ലംഘിക്കപ്പെടാനുള്ളതല്ല 10 കൽപ്പനകൾ

Home |

Editorial |

Leader Page Article |

Local News |

Review

ലംഘിക്കപ്പെടാനുള്ളതല്ല 10 കൽപ്പനകൾ

ഇന്നത്തെ സമൂഹത്തിൽ സ്ത്രീകൾക്ക് നേരെ നടന്നു കൊണ്ടിരിക്കുന്ന കൊള്ളരുതായ്മകളെ കുറിച്ചുള്ള വ്യക്‌തമായ കാഴ്ചപ്പാടിൽ നിന്നും ഉദയം കൊണ്ട സിനിമയാണ് ‘10 കല്പനകൾ’. ഈ ചിത്രത്തിന് ഇതിനേക്കാൾ അനുയോജ്യമായ പേര് മറ്റൊന്നില്ല. ലംഘിക്കപ്പെടരുതെന്ന് പറയുകയും എന്നാൽ പലപ്പോഴായി ലംഘിക്കപ്പെടുകയും ചെയ്തു കൊണ്ടിരിക്കുന്ന 10 കല്പനകൾ ലംഘിക്കപ്പെടാനുള്ളതല്ലെന്നു തന്നെയാണ് സംവിധായകൻ ഡോൺ മാക്സ് തന്റെ കന്നി സംവിധാന സംരംഭത്തിലൂടെ പറഞ്ഞുവയ്ക്കുന്നത്.

ക്രൈം ത്രില്ലർ ഗണത്തിലേക്ക് ഒരു ചിത്രം കൂടി വരുമ്പോൾ വന്നേക്കാവുന്ന ക്ലീഷേകളെ പരമാവധി ഒഴിവാക്കാൻ സംവിധായകൻ ശ്രമിച്ചിട്ടുണ്ട്. കഥയിലേക്ക് കടക്കാനുള്ള ആദ്യ ഭാഗത്തെ തപ്പിത്തടയൽ ഒഴിച്ചുനിർത്തിയാൽ തികഞ്ഞ ഒരു ത്രില്ലർ തന്നെയാണ് 10 കൽപ്പനകൾ. രണ്ടാം പകുതിയിലേക്ക് കടക്കുന്നതിന് മുൻപ് തന്നെ പ്രേക്ഷകരെ ത്രില്ലിംഗ് മൂഡിലേക്ക് കൊണ്ടുവരാൻ സംവിധായകന് കഴിഞ്ഞിടത്താണ് ചിത്രത്തിന്റെ വേഗം കൂടുന്നത്.

ഒരു പോലീസ് ഓഫീസറുടെ(മീര ജാസ്മിൻ) അന്വേഷണ അനുഭവം പങ്കുവയ്ക്കുന്നതിലൂടെ കഥ പറഞ്ഞുപോകുന്ന രീതിയാണ് ചിത്രത്തിൽ സ്വീകരിച്ചിരിക്കുന്നത്. അനൂപ് മേനോൻ ഡേവിസെന്ന ഫോറസ്റ്റ് റെയ്ഞ്ചറായും മീര ജാസ്മിൻ ഷാസിയ അക്ബറെന്ന ഇൻവെസ്റ്റിഗേറ്ററുടെ വേഷത്തിലുമാണ് ചിത്രത്തിലെത്തുന്നത്. മീര ജാസ്മിന്റെ തിരിച്ചുവരവ് എന്ന രീതിയിലാണ് 10 കല്പനകൾ തിയറ്റിലെത്തും മുമ്പേ ശ്രദ്ധ നേടുകയും ചെയ്തിരുന്നു.

ചില സിനിമകൾ കണ്ടിറങ്ങുമ്പോൾ നായകനേക്കാൾ ഏറെ വില്ലനെ ഇഷ്‌ടപ്പെട്ടു പോകും. അതു പ്രതിനായകന്റെ വില്ലത്തരങ്ങൾ കൊണ്ടാവില്ല മറിച്ച് അവരുടെ അഭിനയപ്രകടനം കൊണ്ടാവും. അത്തരത്തിൽ ഒരു വില്ലൻ ഈ ചിത്രത്തിലുമുണ്ട്. സുന്ദരമായി ചിരിക്കാനറിയാവുന്ന, സംഗീതം ഇഷ്‌ടപ്പെടുന്ന, ഡയലോഗ് ഡെലിവറിയിൽ കൃത്യതയുള്ള ഇങ്ങനെ നിരവധി മേന്മകളാണ് ചിത്രത്തിലെ പ്രതിനായകനുള്ളത്. വില്ലന്റെ വില്ലത്തരങ്ങളെ ഇന്ന് കണ്ടുവരുന്ന പല സംഭവങ്ങളുമായും കൂട്ടിവായിക്കാവുന്നതാണ്. വില്ലൻ ആരാണെന്ന് ചിത്രം തീയറ്ററിൽ കണ്ട് തന്നെ മനസിലാക്കുക.

നഗരത്തിൽ നടക്കുന്ന കൊലപാതകങ്ങളുടെ അന്വേഷണം വർഷങ്ങൾക്ക് മുമ്പ് നടന്ന എയ്ഞ്ചൽ(റിതിക)ന്റെ കൊലപാതക കേസുമായി ബന്ധപ്പെടുന്നിടത്താണ് കഥയിൽ വഴിത്തിരിവ് ഉണ്ടാകുന്നത്. ഡേവിസ്(അനൂപ് മേനോൻ)ന്റെ സുഹൃത്തിന്റെ മകളുടെ കൊലപാതകത്തിന്റെ കാരണങ്ങൾ അന്വേഷിച്ചുള്ള പോക്ക് കഥയ്ക്ക് പല വഴിയിലൂടെയുള്ള സഞ്ചാരപാഥ ഒരുക്കുന്നുണ്ട്. ക്രൈം ത്രില്ലറിന് പഞ്ച് കൂട്ടുന്നതിന് പാകത്തിനുളള പശ്ചാത്തല സംഗീതമാണ് നവാഗതൻ മിഥുൻ ഈശ്വർ ഒരുക്കിയിരിക്കുന്നത്. ഇതുവരെ കണ്ടുവന്നിട്ടുള്ള ക്രൈം ത്രില്ലറുകളിൽ ഗാനങ്ങൾക്ക് വലിയ പ്രാധാന്യം കൊടുത്തു കണ്ടിട്ടില്ല. എന്നാൽ 10 കൽപ്പനകളിൽ ഗാനങ്ങൾ കൃത്യമായി തന്നെ സംവിധായകൻ ഉപയോഗപ്പെടുത്തിയിട്ടുണ്ട്.

തെളിവുകൾ ഒന്നും അവശേഷിപ്പിക്കാത്ത വില്ലനിൽ നിന്നും തെളിവുകൾ കണ്ടെത്താനുള്ള പെടാപ്പാടിലൂടെയാണ് ചിത്രം മുന്നോട്ടു പോകുന്നത്. ചില കള്ളങ്ങൾ സത്യമാണെന്ന് പറഞ്ഞു ഫലിപ്പിക്കാൻ എളുപ്പമാണ്. അത്തരം ഒരു കള്ളം ഒരാളുടെ ജീവിതത്തിൽ എന്തെല്ലാം മാറ്റങ്ങളുണ്ടാക്കുമെന്നെല്ലാം ചിത്രം കാട്ടിത്തരുന്നുണ്ട്. ദൈവവിശ്വാസിയെ പറ്റിക്കാനെളുപ്പമാണെന്നും എന്നാൽ തിന്മകൾ സംഭവിക്കും മുൻപേ അദൃശ്യമായ ചില ഇടപെടലിലൂടെ വിശ്വാസിയെ കാത്തുരക്ഷിക്കുമെന്നും ചിത്രം പറഞ്ഞുവയ്ക്കുന്നു.

എയ്ഞ്ചലായി എത്തുന്ന റിതിക ചിത്രത്തിൽ മികച്ച പ്രകടനാണ് നടത്തിയിരിക്കുന്നത്. നായകനേക്കാൾ കൂടുതൽ വില്ലന് പ്രാധാന്യം ഉണ്ടായിട്ടും അനൂപ് മേനോൻ ഡേവിസായി ചിത്രത്തിൽ കൈയടക്കത്തോടെയുള്ള പ്രകടനമാണ് നടത്തിയത്. നീതിപീഠത്തിന് തെളിവുകളാണ് ആവശ്യമെങ്കിൽ മനുഷ്യ മനസാക്ഷിക്ക് അതിന്റെ ആവശ്യമില്ലെന്ന് ചിത്രം പറയാതെ പറയുന്നുണ്ട്. കുറ്റവാളികൾ രക്ഷപ്പെടുന്നില്ല, അവർ ഒരിക്കൽ ശിക്ഷയ്ക്ക് വിധേയരാകേണ്ടി വരുമെന്ന് ചിത്രം മനസിലാക്കിത്തരുമ്പോൾ തെല്ലാശ്വാസത്തോടെ തീയറ്റർ വിട്ടിറങ്ങാം.

(മലയാള സിനിമയ്ക്ക് പുതിയൊരു വില്ലനെ കൂടി കിട്ടിയിരിക്കുന്നു... ഈ വില്ലന്റെ പ്രകടനം കണ്ടിരിക്കേണ്ടത് തന്നെയാണ്.)

വി.ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.