി പേരിനു മാത്രമുള്ള തുക അടച്ചശേഷം വാഹനം ആവശ്യമാ‍യ സമയവും നല്കണം.

ബുക്കിംഗ് നടത്തുന്ന ആളുടെ സെൽഫികൂടി നല്കിയാലേ നടപടികൾ പൂർത്തിയാകൂ. വാഹനം എടുക്കാൻ ചെല്ലുന്പോൾ വെൻഡിംഗ് മെഷീന് തിരിച്ചറിയുന്നതിനുവേണ്ടിയാണ് സെൽഫി. ടെസ്റ്റ് ഡ്രൈവിനായി എടുക്കുന്ന വാഹനം മൂന്നു ദിവസം കൈവശം വയ്ക്കാം.
മൊബൈൽ ആപ് വഴി വാഹനങ്ങൾ വിൽക്കുന്ന രീതി ആലിബാബയ്ക്കു പുതുമയല്ല.

2016ൽ ഇറ്റാലിയൻ സൂപ്പർകാർ നിർമാതാക്കളായ മസെരാറ്റി 18 സെക്കൻഡുകൾകൊണ്ട് 100 കാറുകൾ ആലിബാബയുടെ ഇ കൊമേഴ്സ് പ്ലാറ്റ്ഫോമായ ടി മാൾ വഴി വിറ്റിരുന്നു. കാറുകൾ നല്കുന്ന ആദ്യ വെൻഡിംഗ് മെഷീനുമല്ല ഇത്. സിംഗപ്പൂരിൽ ലക്ഷ്വറി കാറുകൾക്കായി 15 നിലകളുള്ള വെൻഡിംഗ് മെഷീൻ പ്രവർത്തിക്കുന്നുണ്ട്. ഫെരാരി, ലംബോർഗിനി, ബെന്‍റലി, പോർഷെ തുടങ്ങിയ ബ്രാൻഡുകളാണ് ഈ വെൻഡിംഗ് മെഷീനിലുള്ളത്.