ബിഗ്ബെൻ വീണ്ടും മുഴങ്ങും, പക്ഷേ...

Friday, October 20, 2017 2:24 AM IST

അറ്റകുറ്റപ്പണികൾക്കായി പ്രവർത്തനം നിർത്തിവച്ചിരുന്ന ഇംഗ്ലണ്ടിലെ ബിഗ് ബെൻ ഘടികാരഗോപുരം വീണ്ടും മണിമുഴക്കും. യുദ്ധവിരാമ ദിനമായികൊണ്ടാടുന്ന അടുത്ത മാസം 11, ക്രിസ്മസ്, 2018ലെ പുതുയുഗപ്പിറവി എന്നീ വിശേഷാവസരങ്ങളിലായിരിക്കും ബിഗ് ബെൻ വീണ്ടും മണിമുഴക്കുക. എന്നാൽ, കാലപ്പഴക്കംമൂലമുള്ള പ്രശ്നങ്ങളുള്ളതിനാൽ ബിഗ് ബെന്നിന് പഴയതുപോലെ കൃത്യസമയത്ത് മണിമുഴക്കാൻ കഴിഞ്ഞേക്കില്ലെന്നു ബ്രിട്ടീഷ് പാർലമെന്‍റ് അറിയിച്ചിട്ടുണ്ട്.

ഈ വിശേഷാവസരങ്ങൾ കഴിയുന്നതോടെ ഘടികാരത്തിന്‍റെ പ്രവർത്തനം വീണ്ടും നിർത്തിവച്ച് അറ്റകുറ്റപ്പണികൾ തുടരുമെന്നും പാർലമെന്‍റ് അറിയിച്ചു. കഴിഞ്ഞ ഓഗസ്റ്റിൽ ഘടികാരഗോപുരം താത്കാലികമായി അടച്ചിട്ടതിനെത്തുടർന്നുണ്ടായ പ്രതിഷേധപരിപാടികൾ ശക്തമായതോടെയാണ് ബിഗ്ബെൻ വീണ്ടും പ്രവർത്തനക്ഷമമാക്കാൻ അധികൃതർ തീരുമാനിച്ചത്.

ബ്രിട്ടൻ പാർലമെന്‍റ് വളപ്പിനുള്ളിൽ സ്ഥിതിചെയ്യുന്ന ബിഗ് ബെൻ ഇതിനു മുന്പും അറ്റകുറ്റപ്പണികൾക്കായി അടച്ചിട്ടുണ്ട്. എന്നാൽ, ഇക്കുറി നാലു വർഷത്തേക്ക് അടച്ചിടാനാണ് അധികൃതരുടെ തീരുമാനം. ഇക്കാലയളവിൽ 6.1 കോടി പൗണ്ട് ചെലവിട്ട് ബിഗ്ബെൻ മോടിപിടിപ്പിക്കാനാണ് പദ്ധതി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.