താഴെവീണാലും കുഴപ്പമില്ല..! മൊബൈൽ ഫോണിനും "എയർബാഗ്..'

Monday, July 2, 2018 3:44 PM IST

എത്ര വിലയുള്ള ഫോണായാലും ശരി നല്ലൊരു വീഴ്ചവീണാൽ കാര്യത്തിലൊരു തീരുമാനമാകും. വീണു പരിക്കേറ്റ ഫോണിനെ വലിയ വിലകൊടുത്തു നന്നാക്കിയെടുത്താലും അധികനാൾ ഉപയോഗിക്കാൻ കഴിയാറില്ല. എന്നാലിപ്പോൾ എത്ര ഉയരത്തിൽനിന്നുള്ള വീഴ്ച‍യാണെങ്കിൽപ്പോലും സ്മാർട്ഫോണിന് ആഘാതമേൽക്കാതെ സംരക്ഷിക്കുന്ന എയർബാഗ് കെയ്സുമായി രംഗത്തെത്തിയിരിക്കുകയാണ് ഒരു ജർമൻകാരൻ പയ്യൻസ്.

ആലൻ സർവകലാശാലയിലെ എൻജിനിയറിംഗ് വിദ്യാർഥിയായ ഫിലിപ് ഫെൻസൽ എന്ന 21കാരനാണ് ഫോണുകൾക്കുള്ള സ്മാർട് കെയ്സ്‌ നിർമിച്ചു പേരെടുത്തിരിക്കുന്നത്.
ഫോൺ താഴേക്കു പതിക്കുന്പോൾ തനിയെ സുരക്ഷാ കവചങ്ങൾ വിടരുന്ന തരത്തിലാണ് ‘ആക്ടീവ് ഡാംപിംഗ് കെയ്സ്’ എന്നു പേരിട്ടിരിക്കുന്ന ഉപകരണത്തിന്‍റെ പ്രവർത്തനം.

കെയ്സിന്‍റെ നാലു മൂലകളിലും ഇത്തരത്തിലുള്ള ലോഹകവചങ്ങളുണ്ട്. എത്ര ഉയരത്തിൽനിന്നു പതിച്ചാലും വീഴ്ചയുടെ ആഘാതം ആഗിരണം ചെയ്യാൻ ഈ നാലു ലോഹകവചങ്ങൾക്കാകും. പ്രത്യേക സെൻസറുകളിലൂടെയാണ് ഫോൺ താഴേക്കു പതിക്കുന്നതു കെയ്സ് തിരിച്ചറിയുക.

ഒരിക്കൽ വിടരുന്ന കവചങ്ങൾ ഉള്ളിലേക്കു തള്ളിവച്ചാൽ വീണ്ടും ഉപയോഗിക്കാനുമാകും. തന്‍റെ വിലകൂടിയ സ്മാർട്ഫോൺ താഴെവീണു പൊട്ടിച്ചിതറിയ അനുഭവമാണ് കെയ്സിന്‍റെ നിർമാണത്തിനു പ്രേരണയായതെന്ന് ഫിലിപ് പറഞ്ഞു. സ്മാർട് കെയ്സിന് ജർമനിയിൽ പേറ്റന്‍റ് നേടിയെടുത്ത ഫിലിപ് അന്താരാഷ്‌ട്ര പേറ്റന്‍റ് സ്വന്തമാക്കാനുള്ള ശ്രമത്തിലാണ്. വൈകാതെതന്നെ കെയ്സ് വ്യാവസായിക അടിസ്ഥാനത്തിൽ നിർമിക്കുമെന്നും ഫിലിപ് പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.