ബിഗ് സല്യൂട്ട്..! പെരുമഴയത്ത് നനഞ്ഞ് ട്രാഫിക് നിയന്ത്രിച്ച പോലീസുകാരന് സോഷ്യൽ മീഡിയയുടെ ആദരം

എന്തിനും ഏതിനും പോലീസുദ്യോഗസ്ഥരെ കണക്കിന് കുറ്റം പറയുന്നവരാണ് മിക്കവരും. വെയിലത്തും മഴയത്തും ആരോടും പരിഭവം പറയാതെയും ചില സമയങ്ങളിൽ സ്വന്തം ജീവൻ പോലും പണയം വച്ചുമാണ് അവർ തങ്ങളെ ഏൽപ്പിച്ചിരിക്കുന്ന ജോലി ചെയ്യുന്നത്. ഇതിന് ഉത്തമ ഉദാഹരണമായി മാറിയിരിക്കുകയാണ് ഡൽഹിയിലെ തിരക്കേറിയ റോഡിൽ നിന്നുള്ള ഒരു വീഡിയോ. പെരുമഴയത്ത് ഒരു കുടപോലും കൈയിലില്ലാതെ മഴ നനഞ്ഞ് ഒരു ട്രാഫിക്ക് പോലീസുദ്യോഗസ്ഥൻ ജോലി ചെയ്യുന്ന വീഡിയോ ആണ് വൈറലായി മാറുന്നത്.

ജോലിക്കിടെ, കേടായ ഒരു കാർ ഇദ്ദേഹം തള്ളിക്കൊടുക്കുന്നതും വീഡിയോയിൽ കാണാൻ സാധിക്കുന്നുണ്ട്. ഈ സമയം ഇതുവഴി കടന്നു പോയ മൻകൻ ബമ്മി എന്നയാളാണ് ഈ ദൃശ്യങ്ങൾ പകർത്തി ഒരു കുറിപ്പോടുകൂടി ഫേസ്ബുക്കിൽ പോസ്റ്റ് ചെയ്തത്. ഈ പോസ്റ്റ് പിന്നീട് സോഷ്യൽ മീഡിയയിൽ വൈറലായി മാറി. പോലീസ് ഉദ്യോഗസ്ഥന്‍റെ ജോലിയോടുള്ള ആത്മാർഥതയെ വാഴ്ത്തുകയാണ് നെറ്റിസൺസ്.

ഫേസ്ബുക്ക് കുറിപ്പിന്‍റെ പൂർണ രൂപം:

ഞാൻ ഇന്ന് റാഡിസിലൂടെ സഞ്ചരിക്കുകയായിരുന്നു. കനത്തമഴയായിരുന്നു. ഒരു പോലീസുകാരൻ പൂർണമായും നനഞ്ഞ് തന്‍റെ ജോലി ചെയ്യുന്നത് കണ്ട് ഞാൻ ഞെട്ടി. എന്‍റെ മുന്നിലുള്ള ഒരു കാർ പെട്ടെന്ന് ബ്രേക്ക് ഡൗണായി. അദ്ദേഹം ഉടൻ കാറിന്‍റെ ഉടമയെ സഹായിക്കുവാൻ രംഗത്തെത്തുകയും ചെയ്തു. അദ്ദേഹം കാർ തള്ളിക്കൊടുക്കുന്ന കാഴ്ച കാണേണ്ടതു തന്നെയായിരുന്നു. കാറിന്‍റെ ഉടമയ്ക്ക് പുറത്തേക്കിറങ്ങി ഒന്നു നനയേണ്ടി പോലും വന്നില്ല.

പോലീസുകാരെ അവർ ചെയ്യുന്ന മോശം കാര്യം മുൻനിർത്തി വിമർശിക്കാറുണ്ട്. എന്നാൽ അതിനൊപ്പം തന്നെ അവർ നല്ല കാര്യങ്ങൾ ചെയ്യുന്പോൾ അതിനെ അഭിന്ദിക്കുകയും വേണം. ഹെവി ട്രാഫിക്കായിരുന്നതിനാൽ അദ്ദേഹത്തിന്‍റെ പേര് ചോദിക്കാൻ എനിക്കു കഴിഞ്ഞില്ല. അതാണ് എനിക്ക് ഏറെ സങ്കടകരമായത്.അദ്ദേഹത്തിന് വേണമെങ്കിൽ തന്‍റെ ആരോഗ്യം നോക്കി എവിടെയെങ്കിലും മഴനനയാതെ സുരക്ഷിതമായി കയറി നിൽക്കാമായിരുന്നു. എന്നാൽ അദ്ദേഹം അത് ചെയ്തില്ല. അദ്ദേഹത്തെ ഞാൻ സല്യൂട്ട് ചെയ്യുന്നു.