കണ്ടു പഴകിയ നമ്പറുകളുമായി ഫുക്രി

Home |

Editorial |

Leader Page Article |

Local News |

Review

കണ്ടു പഴകിയ നമ്പറുകളുമായി ഫുക്രി

സംവിധായകൻ സിദ്ദിഖിന് എന്ത് സംഭവിച്ചു... തമാശയോടൊപ്പം ട്വിസ്റ്റുകളും കുത്തിനിറച്ച് അവിയൽ പരുവത്തിലുള്ള ഒരു ചിത്രം തട്ടികൂട്ടി അതിൽ പുതിയ നമ്പറുകൾ കൂട്ടിയിണക്കാനാണ് ഫുക്രിയിൽ സംവിധായകൻ ശ്രമിച്ചിരിക്കുന്നത്. എന്നാൽ ഫുക്രി പാകമാകാത്ത അവിയലിന്‍റെ രുചി മാത്രമേ പ്രേക്ഷകന് സമ്മാനിക്കുന്നുള്ളൂ.

സിദ്ദിഖിന്‍റെ ചിരിക്കൂട്ട് പ്രതീക്ഷിച്ച മലയാളികൾക്ക് ആർത്തുല്ലസിക്കാനുള്ള പാക്കേജ് ഫുക്രിയിൽ ഇല്ലെങ്കിലും നർമ രംഗങ്ങൾ ഒരുക്കാനുള്ള സംവിധായകന്‍റെ വൈഭവം അങ്ങിങ്ങായി ഓടികളിക്കുന്നുണ്ട്. സിദ്ദിഖും ലാലും ജയസൂര്യയും ഒന്നിക്കുന്ന ചിത്രം എന്ന പ്രത്യേകത തന്നെയാണ് ഫുക്രിയുടെ പ്രധാന ആകർഷണം. ഈ ആകർഷണവലയം നിങ്ങളെ തീയറ്ററിൽ കയറാൻ പ്രേരിപ്പിക്കുന്പോൾ ഒന്നോർക്കുക അമിത പ്രതീക്ഷ വേണ്ട. ചുമ്മാ കണ്ടു രസിക്കാൻ മാത്രമുള്ള തട്ടിക്കൂട്ടുകൾ മാത്രമേ ഫുക്രിയിലുള്ളു.

ഉദയപുരം സുൽത്താനും കാര്യസ്ഥനുമെല്ലാം ഫുക്രി കണ്ടോണ്ടിരിക്കുന്പോൾ ഓർമകളിലേക്ക് ഓടിയെത്തുന്നുണ്ടെങ്കിൽ അത് സിദ്ദിഖ് എന്ന സംവിധായകന് തിരക്കഥ രചനയിൽ കടന്നു കൂടിയ ധാരണ പിശകുകളിൽ നിന്നും സംഭവിച്ചതാണെന്ന് കരുതിയാൽ മതി. അകന്നു പോയവരെ ഒന്നിപ്പിക്കാനായി നെട്ടോട്ടമോടുന്ന ദിലീപിനെ മുന്പേ പറഞ്ഞ രണ്ടു ചിത്രങ്ങളിൽ കണ്ടിട്ടുണ്ടെങ്കിൽ ഈ ചിത്രത്തിൽ ആ വേഷത്തിലേക്ക് കടന്നെത്തുന്നത് ജയസൂര്യയാണെന്നു മാത്രം. ഈ രണ്ടു ചിത്രങ്ങളുടെയും സംഭവ വികാസങ്ങൾ പൊടിയ്ക്ക് അങ്ങോട്ടും ഇങ്ങോട്ടും മാറ്റിയിട്ട് കഥയ്ക്ക് പുതിയ രൂപം നല്കുന്നതിൽ ഫുക്രിയിൽ സിദ്ദിഖ് വിജയിച്ചുവെന്നു പറയാം.

ജീവിക്കാൻ വേണ്ടിയുള്ള മണ്ടൻ നന്പറുകളുമായി ചുറ്റിത്തിരിയുന്ന ലക്കി(ജയസൂര്യ)യെയും കൂട്ടരേയുമാണ് ചിത്രത്തിന്‍റെ തുടക്കത്തിൽ കാണാനാവുക. മണ്ടത്തരം കൊണ്ട് പറ്റിയ വലിയ കുരുക്ക് അഴിക്കാനായി ലക്കിയോടൊപ്പം ഫ്രാങ്ക്ളിനും (ഭഗത് ഇമ്മാനുവൽ) കൂടെയുണ്ട്. പണം ഉണ്ടാക്കാനായി കാട്ടി കൂട്ടുന്ന കുറുക്കുവഴികൾ വഴിതെറ്റി തുടങ്ങുന്നതോടെയാണ് ലക്കി, ഫുക്രി കുടുംബത്തിൽ എത്തിപ്പെടുന്നത്. പിന്നീട് സംഭവിക്കുന്ന സംഭവ വികാസങ്ങൾക്ക് പാകത്തിനൊത്ത തമാശകൾ സിദ്ദിഖ് ചേർക്കാൻ ശ്രമിച്ചെങ്കിലും അത് പൂർണ വിജയത്തിലേക്ക് എത്തിയല്ലായെന്നു സ്ക്രീനിൽ വ്യക്തമാണ്. ഫുക്രിയിലെ പാതിവെന്ത തമാശകളേയും പാകം വന്ന തമാശകളേയും കൃത്യമായി വേർതിരിച്ചെടുക്കാൻ പ്രേക്ഷകന് കഴിയും.

അപ്പോത്തിക്കരി, സു സു സുധീവാത്മീകം, പ്രേതം എന്നീ ചിത്രങ്ങളിലൂടെ ജയസൂര്യ എന്ന നടൻ പ്രേക്ഷകരുടെ ഉള്ളിലുണ്ടാക്കിയ പ്രതീക്ഷാഭാരം വളരെ വലുതായിരുന്നു. തന്‍റെ കൈയ്യിൽ ഭദ്രമായേക്കുമെന്നു ഉറപ്പുള്ള കഥാപാത്രം തന്നെയാണ് ഫുക്രിയിൽ ജയസൂര്യ ഏറ്റെടുത്തത്. പക്ഷേ പുതുമ ഇല്ലായ്മയാണ് ചിത്രത്തെ പിന്നോട്ടടിക്കുന്നത്. ഫുക്രിയിലെ ലക്കിയായി തന്നാലാവും വിധം ചിത്രത്തെ ഒറ്റയ്ക്ക് തോളിലേറ്റാൻ താരം ശ്രമിച്ചിട്ടുണ്ട്. കുടുംബപശ്ചാത്തലവും കളർഫുൾ ഫ്രെയിമുകളുമെല്ലാം ചിത്രത്തിന്‍റെ പോസിറ്റീവ് ഘടകങ്ങളാണ്. എന്നാൽ സിദ്ദിഖ് ഒരുക്കിയ തമാശക്കൂട്ട് വേണ്ടത്ര പഞ്ചില്ലാതെ പോയപ്പോൾ ചിത്രം കയറൂരി വിട്ട പശുവിനെ പോലെ ആയെന്നു മാത്രം.

പ്രയാഗ മാർട്ടിനും അനു സിത്താരയും ചിത്രത്തിൽ നായിക പ്രാധാന്യമുള്ള വേഷങ്ങൾ തന്നെയാണ് പകർന്നാടിയിരിക്കുന്നത്. നടൻ സിദ്ദിഖും ലാലും ചിത്രത്തിൽ തങ്ങളുടെ സീനിയോറിറ്റി വേഷങ്ങൾ കൃത്യമായി പങ്കിട്ടെട്ടുത്തപ്പോൾ അഭിനയ സന്പത്തിനാൽ മാറ്റേറിയ നടനെ സിദ്ദിഖിൽ കാണാനായി. ജയസൂര്യയോടൊപ്പം സിദ്ദിഖിന്‍റെ പ്രകടനവും മികച്ചതായപ്പോൾ താളം തെറ്റിപോയ കഥയ്ക്ക് ഇവരിലൂടെ ജീവൻവയക്കുന്നതായും തോന്നി. കള്ളത്തരങ്ങളുടെ രാജാവായി ദിലീപ് തിളങ്ങിയ കിംഗ് ലയറിന്‍റെ പ്രേതം ഒന്നാം പകുതിയിൽ നായകനടന്‍റെ സ്വഭാവത്തെ സ്വാധീനിക്കുന്നുണ്ട്.

ലക്കി ഏറ്റെടുത്ത ഉത്തരവാദിത്തം രണ്ടാം പകുതിയിൽ നർമത്തിൽ ചാലിച്ച് പറയുന്നതിനിടയിൽ കടന്നു കൂടുന്ന ട്വിസ്റ്റുകൾ ആകെമൊത്തം കണ്‍ഫ്യൂഷനാക്കുന്നുണ്ട്. തമാശകൾ ഒരുക്കുന്നതിനേക്കാൾ കൂടുതൽ ട്വിസ്റ്റുകൾ ഒരുക്കാനായി സംവിധായകൻ വ്യഗ്രത കാട്ടിയപ്പോൾ ചിത്രം കൈവിട്ടു പോവുകയായിരുന്നു. കുരുക്കുകൾ ഒരുപാട് ഉണ്ടായിരുന്നതിനാൽ അവയ്ക്കെല്ലാം ട്വിസ്റ്റുകളിലൂടെ തന്നെ പരിഹാരം കണ്ടേക്കാമെന്നുള്ള സംവിധായകന്‍റെ ബുദ്ധി അത്രകണ്ട് ഏശാതെ പോവുക കൂടി ചെയ്തു. മുറ തെറ്റാതെ വന്ന പാട്ടുകൾ സിനിമ ഉണ്ടാക്കിയ കണ്‍ഫ്യൂഷനിൽ പെട്ട് അലഞ്ഞു തിരിയുകയായിരുന്നു. ഒടുവിൽ എല്ലാം ശുഭമായി അവസാനിച്ചപ്പോൾ പ്രേക്ഷകരും ഹാപ്പിയായി, സിനിമ തീർന്നല്ലോയെന്നോർത്ത്...

(പഴകിയ തമാശകൾ പുതിയ കുപ്പിയിലാക്കാൻ നോക്കിയാൽ ഇങ്ങനെയിരിക്കും)

വി.ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.