ഞെട്ടിക്കുന്ന വെളിപ്പെടുത്തലുമായി മീര

Home |

Editorial |

Leader Page Article |

Local News |

Gossip

ഞെട്ടിക്കുന്ന വെളിപ്പെടുത്തലുമായി മീര

തന്മാത്ര എന്ന ചിത്രത്തിലൂടെ മലയാള സിനിമയിലെത്തിയ താരമാണ് മീര വാസുദേവ് എന്ന മുംബൈക്കാരി. മലയാളി അല്ലാതിരുന്നിട്ടും മലയാള സിനിമയെ ചേർത്തുപിടിച്ച മീരയ്ക്ക് പിന്നീട് തിളങ്ങാനായില്ല. തന്മാത്രയ്ക്കുശേഷം രണ്ടാംനിര സിനിമകളിലേക്ക് ഒതുക്കപ്പെട്ടതോടെ അവർ പതിയെ അന്യഭാഷകളിലേക്ക് ചേക്കേറി.

എന്നാൽ മലയാളത്തോടുള്ള ഇഷ്ടം വിടാതിരുന്ന അവർ വീണ്ടും തിരിച്ചെത്തി. രാഷ്്ട്രദീപിക സിനിമയ്ക്ക് അനുവദിച്ച അഭിമുഖത്തിൽ ഏറെ കോളിളക്കം സൃഷ്ടിച്ചേക്കാവുന്ന ഒരു വെളിപ്പെടുത്തൽ നടത്തിയിരിക്കുകയാണ് അവർ. വ്യക്തിജീവിതത്തിൽ നേരിടേണ്ടിവന്ന പല വിഷമഘട്ടത്തെക്കുറിച്ചും അഭിമുഖത്തിനിടെ മീര തുറന്നുപറഞ്ഞു. പീഡനകാലമായിരുന്ന ആദ്യ വിവാഹത്തെക്കുറിച്ചും പിന്നീട് ജീവിതത്തിലേക്ക് കടന്നുവന്ന ജോണുമായുള്ള വേർപിരിയലുമൊക്കെ.

തന്‍റെ ചെറുപ്പകാലത്ത് താൻ നിരവധി തവണ ലൈംഗിക ചൂഷണത്തിനിരയായെന്നു പറഞ്ഞാണ് മീര ഇപ്പോൾ ഏവരെയും ഞെട്ടിച്ചിരിക്കുന്നത്. ഏഴാം വയസിലാണ് എനിക്ക് ആദ്യമായി ലൈംഗിക ചൂഷണം നേരിടേണ്ടി വന്നത്. വീട്ടിലെ ജോലിക്കാർ, ട്യൂഷൻ പഠിപ്പിച്ച വളരെ പ്രായമുള്ള മനുഷ്യൻ, പ്ലേ സ്കൂളിലെ ടീച്ചറിന്‍റെ ഭർത്താവ്... ഇങ്ങനെ പലരും ചെറുപ്രായത്തിൽ തന്നെ എന്നെ ഇങ്ങനെ ചൂഷണം ചെയ്തിട്ടുണ്ട്- മീര പറയുന്നു.

ഇതൊന്നും താൻ മാതാപിതാക്കളോടു പറഞ്ഞിരുന്നില്ലെന്നും കുട്ടിയായതിനാൽ ഇത്തരം കാര്യങ്ങളോട് എങ്ങനെ പ്രതികരിക്കണമെന്ന് തനിക്കറിയില്ലായിരുന്നെന്നും നടി പറഞ്ഞു. തനിക്കുണ്ടായ അനുഭവത്തിന്‍റെ വെളിച്ചത്തിലാണ് കുട്ടികൾക്കും മാതാപിതാക്കൾക്കും ലൈംഗിക വിദ്യഭ്യാസം അത്യാവശ്യമാണെന്ന് താൻ പറയുന്നതെന്നും മീര വ്യക്തമാക്കുന്നു. താൻ ഡെക്കാൻ ക്രോണിക്കിളിൽ ചെയ്യുന്ന കോളത്തിൽ ഇപ്പറഞ്ഞ കാര്യങ്ങളെല്ലാം വിശദീകരിച്ചിട്ടുണ്ടെന്നും മീര പറഞ്ഞു.
2005ൽ നടന്ന ആദ്യ വിവാഹം ഇപ്പോഴും പേടിസ്വപ്നമായി അവശേഷിക്കുന്നുവെന്നും ശാരീരികവും മാനസികവുമായ നിരവധി പീഡനങ്ങൾക്കു ശേഷം പോലീസ് സംരക്ഷണത്തിലാണ് താൻ അവിടെ നിന്ന് രക്ഷപ്പെട്ടതെന്നും മീര പറയുന്നു. ആ ബന്ധം 2007ൽ അവസാനിച്ചു. കാമറാമാൻ അശോക് കുമാറിന്‍റെ മകനായ ആദ്യ ഭർത്താവ് മദ്യപാനിയും മാനസിക പ്രശ്നങ്ങളുള്ള ആളുമായിരുന്നു. ഒരു സിനിമാസെറ്റിൽ വച്ചാണ് അയാളെ പരിചയപ്പെടുന്നത്. അയാൾ ചെന്നൈയിലും മുംബൈയിലുമായതിനാൽ കൂടുതലൊന്നും അറിയില്ലായിരുന്നുവെന്നും മീര വെളിപ്പെടുത്തി.

ആദ്യ വിവാഹബന്ധം അവസാനിച്ച് നാലു വർഷത്തിനു ശേഷമാണ് തൃശൂർ സ്വദേശി ജോണിനെ വിവാഹം കഴിച്ചത്. ഞങ്ങൾ പിരിഞ്ഞെങ്കിലും ഇപ്പോഴും നല്ല സൗഹൃദത്തിലാണ്. കുഞ്ഞിന്‍റെ കാര്യങ്ങൾ ഞങ്ങൾ ഒരുമിച്ചാണ് ശ്രദ്ധിക്കുന്നത്. മീര പറയുന്നു. പിന്നെ എന്തിനു പിരിഞ്ഞെന്ന ചോദ്യത്തിന് അതൊക്കെ മാധ്യമങ്ങളിൽ കൊടുത്ത് പ്രശ്നങ്ങൾ സൃഷ്ടിക്കാനില്ലെന്നായിരുന്നു മീരയുടെ മറുപടി. കരിയറിൽ പൂർണമായും ശ്രദ്ധിച്ചു മുന്പോട്ടു പോകാനാണ് ഇനിയുള്ള തീരുമാനമെന്നു പറയുന്ന മീര ചക്കരമാവിൻ കൊന്പത്ത് എന്ന സിനിമ അതിനു പറ്റിയ തുടക്കം നൽകുമെന്നും പ്രതീക്ഷിക്കുന്നു.

സെലക്ടീവായി സിനിമകൾ ചെയ്യുന്നതിനൊപ്പം മലയാളത്തിൽ ഒരു സിനിമ സംവിധാനം ചെയ്യുക എന്ന മോഹം പൂർത്തീകരിക്കാനുള്ള തയ്യാറെടുപ്പിലുമാണ് താൻ എന്നും മീര വ്യക്തമാക്കുന്നു. (അഭിമുഖത്തിന്‍റെ പൂർണരൂപം അടുത്തലക്കം രാഷ്്ട്രദീപിക സിനിമ ദ്വൈവാരികയിൽ)

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.