ചൈനയിലെ ഉപ്പുതടാകം പിങ്ക് നിറമണിഞ്ഞു; സന്ദർശകർക്ക് കാഴ്ചവിരുന്നായി

Friday, September 22, 2017 6:54 AM IST

ചൈനയിലെ ചാവുകടൽ എന്നറിയപ്പെടുന്ന യെൻചെംഗ് ഉപ്പ് തടാകത്തിന് നിറം മാറ്റം. ഈ തടാകത്തിലെ വെള്ളത്തിന് ഇപ്പോൾ പിങ്ക് നിറമാണ്. സോഡിയം സൾഫേറ്റ് ഏറ്റവും കൂടുതലുള്ള ലോകത്തിലെ ഏറ്റവും വലിയ മൂന്നാമത്തെ തടാകമായ യെൻചെംഗിൽ നിറം മാറ്റ പ്രതിഭാസത്തെ തുടർന്ന് സന്ദർശനപ്രവാഹമാണ്. രണ്ടായി തിരിച്ചിരിക്കുന്ന ഈ ഉപ്പ് തടാകത്തിന്‍റെ ഒരു ഭാഗത്ത് നീലയും മറു ഭാഗത്ത് പിങ്കുമാണ് നിറം.

"ഡുണാലിയെല്ല സലൈന' എന്ന പേരിലറിയപ്പെടുന്ന കടൽക്കളകളുടെ പ്രവർത്തന ഫലമായാണ് ഈ തടാകത്തിന്‍റെ നിറം മാറിയതെന്നാണ് കരുതുന്നത്. ഈ പ്രശ്നം ബാധിച്ചാൽ വെള്ളത്തിന് ശരിക്കുമുള്ള നിറം നഷ്ടപ്പെട്ട് മറ്റ് നിറങ്ങളിലേക്ക് മാറും. വടക്കൻ ചൈനയിലെ ഷാൻസി പ്രവിശ്യയിലുള്ള യുൻചെൻ നഗരത്തിൽ സ്ഥിതി ചെയ്യുന്ന ഈ ഉപ്പുതടാകം 132 ചതുരശ്ര കിലോമീറ്ററിലായാണ് പരന്നുകിടക്കുന്നത്. തണുപ്പുകാലത്ത് വെള്ളം വറ്റുന്പോൾ മാത്രമാണ് തടാകത്തിന് ഈ നിറം നഷ്ടമാകുന്നത്. കഴിഞ്ഞ വർഷം തടകാത്തിലെ വെള്ളത്തിന് കടും ചുവപ്പ് നിറമായി മാറിയതിനെ തുടർന്ന് നിരവധി മാധ്യമങ്ങളിൽ വാർത്ത പ്രസിദ്ധീകരിച്ചിരുന്നു.

തടാകത്തിലെ നിറംമാറ്റ പ്രതിഭാസം 50 മില്യണ്‍ വർഷങ്ങൾക്കു മുന്പ് ആരംഭിച്ചതാണെന്നാണ് ശാസ്ത്രഞ്ജൻമാരുടെ അഭിപ്രായം. മാത്രമല്ല 4,000 വർഷങ്ങൾക്കു മുന്പേ മനുഷ്യർ ഈ തടാകം ഉപയോഗിച്ചു തുടങ്ങിയിരുന്നെന്നും പറയപ്പെടുന്നു. ഇപ്പോൾ ഈ തടാകത്തിലെ ഉപ്പ് വ്യാവസായിക ആവശ്യങ്ങൾക്കായാണ് ഉപയോഗിക്കുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.